Mannaawwa Salwaawwa
16
01 Kassaah Yꞌisraaꞌiili Eelimee ifirꞌaniit,
Eelimwa Siinaaywa eebtik eefeeb Siini mingaay beeti iibaabiyaan.
Masreeb whaashii ifir'aniit harꞌii,
ootrig umalyaayt tamna ayyaatiib beentooy iktimna.
02 Beentooy han kassaah Yꞌisraaꞌiili Muusaawwa Haaruuniiwwa ashkiimiyaan.
03 Y'israa'iili bareeyooh dehaay,
<<Wꞌankwana Masreeb oobhaat daaraayoon iiktiyeek!
Beentooy shaatii toobama gidira kwilaltiit niistꞌa,
yhadhi nhirweebka kasseeh tamni.
Laakiin baraakna tooy hargwiit isuudir hoon miyaadiib,
umingaay beeti haay eetaan hoon.>>
idiin.
04 Malya Wꞌankwana Muusaay dehaay,
<<Ani tibreetee mꞌariit n'ati dehookna bireesi andi.
Uudehay imbꞌeebka giigeetiit,
been oombꞌi aree mhaatoohna mꞌari idabilna.
Bak aree bareeh jarrabi andi,
aniib ibhali isnaakiirneeb biisinaakirneeb iishbib andi.
05 Oombꞌi wꞌasagwira toona haay yꞌeeneet isoomiirneet toonaati.
Beet tuuna aree baraah eembꞌi eeraw idabilneet timꞌariitiika malu doora gwidakaat ibakii tikati.>>
idi.
06 Aflaay Muusaawwa Haaruunwa kasseeh Yꞌisraaꞌiilee dehaay,
<<Wꞌankwana Masree isfarꞌeetookna toona himniit iikan tiyadna.
07 Fajir aree Wꞌankwanaay umatuun rhi tiyadna.
Baruuh aree bariiyooh kehii wꞌashkiimti imaasiw.
Hinin aayga nikati akay baraak kehoon ashkiimteena?>>
idiin.
08 Muusa masi,
<<Baruuh bareekna himniit shaat tamsiiniyookna oodoor,
fajir yhadhi itehariwneeb bareekna iniiwihoob,
baruuh Wꞌankwana ikatiyeet toona iikan tiyadna.
Baruuh aree bariiyooh kehii wꞌashkiimtiyookna imaasiw.
Hinin aayga nikati?
Baraakna hini kehii ka'ashkiimtaana,
laakiin Wꞌankwanaay kehii ashkiimteena.>>
idi.
09 Malya Muusa Haaruunii dehaay,
<<Yꞌisraaꞌiili kasseeh sooya,
<Wꞌankwanaay suurii mꞌaana,
baruuh wꞌashkiimtiyookna imaasiw.>
diyaa!>>
idi.
10 Haaruun Yꞌisraaꞌiili bhaliisamee,
baraah umingaay beeti ishbibna.
Beentooy aree Wꞌankwanaay umatuun bꞌaluukiib lawiya.
11 Wꞌankwana Muusaay dehaay,
12 <<Yꞌisraaꞌiili ashkiimee amaasiw.
Oontꞌa bareeh sooya,
<Himniit tamteeneet sha imaar tiyadna,
fajir aree kasseeh yhadhi itehariwneeb imaar tiyadna.
Shaawti ani Wꞌankwana Ukwaasanaayookna akatiyeet toona iikan tiyadna.>
diyaa!>>
idi.
13 Beet tehimni gwida kilay eeyaaniit umꞌaskar itibna.
Tooyin tooraaw umꞌaskari dar iifiib whaash sꞌaay abkaa mhiya.
14 Uusꞌaay balamiyanihoob,
lꞌanaay nꞌakw na tꞌagwidaatiit whaash ikwibil.
15 Yꞌisraaꞌiili beet rhiyaanihoob,
naan tiiktiyeeb igamniit,
<<Uun naanaatu?>>
idiiniit taktak raatiyaan.
Muusa bareeyooh dehaay,
<<Tuun batuuh tamteeni jillaay Wꞌankwana yhiiyeetookna tim'ariiti.
16 Toon toona Wꞌankwana sooyaabu,
<Gaalka baruuh uukna yharriiweet toona kastooh danbiileet toonaati.
Tikheemaatiyookna eefeen oodehay gaalnaay dehaayka malu litraawwa tarab yaksaana.>
diyaabi.>>
idi.
17 Yꞌisraaꞌiili toona tusoomamiyaaneet idꞌiin.
Gwadi gwidaana idbilna,
aree gwadi shalikna.
18 Baraah litraayee abbiiriyaanihoob,
been igwidaana idbil,
winneet gwidaana yaksaab kiiki.
Shalikna idbil,
winneet shalikna yaksaab kiiki.
Gaalka toona tiyhirweet idbil.
19 Malya Muusa bareeyooh dehaay,
<<Batiisooh fajir ookiik naat han baadibiina.>>
idi.
20 Laakiin gwadi bareesooh Muusaab sinaakiraab kiikeen.
Naat gaat aree fajir ookiik idbiina,
laakiin batuuh dꞌoob tikaayt tidhimi.
Aflaay Muusa bareesooh yhasi.
21 Fajirka aree gaalka toona tiyhirweet idbil,
aree tuuyin tiinibꞌeeb oodoor batuuh mayyasamti.
22 Oombꞌi wꞌasagwira,
suureeka malu doora gwidakaana idbilna.
Nafarka fadhig litraawwa tarabwa idbilna.
Oodehayi suurkina aree eeyaaniit toon toona Muusaab sooyaan.
23 Baruuh bareeyooh dehaay,
<<Toon toona Wꞌankwana sooyaabu,
<Fajir fiinaniiti bꞌi ikati,
Wꞌankwanaayt tageegaat Sabti.
Aflaay toona ikaam tiyadneet kimiina,
toona itaakw tiyadneet tikwiina.
Toona timanhiit dibiina,
aree oomha ookiik daasaana.>
diyaabi.>>
idi.
24 Aflaay baraah Muusa sooyaneet tunaatiit fajir ookiik idbiin.
Beet batuuh aree d'oob akaat kitti tari dhimiyaat kitti.
25 Muusa <<Amsi tamaana,
amsi Wꞌankwanaay dehaay sabtu,
amsi whaashi kehii naat han imaar kitdiina.
26 Asagwir bꞌi dibilna,
laakiin oombꞌi wꞌasarama toosab naat han daayi kitdi.>>
idi.
27 Uudehay gwadi toosab iidbilni jillaay ifrꞌana,
laakiin baraah naat han miraab kiikeen.
28 Malya Wꞌankwana Muusaay dehaay,
<<Naadoor ookiik aniib ibhaliiwwa tiwaseewwa isniikar kitdiina?
29 Wꞌankwana toosab yhii hookna iginꞌookna hooy dꞌiina.
Oon usabbii aree oombꞌi wꞌasagwira malu bꞌeeyi hadhi iniiw hookna.
Oombꞌi wꞌasarama aree gaalka umhiiniyooh eesitꞌeet toonaatu,
gaal han baafirꞌana.>>
idi.
30 Shaawti uudehay oombꞌi wꞌasarama fiiniyaan.
31 Yꞌisraaꞌiili timꞌari <<Manna>> isimna.
Batuuh eeraat harrooyt habba tꞌiiteetu,
tꞌawtii daamaat tidhambooteet aree dꞌamti.
32 Muusa <<Toon toona Wꞌankwana sooyaabu,
<Mannaay malu litra yaksaanaat harꞌook yꞌiiniib utaasii dehaay dibiina.
Aflaay ani bareekna Masree afir'ihoob,
umingaayiib bareekna tamsaneeb yhadhi rheena.>
diyaabi.>>
idi.
33 Aflaay Muusa Haaruunii dehaay,
<<Karooraat yaksaat mannaay abaar gaal hooy d'iyaa.
Malya Wꞌankwanaay suurii daasa,
harꞌook yꞌiiniib ootaasii dehaay daasamiini.>>
idi.
34 Wꞌankwana Muusaab sooyaneet tunaatiit,
Haaruun mannaab Tibadehaati suurii daasiya,
aflaay daasami tindi.
35 Yꞌisraaꞌiili mannaab fadhig tamuun hawla tamiyaan.
Tikookaniiti haash eeyaaneeb ookiik tamiyaan.
Kanꞌaaneeb yhiduud iktimneeb ookiik mannaab tamiyaan.
36 Been udamaaniib tuuda w'abaar haay abbariineet tagwuugw litra tiikti.