Wꞌadli Gaanuunwa Tirhamaawwa
23
Gwisreet yaandiint baabariirna.
Wꞌamaagtak gwisreet badehaatee baashamna.
2 Toomaagti dꞌuuyiib eegwidaab baaramna.
Whaggiit badeha tiyawnihoob,
wꞌadil hagiltiit eegwidaab baaramna.
3 Whaggi suurii aree aniw taki geeb mingid baagiraadaana.
4 Wꞌashooyookna yu tari meek fadaag timeerneek,
barooh beeti ibakii tꞌagirneet toonaati.
5 Bareekna inriib taki meek irabi hooy dhibee rhiteeneek,
beentooy baaꞌiishna,
ibakii barooh teeshtiimna.
6 Whaggi suurii aree udehayookna wꞌaniw tumhakamaatiib wꞌadil baahabiina.
7 Gwisri tehima baaꞌatehimaana,
nhas tari sidki nafar aree baadiirna.
Ani beet toomaag gwanbiibka afooyi kaadi.
8 Balsaat baagabbalamaana.
Tubalsa oodehay irheen hamasheestini,
oodehay ooshboob aree tikalmaateeh tanwi.
9 Girba nafar n'ati baatiirna,
baraakna iknaayaakna tugirbaay dꞌamsaabaana.
Baraakna Masreeb girbaab akay tiifiina.
Toosabti Hag
10 Asagwir hawla tidirꞌaateekna teeraayaana wharrooyookna aree wikna.
11 Laakiin whawil wꞌasarama whaash baateeraami ishna,
shagaamamaab baakaay ishna.
Aflaay uudehay wꞌaniw geebookna eefi mꞌariit hooy imaar iyadna.
Bareesooh mhiyaab ibaagi aree imalaaliit dhhaniya tameena.
Oont'aaneet han wꞌinabiit dirꞌaateekwa isaytuuniit dirꞌaateekwa bak dꞌiina.
12 Asagwir bꞌi ishagaayookna dꞌiina,
laakiin oombꞌi wꞌasarama baashagaamaana.
Aflaay uyooyuukwa umeekuukwa fiineena,
indhiwaayeek faraay ukishiya fiiniini,
igirba han oontꞌaaneet fiineen.
13 Digwagwna,
ani adiyeet toona kastooh ibakii daayiib d'iina.
Ikwaasana eerawi sima baawaliikaana,
uyafiyook han baadꞌiya.
Whawli Y'iida Eemhay
14 Anii dehaay aree mhay doora whawliib afirhiteena.
15 Ufatiiri Wꞌiid hooy afirhaana,
asarama bꞌi hamiir baabari hadhi tamaana,
toon toona haay waseeyan hookna.
Ootrig Abiib oodoor uwaasamaanaay toon toona dꞌiina.
Been ootrig baraakna Masree tifrꞌana.
Harar ayee aree gaal han anii suurii biilawayeet toonaati.
16 Tidirꞌaateeb teeraataaniit wharrooyookna farriyeeb awwal firaay teewiknihoob aree Oowaaki Wꞌiid hooy iidaana.
Whawli agiyaay aree wharrooyookna tidir'aatee tidabilnihoob,
Dibuuli Wꞌiid hooy iidaana.
17 Mhay doora whawliib aree kassaah aanda Wꞌankwana W'alyaanaay suurii laween.
18 Anii dehaay tifarꞌaneet tikaraamaati booy hamiir tibariinaati geeb baafirꞌana.
Aniib wꞌiidiit karaamaateet simuum fajir ookiik ibakii kadaasamta.
19 Isaliitiyookna awwal firaayii toona tudaayikaat Wꞌankwana Ukwaasanaayookna ugawii dehaay haay mꞌaana.
Ab tari abat tundeetiiteeh t'aateeb baatakwiina.
Ukwaasanaay Malak Usalal Isoomiir
20 Shibibna,
bareekna usalaliib ingwꞌiidi jillaay ani malak afandiig.
Baruuh ani dehookna soomraab akatiyeeb oomhiin beeti istoobi hookna.
21 Barooh gwꞌadna ibhaliyeeh sinaakirna.
Barooh baaꞌamꞌakaarna,
timꞌakiirneek afooyi hookna kiidi,
aniib uusim bariiyooh eefi.
22 Baruuh indiyeet toona daayiib tisnaakiirneek,
baruuh indiyeet toona kastooh tid'aneek,
ani yꞌashooyeekna ashoosami andi.
Bareekna eerib aree iirib andi.
23 Aniib umalak suurookna giigiini.
Baruuh aree Yꞌamuuraawwa,
Yhittaayiiwwa,
Farasiiwwa,
Kanꞌaaniiwwa,
Yhiiwiiwwa,
Yaabuusiiwwa haash shuumsiini hookna.
Ani bareeh kwidhsi andi.
24 Bareeyooh ikwaasanaayee dehaay baa'asjidaana,
tari baaꞌabidna,
tari ushagaayoohna baashagaamaana.
Baraak ibakii een ikwaasana katꞌaana,
tꞌibaadaati aweeyeehna aree ibakii katꞌaanaat firkak kwaasna.
25 Wꞌankwana Ukwaasanaayookna abidna,
bariitaah tibaraka aree timꞌariitiyookwa iyameeyookwa kehii daayi iyadna.
Tilhanay ibitkeesookna giigsi andi.
26 Whaashiyookna aree gaat han eefiraayi kitdi,
tari giduudiit iikti kitdi.
Gwimad imir iyaaw hookna andi.
27 Baraakna finaateeneeb yhash aree kasseeh mirkwaay hooy fidigtiit naat asoogiim.
Yꞌashooyeekna kasseeh hookna asfoori.
28 Yhiiwiiwwa,
Kanꞌaaniiwwa,
Yhittaayiiwwa usalaliisookna hantaayeeni jillaay,
ani dhiinaab suurookna iifdig andi.
29 Laakiin whaash mingaayamiini,
imalaaliit dhhaniya aree winneet hookna guudeenayt,
ani bareeh gaal hawliib giigsi kaadi.
30 Baraakna han guudeetiit whaash tꞌabikneeb ookiik,
bareeh suurookna shalikna shaliknaatii hooy giigsi andi.
31 Toosiltookna aree oobhar wꞌadarooy Falastiineeb oobhar ookiik iikwasi andi.
Umingaayii oobhar Furaat ookiik iikwasi andi.
Oodehay whaashiib ikweer bareekna nuuni andi.
Baraakna bareeh suurookna galeeli tiyadna.
32 Bareeyooh tari yꞌankwanaayeehna geeb galad baadꞌiina.
33 Bareeh whaashiyookna baasikwarna,
tari baraah anii kehii danuub isidꞌiin hookna.
Bareeyeehna yꞌankwana tꞌabidneek,
sharak dehookna iikti iyadna.>>
idi.