Tiwasi Titamin
20
01 Ukwaasana een ibhali kasseeh hadiidiya:
02 <<Ani Wꞌankwana Ukwaasanaayuukna,
Masreeb whaash oomhiin kishiyaab hooy tikeeneeb hooy isfar'ookna aneeb akati.
03 Aneeb nuun kwaasanaab warib ibaki kitd'iina.
04 Igarooyeekna dehaay sanam naatii han ibakii baashagaamaana,
tari naati timsaal tibreeteeb tari tubuutiib tari ubhariib ibakii baadꞌiina.
05 Een bareeh ibakii dehaay baa'asjidaana,
baaꞌabidna.
Ani Wꞌankwana Ukwaasanaayuukna giiraat ibari Kwaasanaabi.
Ifarooyeet maagnaaytii dehaay yꞌar jasaayani,
baliib aneeb eerib ootaas umhayaawwa ufadhigaawwa ookiik jasaayani.
06 Laakiin aneeb areeyeenwa aniit tiwasi kaleeweenwa baliib alif taas ookiik shiboot iiwari andi.
07 Wꞌankwana Ukwaasanaayook oosmooh baamiiga.
W'ankwana oosmooh inmiig jasaayi indi.
08 Toosabka sh'aana,
batooh mugaddast kwaasna.
09 Tꞌasaramaatiibka asagwit yina shagaamteena,
kassooh ishagaayookna d'iina.
10 Laakiin tuuyin tꞌasarama sabtu,
beet tuuyin W'ankwana Ukwaasanaayiitook tikati.
Beet tooyin baraakna tari y'araakna tari t'artaakna,
tari ikishiyaayaakna tari tikishiyaataakna,
tari ureewuukna,
tari igirba idheefaayeekna tehooyteeb ikweer,
gaal han shagaab baadꞌiina.
11 Wꞌankwana teebreewwa,
toobuurwa,
oobharwa,
kastooh hooy teefeetwa asagwir bꞌeeyeeb idꞌi.
Laakiin oombꞌi wꞌasaramaay fiiniya.
Aflaay Wꞌankwana toosabti b'i baarakiya aree mugaddas ikwaas.
12 Baabookwa deetookwa hamooysa!
Shaawti Wꞌankwana Ukwaasanaayuukna iniiweeyookna whaashiib gwimad imir imaar tiyadna.
13 Baadirna!
16 Ushawwookna gwisreet badeha kehii baabidehana!
17 Ushawwiyookna gaw baahariwna!
Ushawwiitookna takat,
tari tukishiyaatooh tari ukishiyaayooh,
tari uyooyooh tari umeekooh,
tari weena ushawwiitookna tikatiina han baahariwna.>>
idi.
18 Uudehay toothiwwa tehuudwa rhiyaaniit wꞌargini dꞌaay thiwti imaasiwnihoob,
oorba kwaraaree rhiyaana aree mirkwaayii katatiyaan.
Baraah isgiiniit ingadna.
19 Baraah Muusaay dehaay,
<<Baruuk uknaayuuk bhaliisama hoon,
aree hinin nisniikar niyad.
Laakiin Ukwaasana geeboon baahadiidsa,
tari Ukwaasana hadiidsamiiniyuun niyaayi!>>
idiin.
20 Muusa han <<Baarakwiina.
Ukwaasana jarrabtiyookna jillaay yꞌaabu,
shaawti Ukwaasanaay imirkwaay tumaagtii idaab hookna indi!>>
idi.
21 Uudehay isgiiniit ingadna.
Muusa ibꞌaluuk whadal Ukwaasana iiktiib idwil.
Isanamaawwa Tikaramaati Mhiinanwa
22 Malya Wꞌankwana Muusaay dehaay,
<<Yꞌisraaꞌiili toon sooya:
<Ani tibreetee bareekna bhaliisamaneet toona iknaayaakna rhitaana.
23 Anii geeb kwaasanaab han baadꞌiina,
igarooyeekna dehaay aree ashteet tari dimꞌaraay daama kwaasana baashagaamaana.
24 Haashii karaamaati mhiin anii dehaay dꞌiinaat tikaraamaateekna t'atoolwaat hooy firꞌana,
umꞌasgiit karaama han firꞌana.
Anootwa yaatwa shꞌeetwa karaamaateekna hooy firꞌana.
Oosmu hamooysamaab hooy akwasiyeeb oomhiinka yꞌeetiit hookna,
baaraki hookna andi.
25 Anii dehaay karaamaati mhiin aweeyee teedꞌirneek,
hashama aweeyee baadꞌiirna.
Aalaatee shagaameeneek,
beet tuuna t'abaadaati mhiin tinmiig.
26 Aniit tikaraamaati mhiin beeti darajii baareewaana,
beet tuuna iraboobeekna lawistini.>
diyaa.