Ureewiit Yat
9
Malya Wꞌankwana Muusaay dehaay,
<<Far'uun bayaat sooya:
<Wꞌankwana Yꞌibriiyi Ukwaasana bak indi:
Aniib oodehay fidga dꞌiya,
aflaay baraah aneeb yꞌibid iyadna.
2 Masi bareeh oogiig tehanbiyeek,
aree har'a t'anfiyeek,
3 kassooh ureewook tidir'aateeb eefeen,
yhataywa,
eemakwa,
eekamwa,
eeshꞌaawwa,
tꞌanoowwa,
teeyaawwa amaagt lhanaaytii th'atiit jasaayi hook andi.
4 Laakiin Yꞌisraaꞌiili reewwa Imasri reewwa aree wawaasi andi.
Aflaay Yꞌisraaꞌiili reewii naat han iiyyi kitdi.
5 Ani Wꞌankwana,
lhayt whaashiib toon toona iikwasi andi.>
diyaa!>>
idi.
6 Tooyin tooraaw aree Wꞌankwana toona tisooyaab iiktiyeet idꞌi.
Imasriiyi reew kassuuh iya.
Laakiin Yꞌisraaꞌiili reew naat han hooy ayaat kitti.
7 Far'uun naan tikayeeb raatiya,
aree Yꞌisraaꞌiili reewii naat han hooy ayaat bitkaayeet toona soomamiya.
Laakiin baruuh akra gin'iibuuyt aree oodehay giigsaab kiiki.
Galooyt Lhanaayt
8 Malya Wꞌankwana Muusaawwa Haaruunii dehaaywa,
<<Kaanuunii shalik nꞌeetihaash yaksaana,
Muusa Far'uuni suurii ubaraamiib baꞌiigid.
9 Been unꞌeetihaash nꞌakw falfuut akeetiit aree kassooh Masreeb whaashi kehii itbrir indi.
Kassooh whaashiib uudehaywa uureewwa kwindhibiyaat iikti iyadna.>>
idi.
10 Aflaay baraah ukaanuunii shalik nꞌeetihaash yakisiyaaniit Far'uuni suurii ingadna.
Muusa unꞌeetihaash ubaraamiib isbid,
beet tuuna aree oodehaywa ooreewi kehiiwwa kwindhibiyaat tiki.
11 Iseharanaawwa kassaah Imasriiwwa kwindhibiyaat ikeenayt,
baraah Muusaay suurii imingid adgiraab kiikeen.
12 Laakiin Wꞌankwana Far'uuniib igirma is'akir.
Wꞌankwana suur diyaab iiktiyeet toonaatiit,
Far'uun Muusaawwa Haaruunwa sinaakiraab kiiki.
Talji Aweeyeet Nasiibi
13 Malya Wꞌankwana Muusaay dehaay,
<<Fajir karuumaab Far'uun miriyaat sooya,
<Wꞌankwana Yꞌibriiyi Ukwaasana bak indi:
Aniib oodehay giigsa.
Aflaay baraah aneeb yꞌibid iyadna.
14 Oon oodoor aree ani idaabtaayeekwa udehayookwa eebhat jasaayi kaadi.
Laakiin barook han jasaayi hook andi.
Shaawti baruuk kastooh tuduniyaatiib aneeb tꞌiiti biihaayeet toona iikan tindiya.
15 Ani barookwa udehayyookwa kehii wꞌayi fidhidhtiit lhanaaytii iithꞌeek,
baraakna tubuutii winneet kwidhtiina.
16 Laakiin ani yꞌakriri rhisaniyook jillaay ay'ish hook.
Aflaay aniib aafaal kastooh tubuutiib itbariirni jillaay ay'ish hook.
17 Baruuk masi atoorbiib tikaayt aniib oodehay oogiig tehabiya.
18 Aflaay lhayt oon oodoor,
suuree amsi ookiik door han Masreeb dhibaab baakaay akra talji baraam yaksi andi.
19 Oontꞌa sooya,
ureewookwa tudir'aatiib tibariyeena kastoohwa makwaati mhiin simarriya.
Makwaatiib baahaay oodehaywa ooreewwa kehii aree talji inbi dhadhibi iyadna,
kassaah aree iiyyi iyadna.>
diyaa!>>
idi.
20 Baliin Far'uuniib idaabta W'ankwanaay ibhali irkwiiniit,
ikishiyaayeehwa ureewoohwa makwaati mhiin shashuumisiyaan.
21 Laakiin baliin aaraw Wꞌankwanaay ibhali sinaakiraab baakay,
ikishiyaayeehwa ureewoohwa aree tidir'aateeb yꞌishna.
22 Malya Wꞌankwana Muusaay dehaay,
<<Wꞌayook teebri beeti fidhidha,
kassooh Masreeb whaashiib aree inbi dhadhibi iyadna.
Oodehayi kehiiwwa,
ooreewi kehiiwwa,
kasseeh yhindi tidirꞌaateeb eefeennaayi kehiiwwa inbi dhadhibi iyadna.>>
idi.
23 Aflaay Muusa wꞌayooh teebri beeti ifdhidhihoob,
Wꞌankwana huudtwa inbiibwa thiwaatwa diigwatiya.
Tithiwa whaash ith'ana.
Aflaay W'ankwana Masreeb whaashi kehii talij isiisiyaam.
24 Wꞌankwana akra talji baraam diigwatiya,
aree utalaw gidehoohwa dasoohwa kehii talawiya.
Kassooh Masreeb utaariikhiib oon barooh t'iiti akra baraam akaab kiiki.
25 Kastooh Masreeb aree uun ubaraam tidir'aateeb tiifiinaaka ithꞌa,
kassooh oodehaywa ooreewwa han ithꞌa.
Tidirꞌaateeb kassooh idaruur day'iya,
kasseeh yhindi aree katꞌiya.
26 Goosheeni haash Yꞌisraaꞌiili hooy ikwiirneeb oobhaat utalij kehii dhadhibaab kiiki.
27 Malya Far'uun Muusaawwa Haaruunwa waliikisiyaayt,
<<Oon oodoor ani danuub akwaas,
Wꞌankwana sidkiibu,
aree aneebwa udehayuuwwa amaag neefi.
28 Aflaay toon toothiwwa yꞌinbiiwwa hoon guudiyaanayt,
Wꞌankwana hoon isingiideet toona siileelaana.
Ani giigsi hookna andi,
shaawti tooy baasꞌana.>>
idi.
29 Muusa igwibi <<Ani tumadiinaatii willa giiganiyihoob,
W'ankwanaay dehaay siileeltiib yꞌayi asti ibik andi.
Tuuthiw ingid tindi,
inbi han shaawti daayi kiidiin.
Aflaay tuubuut Wꞌankwanaayt tikatiyeet toona baraak iikan tiyadna.
30 Laakiin baruukwa idaabtaayaakwa Wꞌankwana Ukwaasana bitrakwiineet toona akteen.>>
idi.
31 Wharroowwa ibiltuuwwa katꞌamiyaan.
Ibiltu gangaraab yakisaabuuyt kat'amiya,
aree wharru fuutiitaabuuyt kat'amiya.
32 Laakiin igamhi malya ibshakwuuyt katꞌamaab kiiki.
33 Muusa Far'uun yꞌish idꞌiit,
tumadiinaatii giigiya.
Wꞌayooh asti yꞌabikaayt aree Wꞌankwanaay dehaay siileeliya.
Tuuthiwwa,
yꞌinbiiwwa,
uubreewwa kassaah ingadna.
34 Far'uun uubreewwa,
y'inbiiwwa,
tuuthiwwa ingadneet toona rhiyanihoob,
masi danuub ikwaas.
Baruuhwa idaabtaayaahwa masi akra girmaayaana.
35 Aflaay Far'uun akra girmaaya,
aree Y'israa'iili oogiig yhabi.
Wꞌankwana Muusaay geebii sooyaab iiktiyeet tuuna tiki.