Yatruun Muusaab Rheesamiya
18
Yatruun Miidiyaani fagiiri Muusaay ham ikati,
Ukwaasana Muusaawwa udehayooh Y'israa'iileewwa dehaay idꞌiyeet toona kastooh imaasiw.
Masi aree Wꞌankwana Yꞌisraaꞌiili Masree kak isfarꞌeet toona baruuh imaasiw.
2 Muusa Saffuuraab tutakatooh giigisiyaayt harꞌii,
whamuuh Yatruun batooh yꞌashish.
3 Batooh mhallaah yꞌaraah geeb iifiin.
Oor gaal Geershoom iidna.
Muusa aree <<Ani girba haashiib girba tak aki.>>
diyaabuuyt,
Geershoom <<Girba tak>> miyaadi.
4 Wꞌoor ooraaw aree Alꞌasaar iidna.
Masi baruuh,
<<Aniib ubaabaay Ukwaasana eeshtiimheeb,
baruuh Farꞌuuniib bꞌadhdhii ishidhhanheeb.>>
diyaabuuyt,
Alꞌasaar <<Ukwaasana eeshtiimheeb.>>
miyaadi.
5 Yatruun Muusaay wham ikati,
Muusaay yꞌarwa tutakatiyooh geebwa,
been umingaayiib baruuh kookaab iiktiyeeb oomhiin,
Ukwaasanaay oorbaay daraag bariiyooh dehaay eeya.
6 Yatruun Muusaay dehaay kalmaat diigwatiya,
<<Ani whamuuk Yatruun,
yꞌareek mhalleehwa tutakatookwa haay yꞌaabi.>>
idi.
7 Aflaay Muusa giigiyaayt whamooh yꞌashish,
n'ati kuuramiyaayt barooh shoobiya.
Baraah taktak salaamiyaaniit malya tukheema shuumiyaan.
8 Muusa Wꞌankwana Yꞌisraaꞌiili ishidhhiini jillaay,
Far'uunwa Imasriyeebwa idꞌiyeet teena kasteeh whamooh sooya.
Yꞌisraaꞌiili isalalaayeeb imriineeb igwirha kasseeh W'ankwana kak hooy ishidhhaneeb barooh sooya.
9 Yatruun Wꞌankwana Yꞌisraaꞌiili Imasri ayee ishidhhiini jillaay idꞌiyeet teena tidaayiit kasteeh imaasiwihoob,
afirhiya.
10 Baruuh <<Whamaad Wꞌankwanaayu!
Baruuh Imasriiwwa Farꞌuuniiwwa wꞌayii ishidhhan hookna.
Baruuh oodehay aree Imasri ayee ishidhhan.
11 Oontꞌa Wꞌankwana kasseeh yꞌankwanaayeeka winkaab ikatiyeet toona akan.
Baruuh beet toona aree Yꞌisraaꞌiili amaag iweer oodehayi kehii idꞌi.>>
idi.
12 Malya Yatruun Muusaay wham atoolwaat karaama haay eeyaayt,
Ukwaasanaay dehaay karramamiya.
Haaruun aree Muusaay whami geeb Ukwaasanaay suurii m'ariit tamiini jillaay,
kasseeh Yꞌisraaꞌiili suurkina haay eeya.
13 Oombꞌi ooraaw Muusa udehayiit tehalaagaya iitkwikwi jillaay isꞌa.
Baraah han fajrii tehimni ookiik bariiyooh kwayaay ingadna.
14 Whamuuh beet Muusa udehayooh dehaay iidꞌeet toona rhiyanihoob,
<<Oodehayii dehaay naan shagaamtiniya?
Baruuk naanhooy oodꞌook ugaadiit tisꞌaa?
Uun uudehay aree kassuuh fajrii himniit ookiik naanhooy udaraagook ingadiin?>>
idi.
15 Muusa bariiyooh dehaay,
<<Uudehay Ukwaasana yharriiweet toona kanaant yhariwnayt yꞌeenheeb.
16 Baraah halaagaayt ibariinihoob,
aneeb beeti haay yꞌeen.
Ani han bareeh eebtik daayani,
Ukwaasanaay whagwa igaanuunwa bareeh sooyani.>>
idi.
17 Muusaay wham igwibi,
<<Baruuk saktiniyeet tuuna daayiit kitti.
18 Baruukwa uudehay bariiyook dehaay yꞌeenwa iknaayaakna tigwooyiina.
Uun ushaga winneet dehookna gwidaabu,
oodꞌookna kafaayistaana.
19 Oontꞌa aneeb sinaakira,
mikir iyaaw hook andi.
Ukwaasana aree geebook baꞌiikti.
Baruuk ibakii Ukwaasanaay suurii oodehayi wakiil tikatiya,
aree bareetooh tehalaagaay barooh haay kitima.
20 Bareeh whagwa igaanuunwa allamaa,
kak ikweerneeb rhisaa,
tuwaajib tushagaameeneet sookina.
21 Laakiin kassooh oodehayii aree taad ibariin da waasa.
Aan aanda Ukwaasana ireekw ikatiin,
sidki da igwisri miraay eerib ikatiin.
Bareeh aree alfaabwa,
sheebwa,
ay tamuunaawwa,
tamuunwa ikatiin oodehayi kehii daabtaab kwaasa.
22 Bareeh kassoohoob oodehayi kehii gaadiyaab kwaasa.
Laakiin tehalaagaay t'akraatka barook beeti haay yꞌeeneet toonaati.
Baraah laamaat halaagaay tikatiyeek aakna hooy imakirna.
Beet toona baraah barook im'adhiidhnayt,
irabi hook inshoofi.
23 Baruuk toon saktiniyeek,
Ukwaasana aree sooyaayook ikatiyeek,
baruuk tankwiikweet toona adgirtiniya.
Uudehay han kassaah rayhamaa igawaayeehna eebiin.>>
idi.
24 Muusa whamooh isnaakiraayt,
baruuh sooyaneet toona kastooh idꞌi.
25 Baruuh kastooh Israaꞌiilee taad ibariin da waasiyaayt,
oodehayi suurkina ikwaas.
Baruuh aree alfaabwa,
sheebwa,
ay tamuunaawwa,
tamuunwa iiktiin oodehayi kehii bareeh daabtaab ikwaas.
26 Baraah kassoohoob oodehayi gaadiya ikeen.
Akraat halaagay iiktiineeb oodoor Muusaab haay iibiina,
laakiin laamaat halaagay iiktiineek aakna iitkwikwna.
27 Malya Muusa whamooh isiisarha.
Yatruun whaashooh ookna beeti yꞌagar.