Oomraayi Dibuuy
22
Tak yoob tari argin gwihartiit harriideek tari danliibeek,
baruuh ibakii ay girma shꞌaab ooyooy dehaay kwansi,
fadhig argini aree wꞌarginii dehaay kwansi.
2 Gwihara gwiharee itꞌabiikeek tari thꞌatiit itoodiireek,
uutak ubarooh idir bariiyooh oobooy karaatamamiya.
3 Laakiin tuun tuuna tuuyin talawtiniyi har'ii tikatiyeek,
baruuh ibakii bariiyooh oobooy raatamamiini.
Ugwihara ibakii naatka angiir,
laakiin baruuh naat han biibariiyeek,
toona tugwiharaab ikatiyeet kwansiyi jillaay baruuh ibakii itdaliib.
4 Uureew wꞌatgwihiraab dhhanii bariiyooh geeb itmariyeek,
yoob tari meek ikatiyeek han,
baruuh gaalnaay dehaayka ibakii malu girma kwansi.
5 Tak ureewooh dirꞌaatiib tari inabiit dirꞌaatiib shaakwtiit hooy fandiigeek,
aree weer takiit dirꞌaatiib ikweerneek,
baruuh ibakii ooknaayt dirꞌaatii tari inabiit dirꞌaatii hooy daayikaana kwansi.
6 Nꞌeet yakeetiit tinaweetee birartiit gaalnaayt harrooyt dirꞌa tari igangara y'angadiin tari kastooh tudirꞌa tinliiweek,
uutak toonꞌi yaksaab ibakii tehasar kwansi.
7 Tak shawwooh ashteet tari gadhꞌi isdabiyeek,
baraah aree ushawwi gawii itgwihiirneek,
ugwihara itꞌabiikeek ibakii naatka malu doora kwansi.
8 Laakiin ugwihara biimiraayeek,
ugawi kina ibakii ugaadi suurii ingadi.
Ugaadi baruuh ootak beenaay igadhꞌeeb wꞌayooh daasaab ikatiyeeb biikaayeeb shanbiib.
9 Kwidha miraayiib tehalaagay kasteeh aree yoob,
meek,
argin,
halak,
tari weer kwidha miraay gaal <Uun aniibi.>
indiyeek,
mhallaah baliin tehalaagaaytoohna igaadiya haay eebiin.
Igaadiya shhagwaabu iyadneeb aree ushawwooh beet toona malu doora dehaay kwansi.
10 Tak ushawwooh meek,
yoob,
argin tari weer reew isdabiyeek,
uureew iyaayyeek tari katꞌamiiniyeek,
tari gaal rhaab baakaay yakamiiniyeek,
11 tehalaagaay bareeh eebtik Wꞌankwanaayt halafooytii titakwiikw.
Ushawaw aree ootak ooraawi gadhꞌeeb wꞌayooh daasaab biikaayeet toona halafooyiini.
Toon toona ibakii wꞌankwana gabbalamiini,
naati kwisuuy han kitehariw.
12 Laakiin uureew ushawwi gawii itgwihiireek,
baruuh ibakii ureewi ankwana kwansi.
13 Been uureew aree malaaliit dhhaniitii huugamiiniyeek,
baruuh ifirkaki baagi yakseetiit badehaateeb haay yꞌiini.
Baruuh ooreew wꞌatoodiraab kiikwisi.
14 Tak ushawwiisooh reew istaliifeek,
wꞌankwana baahaay aree been uureew katꞌamiiniyeek tari iyaayyeek,
baruuh ibakii kwansi.
15 Laakiin wꞌankwana ureewi geeb eefiyeek,
ooreew salaaf been kiikwisi.
Uureew aree karaay ikatiyeek,
ookiraay kinaay imhallaga tehasar ikweesna.
Oodehayiit Halaagaayti Tikwuukw
16 Tak gaal oot aagirt daasamaat baakaayt imjakiineek,
baruuh ibakii idoobi taman kwansi.
Batuuh han doobaatooh iikti tindi.
17 Batooh ubaaba been ootak winneet hanbiyeek,
baruuh ibakii batooh migaabuuyt tudoobaati taman kwansi.
18 Tutakat tuseharana ibakii dirna.
19 Gaal han reewi geeb jaamꞌoosamiiniyeek baruuh ibakii itoodiir.
20 Gaal han Wꞌankwana nuun weer ankwanaay dehaay karaamaat karramamiiniyeek ibakii tuuyat jasaayooh tikati.
21 Oodehay igirbaab amaag baaweerna,
tari n'ati baatiirna baraakna han Masreeb girbaab akay tiifiina.
22 T'ibraatfaatki tari inaday amaag baaweerna.
23 Baraak bareeh amaag waraayiit,
baraah aree anii dehaay waaweeneek,
ani sidik bareetoohna toowaaw iimsaw andi.
24 Aniit tehasiyaay yayaki tindi,
aree ani bꞌadhdhii idaar hookna andi.
Timꞌataakna ibraatfaatkiit iikti iyadna,
aree yꞌaraakna naday iikti iyadna.
25 Aniib oodehay baliib imiskiina igeebookna ikweernaayee gaal mhallagaab tisiisaliifneek,
imhallaga isiisaliif utakiit baa'akeena.
Barooh miksab hooy baahariiwna.
26 Ushawwiyook halak silifti arbuuniib tiniineek,
barooh himniit tuuyin dhibtiniyihoob dehaay agira.
27 Baruuh oon whalak ugarooyooh oobhaat haay hammi.
Baruuh weena naanaatiib diwi indi?
Baruuh anii dehaay waawiiniyihoob,
ani rhiimuuyt barooh iimsaw andi.
28 Ukwaasanaay baakifirna tari udehayookna haakim baaꞌatna.
29 Wharrooyookna tari whaayiiteekna awwal firaayiit tikaraama hoosu baasidileelna.
Yꞌareekna isuurkina ibakii aneeb tiyawna.
30 Oontꞌaaneet eeshꞌeeknaawwa tꞌanooteeknaawwa han bak weerna.
Bareeh tindeeti geeb asarama bꞌi sehagitna laakiin oombꞌi wꞌasimha aneeb hiina.
31 Baraak aniib oodehay umugaddas tikatiina.
Aflaay ooreew malaaliit dhhani katꞌaat tikatiyeeb baatamaana,
beet toona iyasee dehaay gidna.