Uliilaawii Yam Eeyaan
17
01 Kassaah Yꞌisraaꞌiili Siini mingaayii beeriyaaniit,
W'ankwana sooyaneet toonaatiit haash gaalnaay weer beeti kakooshamiyaan.
Malya Rafiidiimiib kookiyaana,
laakiin beentooy uudehay gwꞌiini yam kiihaayna.
02 Aflaay uudehay Muusaab imhasaayna,
<<Yam gwꞌinayeeb hiiyya hoon!>>
idiin.
Muusa <<Naanhooy timhasiinaheeb?
Naanhooy aree Wꞌankwana jarrabteena?>>
idi.
03 Laakiin baraah winneet yaweet hooy daataayt Muusaay kehii ashkiimiyaana,
<<Masree naanhooy tisfar'a hoon?
Hininwa,
yꞌareenwa,
ureewoonwa yaweetii madareen harriiwa han?>>
idiin.
04 Malya Muusa Wꞌankwanaay dehaay siileeliya,
<<Oon oodehay kak awari?
Baraah anii rajamootii dehaay amara!>>
idi.
05 Wꞌankwana Muusaay dehaay igwibi,
<<Oodehayi suurii hiireera.
Tukwoolaytook Ooniili yam haay tithꞌeet yaksaa.
Israaꞌiileeb isuurkinaayee galib geebook haay giiga.
06 Ani Hooreebeeb eefeeb uliilaawi kehii suurook ingid andi.
Baruuk uliilaaw thꞌaa,
aayam asti sasiiweena,
shaawti uudehay hooy gw'eena.>>
idi.
Aflaay Muusa Israa'iileeb isuurkinaayi suurii beet toona id'i.
07 Yꞌisraaꞌiili yhaseeniit Wꞌankwana jarrabiyaana,
<<Wꞌankwana geeboon eefi han kiihaay?>>
idiinayt,
been oomhiin Muusa aree Massaahwa Mariibaawwa isim.
Massaah <<Jarrabtiib>> miyaadu,
Mariiba <<Amhasuuyaab>> miyaadi.
Yꞌamaaliiki Igrabna
08 Yꞌamaaliiki eeyaaniit Rafiidiimeeb Yꞌisraaꞌiili finaasamiyaan.
09 Muusa Jooshiwaay dehaay,
<<Udehayiisoon daab gwadib waasaat Yꞌamaaliiki finaasamti jillaay haay firꞌa.
Lhayt Ukwaasanaayt kwoolay w'ayyu haayee ukanbuuli kehii ingid andi.>>
idi.
10 Aflaay Jooshiwa Muusa sooyaneet toonaatiit Yꞌamaaliiki finaasamiya.
Muusaawwa Haaruunwa Huurwa aree ukanbuuli mooy reewiyaan.
11 Muusa tukwoolaytooh asti yꞌibikihoob,
Yꞌisraaꞌiili ansiramiin.
Laakiin tukwoolaytooh n'ati dhoomisiyeeb oodoor aree Yꞌamaaliiki ansiramiin.
12 Muusaay wꞌayi igwooyihoob,
baraah aweeb yakisiyaaniit bariiyooh whii daasiyaan.
Baruuh han wꞌawii kehii istꞌa.
Haaruunwa Huurwa han bariiyeeh yꞌayi asti yꞌabikna,
gaalka dar gaal yꞌabikna.
Aflaay tuuyin dhibtaneeb ookiik bariiyeeh yꞌayi asti yꞌabikna.
13 Aflaay Jooshiwa Yꞌamaaliiki dheesh bꞌadhdhii igrib.
14 Malya Wꞌankwana Muusaay dehaay,
<<Toon toona miksasiib kitiba,
batuuh shꞌami tindi,
ibakii Jooshiwaab han simaasiwa.
Ani Yꞌamaaliikeet tish'anii tibreeti whiisii winneet kwidhsi andi.>>
idi.