Yaaweeteet Nasiibi
10
Malya Wꞌankwana Muusaay dehaay,
<<Difa,
Far'uun bayaa.
Ani baroohwa idaabtaayeehwa akra girmaasanayt,
aflaay teen timꞌuujisa bareeyooh bitik iikwasi andi.
2 Shaawti ani teen timꞌuujisa akwaasiit Imasri kak amaag aweereet toona baraak yꞌareekwa yꞌareeyeekna arwa sooyi tiyadna.
Aflaay ani Wꞌankwana akatiyeet toona iikan tiyadna.>>
idi.
3 Aflaay Muusaawwa Haaruunwa Far'uun ibeeniit bariiyooh dehaay,
<<Yꞌibriiyi Ukwaasana bak indi:
<Aniib ibhali naadoor ookiik aniib ibhaliyeet sinaakirooy iirib tiyadna?
Aniib oodehay giigsaana.
Aflaay baraah aneeb yꞌibid iyadna.
4 Masi soorarimti teeribneek,
lhayt whaashiyookna yaaweet iifdig andi.
5 Tiyaawi winneet gwidaata,
aree whaash kassooh eetibna.
Yꞌinbi ishaab ikatiineeb ibaagi aree tami iyadna.
Tidir'aateeb mhiyaab yhindi kasseeh han tami iyadna.
6 Bataah tisraayaateekwa kasseeh idaabtaayeek gawaawwa kassooh udehayookwa iitib iyadna.
Baabaakna tari hoobaakna oon whaashiib ikwiriineekka amsi ookiik masi rhaab biikaayneena iikti iyadna.>
indi.>>
idiin.
Malya Muusa ifdin giigiya.
7 Far'uuniib idaabta bariiyooh dehaay,
<<Uun uutak naadoor ookiik sharak kehoon iikti indi?
Yꞌisraaꞌiili dehay giigsa,
aflaay baraah Wꞌankwana Ukwaasanaayoohna yꞌibid iyadna.
Masir day'amtaneet toona karhita han?>>
idiin.
8 Aflaay Muusaawwa Haaruunwa whadꞌa beeti waliikamiyaan.
Far'uun bareeyooh dehaay,
<<Difnaat Wꞌankwana Ukwaasanaayookna abidna.
Laakiin aaw giigi indi?>>
idi.
9 Malya Muusa igwibi,
<<Hinin y'areenwa t'arteeyoon geebwa,
yꞌeegrimaayeen geebwa kassaan giigi niyad.
Tꞌanooteenwa tiyaateenwa,
eeshꞌeenwa yakseetiit ibakii Wꞌankwana dehaay w'iid niikwasi niyad.>>
idi.
10 Far'uun <<Ani Wꞌankwanaay halafooyan,
baraak yꞌareekwa timꞌateekwa haay giigsi hookna kaadi.
Baraak maagt teekwinneet tuuna lawaati.
11 Abadan,
beet toona tehariwneek,
aanda aabhat diftiit Wꞌankwana bay'ibidna.>>
idi.
Malya Far'uun Muusaawwa Haaruunwa giigisiya.
12 Malya Wꞌankwana Muusaay dehaay,
<<Masreeb whaashi kehii wꞌayook fidhidha.
Aflaay tiyaawi yꞌeetiit tidir'aateeb yaktiniina kastooh tami iyadna,
yꞌinbiyee mhiyaat teena kasteeh tami iyadna.>>
idi.
13 Aflaay Muusa tukwoolaytooh Masri kehii ifidhidh.
Wꞌankwana uyintalawii baraam yakisiyaayt whaashi kehii kassooh whawaadwa oombꞌeewwa infi.
Fajir aree ubaraam tiyaawi haay eeya.
14 Gwidaat yaawi eeyaaniit kassooh whaashi kehii ibrarna.
Teen tiyaaweeti haddiit yaawi aree suur lawaat kiikeena,
masi han lawi kiidiin.
15 Whaash yaaweetee yhadaal,
yhindiyi kehiiwwa tidirꞌaateewwa mhiyaana kastooh tamiyaan.
Kastooh Masreeb whaashiib aree hindiib tari fuutiit sootaayt han mhiyaat kitti.
16 Malya Far'uun willa Muusaawwa Haaruunwa waliikiyaayt,
<<Ani Wꞌankwana Ukwaasanaayookwa bareeyookwa kehii danuub akwaas.
17 Oontꞌa een aniib idanuub masi afooyaanheeb,
Wꞌankwana Ukwaasanaayookna dehaay siileelaanaat toon tunasiibi tumadoor hoosu giigsaana.>>
idi.
18 Muusa Far'uunii giigiyaayt,
Wꞌankwanaay dehaay siileeliya.
19 Wꞌankwana aree ubaraam winneet akra yindhibi baraam ikwaasiit,
tiyaawi Oobhar W'adaru ookiik infi.
Kastooh Masreeb aree yaaweet gaat han mhiyaat kitti.
20 Laakiin Wꞌankwana Far'uun akra girmaasiya.
Baruuh Yꞌisraaꞌiili giigsaab kiiki.
Thibniit Nasiibi
21 Malya Wꞌankwana Muusaay dehaay,
<<Wꞌayook teebri beeti abikaa.
Aflaay Masreeb whaash aree akraat thibin hooy itbirir tindi.>>
idi.
22 Aflaay Muusa wꞌayooh teebri beeti yꞌabik,
kastooh Masreeb aree mhay bꞌi thibin laabuus iikti.
23 Imasri taktak irhiti adgiraab kiikeena,
oodoor beeb aree gaal han ugawooh ishaab kiiki.
Laakiin Yꞌisraaꞌiili ikwiirneeb oomhiin nuur iifi.
24 Far'uun Muusaab waliikiyaayt,
<<Difnaat Wꞌankwana abidna,
timꞌateekwa yꞌareekwa han geebookna haay giigaana.
Laakiin tꞌanooteekwa,
tiyaateekwa,
eeshꞌeekwa eebhat ishna.>>
idi.
25 Laakiin Muusa,
<<Aflaay baruuk ibakii karaamaati reew iyaaw hoon tindiya,
Wꞌankwana Ukwaasanaayoon dehaay nifarꞌeet atoolwaat karaama iyaaw hoon tindiya.
26 Abadan,
ureewuun han ibakii geeboon giigi indi,
gaat han harꞌoon niiyꞌish kindi.
Wꞌankwana Ukwaasanaayoon dehaay ibaadaateeb nifarꞌeeb ooreew hinin iknaayaan ibakii waasi niyad.
Beentooy nikatmeeb ookiik aree naan nifarꞌeeb kinkan.>>
idi.
27 Laakiin Wꞌankwana Far'uun akra girmaasiya.
Baruuh Yꞌisraaꞌiili giigsaab kiiki.
28 Far'uun Muusaay dehaay,
<<Anii suuriisii hantaaya!
Shaawti door han baarhamaaheeb.
Oombꞌi aniib eefiir rhitiniyeeb,
iiyyi tindiya.>>
idi.
29 Muusa igwibi,
<<Sidkiibwa,
shaawti door han ifiireek rhi kaadi.>>
idi.