21
Oon whag bareeyooh suurii ibakii daasa:
Yꞌibriiyi Kishiya
2 Kishiyaab gaal Ibriib dilba tiniineek,
baruuh ibakii asagwir hawla dehook shagaamiini.
Laakiin whawil wꞌasarama baruuh ibakii itfadiig,
naati kwisuuy anu aree itfadiig.
3 Baruuh oodꞌooh yꞌiiniyeek,
oodꞌooh itfadiig.
Laakiin baruuh takatii yꞌaab ikatiyeek,
batuuh han geeb giigtini.
4 Barooh wꞌankwanaayuuh takat iniiweek,
aree batooh ar tari arit hooy farriyeek,
tutakatwa y'araahwa wꞌankwanaayeeh ikatiin,
uutak uubhaat itfadiig.
5 Laakiin ukishiya <Ani wꞌankwanaayoowwa tootakatoowwa yꞌareewwa areeyani,
giigi kaadi,
itfidig kaadi.>
indiyeek,
6 aflaay wꞌankwanaayuuh ibakii barooh gaadi suurii haay yꞌiini.
Barooh udheefaay geeb tari udheefaay kwayaay haay gadtiit wꞌangwiil tanlꞌeet toonaati.
Shaawti baruuh kassooh umidhhanooh bariiyooh kishiya ikati.
7 Tak gaal ootooh tukishiyaatiit danliibeek,
batuuh ukishiyaayt bitfidaageet toonaati.
8 Batuuh wꞌankwanaayooh batooh ooknaay dehaay waasiyaab bit'ajbayeek,
batooh agirtiit ubaabaay dehaay idalibneet toonaati.
Batooh weer girbaanaay dehaay danliibeet toonaati hag kiibari.
Baruuh batiiyeeh eesaf kiibari.
9 Baruuh ooriyooh dehaay batooh daasiiniyeek,
ibakii tꞌootiitooh imashabiibeet toonaati.
10 Baruuh weet takat safiiniyeek,
tootakat tusuuriit timꞌariiwwa yhalakaawwa oonꞌaali hagwa biihabiyeet toonaati.
11 Baruuh teen teena teemhay biifaaysayeek,
batuuh mhallagaayi kwisuuy anu titfadiigeet toonaati.
Amdeeraryooyt
12 Aadamiib thꞌatiit indiirka ibakii ituudir indi.
13 Laakiin aadamiib gamaamtii indiir,
Ukwaasana kwaastiit beet tuuna tikatiyeek,
baruuh ani dehaay waasi andiyeeb oomhiin beeti ifooriyeet toonaati.
14 Laakiin tak haseetiit tak weer kanee indiireek,
barooh aniit tikaraamaati mhiinii siisagaat diraa.
15 Gaal han baabooh tari deetooh inthꞌeek,
baruuh ibakii itoodiir.
16 Aadamiib tafeetiit gidehooh danliibka tari kishiyaasiiniibka ibakii itoodiireet toonaati.
17 Gaal han baabooh tari deetooh inꞌiiteek,
baruuh ibakii itoodiir.
18 Malu da amhassaaytiit gaal ooraaw awii inthꞌeek,
tari wꞌayiisooh inthꞌeek,
diraab aree biikaayeek,
laakiin nꞌaali kina ikwasiyeek,
19 uutak w'atooth'a yakeetiit kwoolaytii dehaay adehameetiit hiireeriiniyeek,
uutak ubarooh th'aab garaamaat kwansiyeet toonaati.
Barooh idamaneeh kwidhsaabuuyt daayiib in'iireeb ookiik mheeliiniyeet toonaati.
20 Tak gaal kishiyaayooh tari kishiyaatooh kwoolaytii inthꞌeek,
been ukishiya been ooth'ii iyaayyeek,
wꞌankwana ibakii jasaamiiniyeet toonaati.
21 Laakiin ukishiya bꞌeeb gaalnaay har'ii tari umalya bꞌi yakiiniyeek,
uun ukishiya bariiyooh gadhꞌi ikatiyeet toonaatii w'ankwana kajasaamiya.
22 Aanda ifinaasameen aree takat nakwalaayt eethꞌaneek,
batuuh na doorooh baakaay fanriyeek,
laakiin batuuh winneet adaamaat bitkaayeek,
beet toona gwibbaab uutak aree ibakii garramamiini.
Tootakati tak harriiweet toona kastooh kwansi,
tumhakama hankiimeet toona sakiini.
23 Laakiin batuuh winneet adaamaat tikatiyeek,
aashuuk ishuukee dehaay ittiyeewiin.
24 Tuliili liiliitii dehaay,
tuukwiri kwireetii dehaay,
wꞌayi ayii dehaay,
uragad ragadii dehaay,
25 tulaawi laawiitii dehaay,
tꞌadil'i adil'iitii dehaay,
tuwooki wookiitii dehaay jasaameen.
26 Tak gaal aree kishiyaab tari kishiyaati gw'ad thꞌatiit thawsiiniyeek,
ugw'adiit garaamaateeb aree ukishiya tari tukishiya ibakii fandiig.
27 Baruuh kishiyaab tari kishiyaati kwiri inthꞌeek,
ibakii tukwireetiit garaamaateeb aree barooh tari batooh ibakii fandiig.
28 Yoob tak tari takat kwitiit indiireek,
uuyu ibakii tooyat ookiik rajamoomiini.
Tushaatuuh aree ibakii katamamta.
Laakiin ooyooy kina naat karaatiya.
29 Laakiin uuyu kwootanaab ikatiyeek,
wꞌankwana aree soomamaab akay abkaab biikaayeek,
tak tari takat indiireek,
uuyu rajamoomiini wꞌankwana han ibakii itoodiir.
30 Laakiin kwisuuy hooy iteharriiweek,
baruuh toona hooy ateharriwaat kwisiitiit ishuukeeh ishidhhiin.
31 Uun whag aree masi uuyu oor tari oot inkwiiteek han ibakii bak daamiini.
32 Uuyu kishiyaab tari kishiyaat inkwiiteek,
wꞌankwana ibakii mhay tamuun ashteeti mhallaga ikishiyaayi ankwana iniiweet toonaati.
Uuyu aree ibakii rajamoomiini.
33 Tak deeb nangiileek tari deeb firiktiit biiꞌassayeek,
yoob tari meek hooy dhibiiniyeek,
34 oodi firkaab uutak ibakii garramamiini,
ureewi ankwana ibakii kwansi,
aree ooreew wꞌayaab baruuh iniin.
35 Tak gaalnaay yu weernaay yoob thꞌatiit indiireek,
baraah ooyu udhhaniib dilibtiit imhallagaawwa ooyu wꞌayaabwa indaalkiik imꞌadhdhiidhna.
36 Laakiin uuyu kwootiiniyeet toona titookkiineek,
wꞌankwana aree kaleewaab biikaayeek,
baruuh ibakii ooreew ureewii dehaay kwansi.
Uuyu wꞌayaab aree bariiyooh ikati.