Oorba Siinaayi Kehii
19
01 Yꞌisraaꞌiili Masir yꞌishneekka ootrig umhaya,
been oombꞌi ookna baraah Siinaayeeb umingaay beeti eeyaan.
02 Baraah Rafiidiimee beeriyaani harꞌii,
Siinaayeeb umingaay beeti eeyaan.
Y'sraaꞌiili beentooy oorbaay fiireeb umingaayiib kookiyaan.
03 Malya Muusa Ukwaasanaay dehaay lawiyi jillaay oorba reewiya.
Wꞌankwana oorbaay barooh waliikiyaayt,
<<Een ibhali Yaaguubi dhiwa sooya,
Y'israaꞌiili sooya:
04 <Imasri kak aweereeb iknaayaakna rhitaana,
ikwiikw'ayi anbireeb afiyak hookna,
malya aneeb ooknaayu beeti haay yꞌan hookna.
05 Oontꞌa aniib ibhali tisnaakiirneek,
aniib ugalad tꞌabikneek,
kasseeh tubuutiib eefeen idehayaayeeka baraakna alya miraay aniib iikti tiyadna.
Kastuuh tuubuut han aniitu.
06 Baraakna aniit fagiiriyeet hadꞌaayeewwa mugaddas dehaywa tikatiina.>
diyaa.
Teen tikalma ibakii Y'israaꞌiili haay bhaliisama.>>
idi.
07 Aflaay Muusa oorbaay yꞌagaraayt,
oodehayi suurkina waliikiyaayt Wꞌankwana sooyaneeb ibhali kasseeh bareeh sooya.
08 Kassuuh uudehay hiddaab igwibiina,
<<Wꞌankwana sooyaneet toona kastooh niiwari niyad.>>
idiin.
Aflaay Muusa oodehayi bhali Wꞌankwanaay dehaay haay yꞌagar.
09 Wꞌankwana Muusaay dehaay,
<<Ani hadal bꞌaluukiib yꞌani hook,
aflaay uudehay ani barook bhaliisamee iimsaw iyadna.
Baraah aree diimaab barook aamani iyadna.>>
idi.
Malya Muusa uudehay idiineet toona Wꞌankwana sooya.
10 Wꞌankwana Muusaay dehaay,
<<Oodehay bayaat amseewwa lhaytwa bareeh atehara.
Yhalakaayeehna shiishagwidha.
11 Oombꞌi umhaya aree soomira.
Been oombꞌi kassuuh uudehay shibbee Wꞌankwana oorba Siinaayi kehii gadehami indi.
12 Oorbaay kwayaay silt dꞌiyaat bareeh sooya,
<Digwagwna!
Oorba baareewaana,
tari oorbaay gadam baatehaana.
Oorba tehiiniibka ibakii ituudir indi.
13 Baruuh ibakii rajamoomi indi,
tari nashshaabtii itoogiid,
ayeeb han aree kehii itfidhidh kiidi.
Aadamiib ikatiyeek tari reew gaal han iidhhan kiidi.>
diyaa.
Wꞌargini dꞌaay thiwti kwinhiinyihoob oobhaat baraah oorba reeween.>>
idi.
14 Muusa oorbaay oodehay beeti igidehi harꞌii,
bareeh atehariya.
Baraah han yhalakaayeehna ishaagwidhna.
15 Malya baruuh oodehayii dehaay,
<<Oombꞌi umhayaay dehaay marna,
teem'a baajaamꞌoosamaana.>>
idi.
16 Oombꞌi umhayaayt mhiiteeb biri huudiya,
talaw talawiya,
hadal bꞌaluuk oorbaay kehii daaya.
Winneet akra dꞌa thiwiya,
uudehay aree kassaah katatiyaan.
17 Malya Muusa oodehay Wꞌankwana imiirni jillaay umꞌaskarii haay giigiya.
Baraah oorbaay gadam ingadna.
18 Wꞌankwana nꞌeetiit hayꞌaatii kehii gadehama iifi akay,
Siinaay uurba kwaraarii assamiya.
Ukwaraar tibreeteeb taktak rareewiya,
firmii itfarꞌi ukwaraar itꞌi.
Uurba kassuuh aree winneet amaag idhiya.
19 Uudꞌaay thiwti masi tageegakaabka iki.
Malya Muusa hadiidiya,
aree Ukwaasana bariiyooh dehaay thiwtii igwibi.
20 Wꞌankwana oorba Siinaayi kehii gadehamiyaayt,
Muusaab oorbaay mooy beeti waliikiya.
Aflaay Muusa oorba reewiya.
21 Wꞌankwana bariiyooh dehaay,
<<Gidehaat oodehay sooya,
aflaay Wꞌankwanaay irhiti jillaay toosil biihasamayna,
toon idꞌaneek bareeh gwida hooy iyaayiin.
22 Ifagiiriya Wꞌankwana idawil han ibakii igarooyeehna atehareena.
Bak biiweerneek,
Wꞌankwana bareeh jasaayi indi.>>
idi.
23 Muusa Wꞌankwanaay dehaay,
<<Baruuk uknaayuuk soota hoon akay,
uudehay oorba Siinaay ireewti kaꞌadgiriyaan.
Baruuk <Oorbaay gadam silt dꞌiyaat mugaddas kwaasa.>
tidiya hoon.>>
idi.
24 Wꞌankwana igwibi,
<<Gidehaat Haaruun geebook haay mꞌaa.
Laakiin ifagiiriyaawwa uudehaywa W'ankwana beeti y'eeni jillaay ibakii toosil biikitꞌana.
Tari baruuh bareeh jasaayi indi.>>
idi.
25 Aflaay Muusa oodehay beeti tikwiyaayt bareeh sooya.