Oofiraay Isuurkinaayeet Nasiibi
11
01 Malya Wꞌankwana Muusaay dehaay,
<<Farꞌuunwa Masreeb whaashwa masi weet nasiibeetii iith'a andi.
Beenaay harꞌii,
Farꞌuun oon whaashii giigsi hookna indi.
Aree bak sakiiniyihoob,
baruuh winneet fidnaab isaakw hookna indi.
2 Kassooh oodehay sooyaana,
eendaawwa teem'atwa han sooyaana,
ishawweehna ashteetwa dim'araaywa gadh'i hooy yhariwneet toonaati.>>
idi.
3 W'ankwana Imasri Y'israa'iili hamooyseen ikwaas.
Far'uunwa idaabtaayaahwa kassuuh uudehaywa Muusaab ookna winneet isoowinna.
04 Aflaay Muusa Farꞌuunii dehaay,
<<Wꞌankwana bak indi:
<Amsi whawaadi tarabeeb Masreeb whaashi bitikii hasami andi.
05 Masreeb udehayiib yꞌar isuurkina kassaah iiyyi iyadna.
Farꞌuuniib wꞌoor usuurkinaay tehadꞌaayeetiib eefeenaay badooyiit,
wharru huugtiniit Farꞌuuniit tukishiyaati oor usuurkina han iiyyi indi.
Masi kassooh ooreewi firaay isuurkina iiyyi iyadna.
06 Masreeb whaashiib akra aadhti iikti indi.
Uun wꞌaadhti suur masi gaal han maaswaab biikaayeeb,
harꞌook han itmissiw baadiib iikti indi.
07 Laakiin Yꞌisraaꞌiili bitik yaas udehayiib tari ureewiib hawiini han hooy daayi kiidi.>
indi.
Malya Wꞌankwana Imasriiwwa Yꞌisraaꞌiiliiwwa taktakee waasiiniyeet toona iikan tiyadna.
08 Aan idaabtaayaak kassaah anii dehaay yꞌeetiit anii suurii kuuramiit,
<Baruukwa kassuuh uudehay barook eetriimwa giigaana.>
iyaad iyadna.
Beenaay har'ii ani giigi andi.>>
idi.
Malya Muusa winneet gadabaa Far'uunii giigiya.