8
01 Malya Wꞌankwana Muusaay dehaay,
<<Farꞌuun beeti agaraat daayiib sooya,
<Wꞌankwana bak indi hook:
Oodehayu giigsa,
shaawti aneeb yꞌabidneet toona adgireen.
02 Bareeh oogiig tehanbiyeek,
kassooh whaashook gwꞌooyaab iitib andi.
03 Uuniil gwꞌooyaab iittab indi.
Ubharii firꞌatiit tusiraayaatiyook yꞌeen hook.
Ugawiyook reeweetiit unꞌaaliyook shuumi iyadna.
Idaabtaayeekwa udehayeekwa gawaayeeb shuumi iyadna.
Masi baraah ifirmaayeek kehii fafareena,
aree wꞌajiiniit daateeb tatkween.
04 Igwꞌooya kehook fari iyadna,
udehayookwa kasseeh idaabtaayeekwa kehii fafari iyadna.>
diyaa!>>
idi.
05 Malya Wꞌankwana Muusaay dehaay,
<<Haaruun sooya,
<Tukwoolay w'ayyook teefeet asti abika,
ibharaawwa,
tꞌabaateebwa,
Masreeb yhoodhaayi kehiiwwa abika.
Igw'ooya kassooh Masreeb whaashiib asti haay m'aa!>
diyaa!>>
idi.
06 Aflaay Haaruun wꞌayooh Masreeb iyami kehii asti yꞌabikihoob,
igwꞌooya ifir'aniit whaash kassooh itibna.
07 Laakiin iseharana beet toona tꞌiiteena tusehartiisoohna idꞌiin.
Baraah han Masreeb whaashi kehii igwꞌooya asti haay eesiisiyaan.
08 Malya Farꞌuun Muusaawwa Haaruunwa waliikiyaayt,
<<Wꞌankwanaay dehoon hariwna,
aneebwa udehayoowwa igwꞌooya hoon bagiigsi.
Udehayookna giigsi andi,
shaawti Wꞌankwanaay dehaay karaamaat ifarꞌaneet toona adgireen.>>
idi.
09 Muusa Far'uunii dehaay,
<<Ani bariiyook jillaay toosileel winneet hooy afirhani.
Nhoob siileelani?
Ani bariiyook dehaay hooy siileelaniyeet toosꞌa sooyaheeb,
idaabtaayeekwa udehayookwa han dehaay siileeli andi.
Malya barookwa igawaayeekwa igwꞌooya hookna giigi iyadna.
Igw'ooya Ooniiliib oobhaat daayi iyadna.>>
idi.
10 Farꞌuun <<Fajir dehoon siileela.>>
idi.
Muusa aree <<Baruuk harriiweet toona saki andi.
Malya weer ankwana Wꞌankwana Ukwaasanaayoon tꞌiiteeb biihaayeet toona baruuk iikan tindiya.
11 Barookwa,
idaabtaayeekwa,
udehayookwa igwꞌooya hookna giigi iyadna.
Ooniiliib oobhaat daayi iyadna.>>
idi.
12 Muusaawwa Haaruunwa Farꞌuunii giigiyaani har'ii,
Farꞌuuniib idꞌiyeeb igwꞌooyaayi sabbii Muusa Wꞌankwanaay dehaay siileeliya.
13 Aree Wꞌankwana beet Muusa raatiyaneet toona idꞌi.
Igwꞌooya igawaayeebwa,
yhooshaayeebwa,
tidirꞌaateebwa kassaah iyaan.
14 Imasri igwꞌooya yꞌayaab ishaawawiiniit koomaab ikwaasna.
Whaash kassuuh winneet dhimiya baraam itab.
15 Laakiin Farꞌuun tunasiibi giigtaneet toona rhiyanihoob,
masi akra girmaab idꞌi.
Wꞌankwana sooyaab iiktiyeet toonaatiit,
Farꞌuun Muusaawwa Haaruuniiwwa ibhali sinaakiraab kiiki.
Taweegiit Nasiibi
16 Malya Wꞌankwana Muusaay dehaay,
<<Haaruun sooya,
tukwoolaytiisooh whaash baꞌiithꞌa.
Kastooh Masreeb aree ifalfuut taweeg iikti indi.>>
idi.
17 Aflaay baraah bak id'iin.
Haaruun w'ayooh asti y'abikaayt tukwoolaytii whaash ith'ihoob,
Masreeb whaashi falfuut kassuuh taweeg iikti.
Itaweeg oodehaywa ooreewiibwa ibrar.
18 Iseharana han sehartii taweegi d'uuy jarrabiyaana,
laakiin adgiraab kiikeen.
Itaweeg aree oodehaywa ooreewiibwa ibrar.
19 Iseharana Far'uunii dehaay,
<<Toon Ukwaasana idꞌi!>>
idiin.
Laakiin Wꞌankwana idiyeet toonaatiit Far'uun akra girmaab id'i.
Baruuh Muusaawwa Haaruuniiwwa ibhali sinaakiraab kiiki.
Itiifaayeet Nasiibi
20 Malya Wꞌankwana Muusaay dehaay,
<<Fajir karuumaab b'araa!
Far'uun eeyam tikwiiniyihoob bayaat sooya,
<Wꞌankwana bak indi hook:
Aniib oodehay giigsa,
aflaay baraah aneeb yꞌabidneet toona adgireen.
21 Bareeh oogiig tehanbiyeek,
barookwa,
idaabtaayeekwa udehayookwa,
igawaayeekwa tiifaab hookna iifdig andi.
Imasri gawa tiifaab iittab iyadna,
aree baraah hooy ikweerneeb whaash han tiifaab iittab indi.
22 Laakiin been oomb'i Goosheeni haash iiyꞌish andi.
Beentooy aree aniib uudehay ikweernayt,
tiifaab daayi kiidiin.
Aflaay ani Wꞌankwana oon whaashiib eefiyeet toona iikan tindiya.
23 Aniib oodehaywa udehayookwa wawaasi andi.
Tuun tumꞌuujisaateet alaama aree lhayt iikti tindi.>
diyaa!>>
idi.
24 Wꞌankwana gwida tiifa diigwatiya.
Far'uuniit tusraayeewwa idaabtaayeeh igawaawwa tiifaab itabna.
Masreeb whaash kassooh aree itiifa day'iyaan.
25 Malya Far'uun Muusaawwa Haaruunwa waliikiyaayt,
<<Giigaana,
oon whaashiib tooy Ukwaasanaayookna dehaay tikaraama firꞌana.>>
idi.
26 Laakiin Muusa,
<<Tooy tikaraamaati firꞌi daayiib kiiki.
Wꞌankwana Ukwaasanaayoon dehaay nifarꞌeet tikaraama Imasri eeribna.
Imasri eeribneet karaama tooy nifarꞌeek,
baraah rajamooyi hoon kiidiin han?
27 Wꞌankwana Ukwaasanaayoon dehaay karaamaat nifarꞌee dehaay ibakii mhay imbꞌi umingaayiib iibaabnayeet toonaati.
Beet toona W'ankwana sooya hoon.>>
idi.
28 Whadꞌa <<Wꞌankwana Ukwaasanaayookna dehaay umingaayiib tikaraama tifarꞌani jillaay giigsi hookna andi.
Laakiin baraak ibakii baasigiina.
Oont'a anii dehaay siileelaana.>>
idi.
29 Muusa <<Ani willa hook giiganiyihoob,
W'ankwanaay dehaay siileeli andi.
Itiifa lhayt Far'uunwa idaabtaayeehwa udehayiisoohwa giigi iyadna.
Laakiin Far'uun ibakii masi biitaliis hoon,
oodehay Wꞌankwanaay dehaay karaamaati firꞌati jillaay oogiig biihabi.>>
idi.