12
01 Wꞌankwana Muusaawwa Haaruunwa Masreeb bhaliisamiya:
02 <<Uun uutrig whawli tirig wꞌawwaliib dehookna ikati.
03 Een ibhali kasseeh Yꞌisraaꞌiili dehay sooyaana.
Oon utirgiit tamnaatiib takka ibakii hoob tari ab indhiwaayeeh dehaay iniin.
04 Indhiwaayaah shiliktiit kassooh wꞌargin biitamayneek,
baruuh ibakii ushawwooh im'adhiidh.
Beentooy eefeen oodehayi adadeeb ikatiyeet toonaati.
Nafar gaalka tamiiniyeet toona kantiit naaka argini atehariwaab ikatiineet toona tikteenna.
05 Ooreew iwaasteeneeb aree ibakii hawil ibariib ikati,
aree rabaab gwihaab baabariib ikati.
Bareeh aree tꞌanootee tari tiyaatee tiyayneet toona adgirteena.
06 Oon ooreew iwaasamaab oon utirgiit tamna fadhigaatiit himni ookiik daayiib abikna.
Malya Israaꞌiileeb oodehayi majlis kassuuh been ooreew himniit yheeriidna.
07 Malya oobooy yakseetiit tikaraama hooy tameeneeb igawaayi darageebwa,
idheefaayi hindiyi kehiiwwa yheetna.
08 Been whawaad ookna toosha nꞌeeti kehii asaleeneet toonaati.
Malya sootaayt hamiit salataatwa fitra hadhiyeewwa tameeneet toonaati.
09 Bashikwt baakaayt tari yameeb takwaayt toosha baatamaana.
Laakiin kassooh ooreew wharaad igirmaawwa,
iragadaawwa,
tehooywa ibakii nꞌeeti kehii asalaana.
10 Tooyin tooraaw ookiik naat han hooy baaꞌiishna.
Fajir ookiik naat han hooy timhi ikatiyeek beet toona ibakii liwna.
11 Bak aree tamaana:
willa tamaana,
daayiib shoonamaana,
tigidhꞌaateekna shabna,
ukwoolayookna wꞌayyookna abikna.
Uun baruuh Wꞌankwanaay Whasamti Iid ikati.
12 Been whawaad Masreeb whaashii hasami andi,
yꞌar isuurkina idaar andi,
ooreewi firaay isuurkina irabaab han idaar andi.
Masreeb isanama kasseeh hukwim kehii iikwasi andi.
Ani Wꞌankwana akati!
13 Laakiin uubooy igawaayi dheefaayi kehii eefeeb alaamaat iikti indi.
Igawa baraakna hooy teefeeneeb sooyeent alaamaata.
Oobooy rhaniyeeb oodoor,
hasami hookna andi.
Masreeb whaash anthꞌihoob,
tuun tuyattiit nasiibi iiktim hookna kitdi.
14 Oon oombꞌi ibakii shꞌiteena,
hawilka taas taasii ibakii Wꞌankwanaay w'iidiit afirhiteeneet toonaati.
Uun baruuh kassoohoob farid ikati.
15 Asaramaat yina ookiik ibakii fitra hadhi tamteena.
Wꞌiidi b'i w'awwaliib hamiir akaanaaka igawaayeesookna firꞌana.
Wꞌiidiit yina tꞌasaramaateeb hamiirii daama hadhi tamiiniibka Israaꞌiili dehayii itkitꞌa indi.
16 W'iidi bꞌi w'awwaliib mugaddas majlis d'iina,
masi oombꞌi wꞌasaramaay han mugaddas majlis d'iina.
Een imbꞌeeyeeb mꞌariiti tikwuuy nuun shagaab weer naat han baashagaamana.
17 Oon ufatiiri iid iidaana,
oon oombꞌi ooknaay ani tigabiilaateekna Masreeb whaashii asfar'a akay beet toona shꞌasiini hookna.
Uun wꞌiid whaggii abkaayookna,
taas taasii aree iidaana.
18 Ootrig w'awwaliib tutamna fadhigaatiit himniitii,
tutagwgwu gwiraatiit himni ookiik yhadhi itamteeni ibakii fatiir ikatiineet toonaati.
19 Baliin eembꞌi yꞌasarama igawaayeekna hamiir han hooy biidaayayeet toonaati.
Hamiiri hadhi tamiiniibka girbaab ikatiyeek tari whaashi tak,
ibakii Israa'iileeb oodehayii itkit'a indi.
20 Hamraanaaytii daamaana han baatamaana.
Tikweerni mhiiniika ibakii fitra hadhi tamaana.>>
idi.
21 Malya Muusa kasseeh Yꞌisraaꞌiili suurkina waliikiyaayt,
<<Gaalhoob difnaat,
indhiwaayeekna dehaay reew waasaana,
aree Whasamti iidi argin haridna.
22 Hindi lꞌiid yaksaanaat,
utashiib eefeeb ubooyiib amisna.
Idheefaayi hindi kehiiwwa mhalleeh idaragi kehiiwwa aree shalik booy safaana.
Fajir ookiik aree gaal han ugawiyookna dheefa baahasamaana.
23 Wꞌankwana Imasri haash inthꞌee dehaay giigiiniyihoob,
been oobooy idheefaayi hindi kehiiwwa idaragi kehiiwwa eefeeb rheetiit been udheefa hasami indi.
Ukwidhsana aree igawaayeekna shuumsiit ishuuthꞌa hookna kiidi.
24 Baraakwa yꞌaraakwa aree een ibhali diimaab sinaakirnaat haay shagaamaana.
25 Whaash Wꞌankwana waadiyaayaayt iyaaw hookna indiyeeb shuumteenihoob,
oon w'iid diimaab iidaana.
26 Yꞌaraakna bareekna raateenihoob,
<Uun w'iid naan dehookna ikati?>
iyadneek,
27 bareeh sooyaana,
<Tuun tuuna Wꞌankwanaay Whasamti Wꞌiidiit karaamaata.
Baruuh Imasri ithꞌihoob,
Masreeb iifiin Yꞌisraaꞌiilaayi gawa hasamiyaayt,
igawaayeen ishidhhan.>
diina.>>
idi.
Malya uudehay n'ati kuuramiyaaniit asjidiyaan.
28 Aflaay Israaꞌiili dehay Wꞌankwana Muusaawwa Haaruuni geebiiwwa sooyaneet toona idꞌiin.
29 Been whawaadi tarabeeb,
Wꞌankwana kasseeh yꞌar isuurkina Masreeb whaashiib idaar.
Farꞌuuniib wꞌoor usuurkina tehadꞌaayeetiib iifiinaay,
whabsiib iifiib w'abuuki oor usuurkina ookiik idaar.
Masi ooreewi firaayi suurkina han kassaah itoodaarna.
30 Farꞌuunwa kassaah idaabtaayaahwa kassuuh Masreeb uudehaywa whawaadiib ibꞌarna.
Kastooh Masreeb whaashiib aree akra aadhti itmassaaw.
Gaw gaal han hooy ayaab biikaayeeb daayaab kiiki.
Y'israa'iili Masree Giigiyaana
31 Farꞌuun Muusaawwa Haaruunii dehaaywa whawaadiib diigwatiyaayt,
<<Firꞌana!
Udehayu ishnaat,
Yꞌisraaꞌiili eeraw geebookna haay giigaana!
Difna,
toona tutehariwneet t'iiteena Wꞌankwana abidna!
32 Toona tutidiineet t'iiteena,
t'anooteekwa,
tiyaateekwa,
eesh'eekwa yaksaanaat giigaana.
Difna!
Laakiin giigteenihoob deharnaheeb.>>
idi.
33 Imasri oodehay willa whaashii giigeeneet toona hooy yhariwna.
Baraah <<Baraak bitgiigayneek hinin kassaan iiyyi niyad.>>
idiin.
34 Aflaay uudehay wꞌajiinoohna hamiir hooy baashaaw yakisiyaan.
Yharkaayeehna kehii ifyakna,
wꞌajiin hooy yhithikneet teeda han halakaayeeb ikaasisna.
35 Yꞌisraaꞌiili Muusa sooyaneet toona idꞌiina,
gwida gadh'i ashteetiibwa dimꞌaraaywa halakaabwa Imasriyee yhariwna.
36 Wꞌankwana Imasri oodehay hamooyseen ikwaas.
Baraah hooy yhariwneet toona yhiina.
Aflaay Yꞌisraaꞌiili Imasri isaalibna.
37 Yꞌisraaꞌiili Ramsiisee Sukkoot ookiik ragadaayee iibaabiyaan.
Asagwir shi alfaab iiktiin da iifiina,
taamꞌatwa inisrikaawwa hooy hasab kiikeen.
38 Gwida dehay wari han geeb giigiyaana,
gwidaat yaatwa,
anootwa,
shꞌaab han geeboohna haay giigiyaan.
39 Wꞌajiin baraah Masree haay eeyaaneeb,
fitra hadhiyee aree keek idꞌiin.
Baraah Masree iskweenayt wꞌajiin hamraab kiiki,
igarooyoohna dehaay mꞌariit haay isuumirni daman aree miraab kiikeen.
40 Beenhoob Yꞌisraaꞌiili Masreeb ikwiirneeb idaman fadhig sheewwa mhay tamuunwa hawla iiktiin.
41 Been ifadhig sheewwa imhay tamuunwa hawla agiyaamiyaanihoob,
kastaah Wꞌankwanaay udehayiit tigabiila Masree ifrꞌana.
42 Wꞌankwana been whawaad bareeh Masree iifirꞌeet toona igwꞌad.
Oon whawaad aree kassaah Yꞌisraaꞌiili Wꞌankwanaay hamooysitiib eegwꞌadneet toonaati.
Harꞌook yꞌiiniib uutaas han beet toona saki indi.
Whasamti Wꞌiidi Hag
43 Wꞌankwana Muusaawwa Haaruunii dehaaywa,
<<Aan baraah wꞌiidi hag ikatiina:
uudehay igirba hooy tami kiidiin.
44 Baraak dilbi ahaab tikatiineeb ikishiya kwishibtiit harꞌii hooy tameeneet toona adgireen.
45 Laakiin shalik doori w'iibaabkinaawwa ukiraaykinaawwa hooy tami kiidiin.
46 Ibakii gaal gawiit tehooyteeb tamamiini,
ugawii barraab aree toosha baamhalaana.
Miitaat gaat han baakitꞌana.
47 Kassaah Yꞌisraaꞌiili ibakii oon w'iid iideeneet toonaati.
48 Girba tak geebookna kwarriib Wꞌankwanaay wꞌiid iidtiib harriiweek,
baruuh ibakii udehayyooh eefeen irabaab kwanshiibeet toonaati.
Malya barooh whaashiib faraay ootakiit tishabibneet toonaati.
Kwashaab baakaay tak hooy katamiya.
49 Uun whag uukna whaashi dehaywa igirba igeebookna ikweerwa kasseekna mitiyaayiini.>>
idi.