13
01 Wꞌankwana Muusaay dehaay,
02 <<Irabaab awwal faray kasseeh aneeb jabꞌaaheeb.
Yꞌisraaꞌiileeb y'ar isuurkina aniib ikatiin.
Ooreew tari oodehay ikatiyeek han w'awwal firaay aniib ikatiin.>>
idi.
03 Malya Muusa oodehayii dehaay,
<<Oon oombꞌi shꞌaana.
Masree hooy tifirꞌaneeb oombꞌi,
tikishiyaayti haashii tifrꞌana.
Wꞌankwanaay wꞌayi wꞌakra aree isfarꞌa hookna.
Hamiir hooy eefiyeena baatamaana.
04 Amsi baraakna ootrig Abiibiib giigteena.
05 Wꞌankwana Kanꞌaani haashwa Yhiittaayiiwwa,
Yꞌamooraawwa,
Yhiiwiiwwa,
Yaabuusiiwwa haash hoobeekna miyaaw waadiyaayaneeb bareekna shuumsiiniyihoob,
ibakii oon w'iid oon utirgiib iidaana.
Been whaash aatwa awitwa kwaaniini.
06 Asaramaat yina hadhiib hamiir anu tamaana,
tooyin tꞌasarama Wꞌankwanaay dehaay w'iid iidaana.
07 Een eembꞌi yꞌasarama fitra hadhi tamaana.
Eebtikeekna aree hamiir naat han biidaayayeet toonaati.
Whaashiyookna ibakii ikati mhiin han hamiir kadaaya.
08 Been oombꞌi w'oorook sooya,
<Ani toon toona sakaniyeeb usabab aree Wꞌankwana ani Masree afirꞌihoob dehoon dꞌiyaabi.>
diyaa!
09 Uun ufarid w'ayyook kehii tari tubiitiitiyook kehii teefeena shꞌastiniit alaama ikati,
aree W'ankwanaay whag allamtiniyeet toona sh'asiini hook.
Wꞌankwana bareekna wꞌayooh wꞌakraanaay haay isfar'a hookna.
10 Oon w'iid hawilka ibakii idamaneeyooh iidaana.
11 Wꞌankwana Kanꞌaani haash shuumsiit hookna barooh iyaaw hookna indi.
Bareekwa hoobeekwa aree oon whaashi miyaaw suur halafooytii dehookna waadiyaaya.
12 Baraak w'awwal firaay irabaab ibakii Wꞌankwana tiyawna.
Ureewiyookna w'awwal firaay irabaab kassaah Wꞌankwanaay ikatiin.
13 Laakiin imaki w'awwal firaay irabaani mhiin ibakii argin dehaay kwisiina.
Laakiin barooh dehaay bitkwasiineek,
tꞌala kitꞌana.
Baraak y'areekna isuurkina ibakii dilibti tiyayna.
14 Harꞌook yꞌiiniib udamaaniib,
yꞌaraakna raateenihoob,
<Tuun naan mitiyaatini?>
iyadneek,
bareeh sooyaana,
<Wꞌankwana wꞌayooh wꞌakraanaay Masir tookshuushti haashii isfarꞌa hoon.
15 Farꞌuun amaag niyaab id'iit hinin oogiig yhabiyihoob,
Wꞌankwana Masreeb y'ar isuurkina kasseeh idaar,
ooreewi awwal firaay han idaar.
Oon usabbii aree hinin ooreewi awwal firaay Wꞌankwanaay dehaay karramamanay.
Laakiin yꞌareen isuurkina dilibti niyay.>
diina.
16 Tuun tuuna aree wꞌayyook kehii t'alaamaatiit tikati,
tubiitiitiyook kehii t'alaamaatiit tikati.
Wꞌankwana Masree wꞌayooh wꞌakraanaay haay eeya hoon.>>
idi.
Oobhari Kitꞌi
17 Farꞌuun oodehay giigisiyanihoob,
Ukwaasana bareeh Falastiini haash eebiib usalal sꞌabkaab kiiki.
Been usalal nakashkaab iiktiyeek han,
laakiin bareeh sꞌabkaab kiiki.
Ukwaasana <<Baraah finaab finaasameenihoob,
mikirtiit Masir beeti itꞌagiirneet toona kaahariw.>>
idi.
18 Aflaay Ukwaasana oobhar wꞌadarooy umingaayi salalii bareeh haay giigiya.
Yꞌisraaꞌiili oofinaay dehaay imarniit Masree giigiyaan.
19 Muusa Yuusifiit timiitat geebooh haay giigiya.
Yuusif Yꞌisraaꞌiili ar suur halafoosaabu,
<<Ukwaasana sidik yꞌiit iishtam hookna indi.
Beenhoob,
aniit timiitat oon whaashii ibakii geebookna haay giigaana.>>
diyaabi.
20 Baraah Sukkooti haashii giigiyaaniit Eetaam umingaayi ginnaaliib kookiyaan.
21 Wꞌankwana oombꞌi bꞌaluuki aamuudii bareeyooh suurii saki,
aree usalal mitiyaayi.
Whawaad aree nꞌeeti aamuud dehaay buubsi.
Aflaay baraah whawaadwa oomb'eewwa iibaabiyaan.
22 Masi Wꞌankwana ibꞌaluuki aamuud tari tunꞌeeti aamuud umhiiniisooh oodehayi suuriisii hantaaysaab kiiki.