14
01 Malya Wꞌankwana Muusaay dehaay,
02 <<Yꞌisraaꞌiili sooya,
baraah agartiit Hiirooti daraag,
Majdalwa oobharwa eebtik kookeeneet toona sooya.
Baraah ubhari dar,
Ba'al Safuuni fiireeb kookeeneet toonaati.
03 Farꞌuun iikwin indi,
<Yꞌisraaꞌiili whaashiib eedwaanamiyaaniit diinanooyeena,
umingaayiib aree tabaka.>
indi.
04 Ani Farꞌuun akra girmaasi andi.
Baruuh bareeh iinkab indi.
Laakiin Farꞌuunwa kassooh udheeshiisoohwa,
ani uknaayu matuun imaar andi.
Imasri aree ani Wꞌankwana akatiyeet toona iikan iyadna.>>
idi.
Aflaay Yꞌisraaꞌiili toon toona idꞌiin.
05 Masreeb whad'a uudehay ifoorneet toona soomamiyanihoob,
Farꞌuunwa idaabtaayaahwa ibhaliyeehna ibdilna,
<<Naan nigwibib?
Yꞌisraaꞌiili nifdig.
Baraah shaawti kishiyaami hoon kiidiin.>>
idiin.
06 Aflaay Farꞌuun utanbiilooh isoomiraayt udheeshooh geebooh yakisiya.
07 Baruuh asagwir shi Masreeb hooy daayikaab itanbil yakisiya,
masi wari tanbil han yakisiya.
Idaabta kasseeh itanbili kehii is'am.
08 W'ankwana Farꞌuun Masreeb whadꞌaay girma is'akir.
Aflaay baruuh gw'agwa taadii sakiin Yꞌisraaꞌiilaayi harꞌii dhaabiya.
09 Imasri kasseeh Farꞌuuniib yhataywa itanbilwa,
yhatay oomanaawwa,
uudheeshwa geeb haayee Y'israa'iili inaakibna.
Yꞌisraaꞌiili Ba'al Safuuni fiireeb tiifiit Hiirooti daraag kookiyaaneet midda,
Imasri bareeh inaakibna.
10 Farꞌuun idwil.
Yꞌisraaꞌiili ishbibnihoob,
whad'a udheeshiisooh bareeh beeti sakee rhiyaan.
Baraah winneet irkwiiniit shamaamti harawaay Wꞌankwanaay dehaay waawiyaan.
11 Baraah Muusaay dehaay,
<<Oon umingaayiib tuyatii dehaay naanhooy haay eeta hoon?
Masreeb miimashaab kiihaayna han?
Kak tiweera hoon?
Masree naanhooy tisfarꞌa hoon?
12 Masreeb niifiyi door tuun tuuna dehoon tikatiyeet toona sooyaayeek kinki han?
Hinin <Isha hoon!
Imasri kishiya niikati.
Umingaayiib tooyatiika Masreeb kishiyaab nikatiyeet tuuna hayiskaati!>
nidi hook!>>
idiin.
13 Muusa oodehayii dehaay igwibi,
<<Baarakwiina!
Akirnaat gadna,
amsi Wꞌankwana ishidhhin hookna indiyeet toona rhi tiyadna.
Imasri amsi rhiteeneeb shaawti rhi kitdiina.
14 Wꞌankwana uukna dehookna finaayi indi.
Baraakna tim akeena.>>
idi.
15 Malya Wꞌankwana Muusaay dehaay,
<<Anii dehaay naanhooy waawtiniya?
Yꞌisraaꞌiili hantaayeeneet toona sooya.
16 Tukwoolaytook asti abikaa,
aayam itꞌadhiidhni jillaay w'ayook oobhari kehii fidhidha.
Aflaay Yꞌisraaꞌiili ubhariib balama haashiib saki iyadna.
17 Ani Imasri girma isꞌikir andi.
Aflaay baraah Y'israa'iilaayi harꞌii saki iyadna.
Farꞌuunwa kassooh udheeshiisoohwa,
itanbileesoohwa,
yhatayi oomanaayi geebiiwwa ani matuun imaar andi.
18 Ani Farꞌuunwa itanbileehwa,
yhatayi oomanaayeehwa geebii matuun amarriyihoob,
Imasri ani Wꞌankwana akatiyeet toona iikan iyadna.>>
idi.
19 Malya Ukwaasanaay umalak,
Yꞌisraaꞌiili dheeshi suurii sakiib been yꞌagaraayt bareeyooh harꞌii sakiya.
Ibꞌaluuki aamuud han suuriisii hantaayaayt bareeyooh harꞌii ingad.
20 Malya umalak Masreeb oodheeshwa Yꞌisraaꞌiili dheeshwa eebtik ingad.
Whawaad kassooh ibꞌaluuki dar gaal thibin iki,
uudar uuraaw aree nuur iki.
Aflaay baraah whawaad kassooh taktak diwlaab kiikeen.
21 Malya Muusa wꞌayooh oobhari kehii yꞌabik,
Wꞌankwana been whawaad uyintalawii akra baraam yakisiyaayt oobhar har'a y'agir aree balama haash ikwaas.
Aayam ikit'ana,
22 aree Yꞌisraaꞌiili ubhariit hooyteeb balama haashiib hiireeriyaan.
Aayam aree bareeyooh umaygwadwa utarhagwadiibwa kirraab ikeen.
23 Malya Imasri bareeh inaakibna,
aree kasseeh Farꞌuuniib yhataywa itanbilwa,
yhatay oomanaawwa,
oobhariit tehooy ookiik bareeyooh harꞌii dhaabiyaan.
24 Laakiin uumha mhaab baakaay,
Wꞌankwana tunꞌeeti aamuudiiwwa ibꞌaluukiiwwa Masreeb oodheesh ishbib.
Udheeshoohna winneet naat isoogim.
25 Itanbili kafara yhaalikw idꞌi,
aflaay baraah whantaayti igwooyna.
Imasri taktakee dehaay,
<<Een Yꞌisraaꞌiili hooy giigni!
Wꞌankwana bareeyooh jillaay Masir finaayiini!>>
idiin.
26 Malya Wꞌankwana Muusaay dehaay,
<<Wꞌayook masi oobhari kehii abikaa!
Shaawti Imasriiwwa itanbileehwa,
yhatay oomanaayeehwa aayam agartiit kehii imshawawiin.>>
idi.
27 Tuuyin talawaa tiidihoob,
Muusa wꞌayooh oobhari kehii yꞌabik,
aayam han umhiinooh ishꞌiiya beeti yꞌagarna.
Imasri dhab jarrabiyaana,
laakiin Wꞌankwana bareeh eeyam isiisiyeew.
28 Malya aayam yꞌagarniit,
itanbilwa yhatay oomanaawwa,
kassooh Farꞌuuniib oodheesh Y'israa'iili iinkabwa iyheen.
Bareeh gaal han hooy dhhanaab kiiki.
29 Laakiin Yꞌisraaꞌiili ubhariit hooyteeb balama haashiib hiireeriyaan.
Aayam aree bareeyooh umaygwadiibwa utarhagwadiibwa kirraab ikeen.
30 Been oomb'i Wꞌankwana Israaꞌiil Imasri ayee ishidhhan.
Y'israa'iili aree Imasriyeet kinaaja oobhari ginnaaliib rhiyaan.
31 Yꞌisraaꞌiili umatuuni akrir Wꞌankwana Imasriyi kehii idꞌiyeeb rhiyaanihoob,
uudehay W'ankwana irkwiin.
Baroohwa ukishiyaayooh Muusaawwa aamaniyaan.