7
01 Malya Wꞌankwana Muusaay dehaay,
<<Ani barook Far'uuni kehii Ukwaasana tꞌiiteeb iikwasi hook andi.
Usanuuk Haaruun nabiyook iikti indi.
02 Ani sooyaneetook toona kastooh Haaruun sooya.
Baruuh aree whadꞌa whaashiisooh Yꞌisraaꞌiili giigsiiniyeet toona sooyi indi.
3 Laakiin ani Far'uuniib oogin'i is'ikir andi.
Masreeb whaashiib ani t'ajaayibwa tim'uujisaawwa guudsi andiyeek han,
4 Far'uun isniikar hookna kiidi.
Malya Masri kehii akra jasa iikwasi andi,
akra hukwim iikwasi andi.
Udehayu Y'israa'iili aree Masreeb whaashii iifirꞌa andi.
05 Ani wꞌayu Masri kehii fidhidhtiit Yꞌisraaꞌiili asfar'ihoob,
Imasri ani W'ankwana akatiyeet toona iikan iyadna.>>
idi.
06 Muusaawwa Haaruunwa Wꞌankwana sooyaneet toonaatiit idꞌiin.
07 Oodoor baraah whadꞌa bhaliisamiyaanihoob,
Muusa asimhay tamuun hawla iibri aree Haaruun asimhay tamuunwa mhay hawla iibri.
Haaruuniit Tukwoolay Kwakwar Tiki
08 Wꞌankwana Muusaawwa Haaruunii dehaaywa,
09 <<Farꞌuun bareeyookna dehaay,
<Mꞌuujisaat rhisaanheeb> indiyihoob,
malya Haaruunii dehaay,
<Tukwoolaytook yaksaat Farꞌuuni suurii gidaa!>
diyaa,
aflaay batuuh kwakwar iikti tindi.>>
idi.
10 Shaawti Muusaawwa Haaruunwa Farꞌuun ibeeniit Wꞌankwana sooyaneet toonaatiit idꞌiin.
Haaruun tukwoolaytooh Farꞌuunwa idaabtaayeehwa suurii igid,
aree batuuh kwakwar tiki.
11 Malya Farꞌuun ifagarandeehwa iseharanaawwa waliikiya.
Imasri iseharana han tusehartiisoohna beet toona tookna idꞌiin.
12 Gaalka tukwoolaytooh igid,
aree batuuh kwakwar tiki.
Laakiin Haaruuniit tukwoolay bareeteeh tikwoolaya kasteeh kwat'ita.
13 Farꞌuuniib uuginꞌi laakiin masi yꞌakir.
W'ankwana diyaab iiktiyeet toonaatiit bareeh sinaakiraab kiiki.
Ubooyiit Tunasiibi
14 Malya Wꞌankwana Muusaay dehaay,
<<Far'uuniib uugn'i y'akir.
Baruuh oodehayi giigsiti inriib.
15 Aflaay fajir baruuh Ooniil tikwiiniyihoob barooh miriya.
Tukwoolay kwakwar tikeet geebook yaksaa,
ubhari daraag aree barooh hagita.
16 Malya bariiyooh dehaay,
<Wꞌankwana,
Yꞌibriiyi Ukwaasana barook beeti diigwatiyaheeb,
udehayooh giigsitiniyeet toona sooyi hook.
Aflaay baraah umingaayiib barooh yꞌibid iyadna.
Laakiin oontꞌa ookiik baruuk sinaakiraab kitta.>
idi.
17 Aflaay Wꞌankwana bak indi:
<Ani W'ankwana akatiyeet toona bak rhisi hook andi.>
indi hook.
Ani toon tukwoolay w'ayyu teefeenaatii Ooniili yam iith'a andi.
Aayam aree booy iikti iyadna.
18 Yꞌaashu Ooniiliib eefeen iiyyi iyadna,
aayam winneet dhimiitiit Imasri shaawti yami gwꞌiti adgiri kiidiin.>>
idi.
19 Wꞌankwana Muusaay dehaay,
<<Haaruun tukwoolaytooh yaksiit kasseeh Masreeb eeyam:
ibharaawwa,
ijadwalaawwa,
yhoodhaayi kehiiwwa anbiikeet toona sooya.
Aayam booy iikti iyadna,
kassooh Masreeb whaashiib aree booy daayi indi.
Yhindiyee daamaab ijardalaawwa yꞌaweeyee daamaab igadh'iiwwa han booy iikti iyadna.>>
idi.
20 Malya Muusaawwa Haaruunwa Wꞌankwana sooyaneet toonaatiit idꞌiin.
Far'uunwa idaabtaayeehwa suurii Haaruun tukwoolaytooh yakisiyaayt oobhari yam iithꞌihoob,
aayam kassaah booy iiktiin.
21 Yꞌaashu ubhariib iyaana,
aree aayam winneet idhmiiniit Imasri hooy igwꞌiti adgiraab kiikeen.
Masreeb aree kassuuh uumhiin booy iikti.
22 Malya Imasri iseharana aree tusehartii teen teena teekna idꞌiin.
Wꞌankwana idiyeet toonaatiit Far'uun winneet amaag niyaatiya.
Baruuh Muusaawwa Haaruuniiwwa ibhali sinaakiraab kiiki.
23 Baruuh giigiyaayt tusiraayaatooh beeti yꞌagar,
toon toona tookna han uginꞌooh hooy dꞌiyaab kiiki.
24 Imasri kassaah aree ubhari ginnaaliib gwꞌiini jillaay reet ifaarikna.
Baraah ubharii yami gwꞌiti adgiraab kiikeenayt reet ifaarikna.
Igw'ooyaayeet Tunasiibi
25 Wꞌankwana eeyam iithꞌeenaay har'ii asaramaat yina hasamiyaan.