Muusaawwa Maryamiitwa Tushiila
15
01 Malya Muusaawwa Yꞌisraaꞌiiliiwwa toon tookaf Wꞌankwanaay dehaay kafiyaana,
<<Wꞌankwana kafi andi,
baruuh winneet yhabna rayiimiya.
Whataaywa wꞌoomanaayoohwa
ubhariib tikwisiya.
02 Wꞌankwana akrirwa shiilaatwa ikatiheeb,
baruuh ishidhhanheeb.
Baruuh Ukwaasanaayu ikati,
aree barooh ihimid andi,
baabiyu Ukwaasana,
aree barooh tageegsi andi.
03 Wꞌankwana finaayanaabu,
Wꞌankwana oosmooh ikati.
04 Farꞌuuniib itanbilwa udheeshoohwa
ubhariib igid.
Farꞌuuniib idaabta yhayis
ubhariib dhibisiya.
05 Aayam idhooma bareeh iyheena,
baraah wꞌawiit iyami tehooyteeb tikwiyaan.
06 Yaa W'ankwanaay,
wꞌayuuk umaykwa,
yꞌakrireeb hadꞌaabi.
Yaa W'ankwanaay,
wꞌayuuk umaykwa,
wꞌashu huugiya.
07 Tehadꞌaayeetiyook umatuuniib
barook imꞌakaar tigriba.
Balooltiniit tehasiyaaytook lawisita,
batuuh bareeh w'aggaayt tiliw.
08 Yhamshukweetook tuthiwtii,
aayam koomamiyaan.
Aayam y'itrigis,
teheetaatiit ingadna,
aayam idhooma oobhari tehooyteeb yꞌakirna.
09 Wꞌashu yasakamiya,
<Ani iinkab andi,
bareeh ibik andi.
Ani tiganiimaateehna idhidh andi,
aree harriiweena kastooh iyaay andi,
ani bꞌadhdhu iilꞌib andi
aree aniib wꞌayi bareeh kwidhsi indi.>
indi.
10 Laakiin baruuk yhamshukweesook tinfiya,
uubhar bareeh ikwit'a.
Aayam igwida,
bareeh oorsaasiit iyheen.
11 Yaa Wꞌankwanaay,
isanamaayeeb barook tꞌiiti aaw eefi?
Barook t'iiti aabu?
Tehad'aayeetiib utageegaab,
umatuuniib w'atrakwkwiyaab,
tꞌajaayib ikwasiib!
12 Baruuk wꞌayook umaygwadiib tifdhidha,
tuubuut aree bareeh tikwitꞌa.
13 Tirhamaateek tigwidaanaatee
oodehay itishidhhaneeb suurkinaami tindiya.
Yꞌakrireesook bareeh mitiyaayi tindiya,
ugawook umugaddas beeti mitiyaayi tindiya.
14 Idehaya maasiwtiit idhi iyadna,
Ifalastiini mirkwaay yꞌibik indi.
15 Adoomeeb yhadꞌa iraakw iyadna,
Mooꞌaabi suurkina katati iyadna,
Kanꞌaaneeb uudehay darwiiwi iyadna.
16 Mirkwaaywa idhaatwa hooy dhibi iyadna.
Wꞌayook wꞌakraanaay
yaa W'ankwanaay,
udehayuuk hasamiinyeeb ookiik,
baraah w'awi t'iiteena shuuk anuub ikatiin,
oodehay ibaruuk tishidhhaneeb,
hasameeneeb ookiik,
baraah w'awi t'iiteeb ikatiin.
17 Baruuk bareeh haay y'eetiit t'andiya,
tikwasaateeyook ribaay
yaa W'ankwanaay,
oomhiin ugawook tidꞌiyeeb,
umugaddas beeb yꞌayaak idꞌiina.
18 Wꞌankwana diimaab hadꞌaab iikti indi,
diimaabwa kassoohoobwa iikti indi.>>
idi.
19 Farꞌuuniib yhataywa,
itanbilwa,
yhaytay oomanaawwa oobhar tikwiyaanihoob,
Wꞌankwana oobhari yam bareeyooh kehii ishaawawi.
Laakiin Yꞌisraaꞌiili ubhariib balama haashiib sakiyaan.
20 Malya Maryam tunabi Haaruuniit tuukwa,
whaashiyooh jilluukaat yakisita.
Taamꞌat han kastaah jilluukaat iyheeniit iramna aree ilagna.
21 Maryam bateeyooh dehaay kafta,
<<Wꞌankwana winneet ansiramaabuuyt,
bariiyooh dehaay kafaana.
Baruuh whataaywa wꞌoomanaayoohwa
ubhariib igid.>>
tidi.
Maarraawwa Eelimiiwwa Eeyam
22 Malya Muusa Yꞌisraaꞌiili oobhar wꞌadarooy milhatiit Shuureeb umingaay ookiik haay giigiya.
Baraah umingaayiib mhay bꞌi yam anu iibaabiyaan.
23 Baraah Maarraab iktimnihoob,
iyamaah hamiibayt igwꞌiti adgiraab kiikeen.
Oon usabbii been uumhiin <<Maarra>> itoosaam,
<<Hamiiba>> miyaadi.
24 Aflaay uudehay Muusaay kehii ashkiimiyaana,
<<Naan gwꞌinay?>>
idiin.
25 Malya Muusa Wꞌankwanaay dehaay waawiya.
Wꞌankwana aree barooh hindi kitꞌani rhisiya.
Baruuh whindi iyameeb igid,
aayam aree nafir ikeen.
Wꞌankwana beentooy bareeyooh dehaay gaanuunwa hagwa idꞌiit,
beentooy bareeh jarrabiya.
26 Baruuh <<Wꞌankwana Ukwaasanaayookna whiss daayiib teemsiiwneek,
bariiyooh suurii shiboona tidꞌaneek,
bariiteeh tiwasi sinaakirtiit haay shagaamteeneek,
ani Imasri kehii haay adꞌiyeet tilhanay gaat han hookna kaadꞌi.
Ani bareekna mheeliiniib Wꞌankwana akati.>>
idi.
27 Malya baraah Eelim ookiik eeyaan.
Beentooy tamna malu thawaabwa asarama tamuun akaayi hindiiwwa iifiin.
Baraah aree beentooy iyami daraag kookiyaan.