8
Uudehay kassaah gaal takiit Iyami Dheefaay dangaltiib immararaayna.
Baraah Israab whaggi kanaaniga sooyaan.
Been W'ankwana Israa'iil hooy waseeyaab iiktiyeeb Muusaay Whaggi Kitaab haay y'iiniyeet toona sooyaan.
2 Aflaay oomb'i w'awwaliib ootrig w'asaramaay,
Isra ufagiiri whaggi kitaab umajlisi suurii haay eeya.
Umajlisiib tufhama adgiriin daawwa m'atwa kassaah hooy iifiin.
3 Isra ooktaab Iyami Dheefaay suurii tudangaltiib agriiya.
T'aawiitii aree nabhoob ookiik eendaawwa,
teem'atwa,
aaraw tufhama adgiriinnaayi suurii baruuh ooktaab agriiya.
Uudehay kassaah aree Whaggi Kitaab daayiib isnaakirna.
4 Isra teen timanaasabaatee dehaay hindiyee shagaamama tageega mhiini kehii ingad.
Bariiyooh oodar umaygwadii dehaay aree Mattitiyaawwa,
Sham'aawwa,
Anaayaawwa,
Uuriyaawwa,
Hilgiyaawwa,
Ma'asiyaawwa,
ingidna.
Bariiyooh utarhagwadii dehaay aree Fadaayaawwa,
Mishaa'eelwa,
Malkiyyaawa,
Hashuumwa,
Hishibaddaanwa,
Sakariyaawwa,
Mashullaamwa iifiin.
5 Isra ooktaab ingil.
Baruuh oodehayi mhakwal ingidayt,
uudehay kassaah barooh rhiyaan.
Baruuh ooktaab ingilihoob,
uudehay kassaah asti ingadna.
6 Isra W'ankwana Ukwaasana oowin yhamid.
Uudehay kassaah y'ayeehna asti y'abikniit,
<<Aamiin!
Aamiin!>>
idiin.
Malya baraah ignafniit ifiiraahna toobuut shibbee W'ankwana y'abidna.
7 Ilaawi Jeeshiwaawwa,
Baaniiwwa,
Sharabiyaawwa,
Yaamiinwa,
Agguubwa,
Shabataaywa,
Huudiyaawwa,
Ma'asiyaawwa,
Galiitaawwa,
Asariyaawwa,
Yoosabaadwa,
Haanaanwa,
Falaayaawwa,
uudehay masi beentooy ingidneet midda,
baraah oodehay whag sooyaan.
8 Baraah Ukwaasanaay Whaggi Kitaabii agriiyaana.
Uudehay afhamiini jillaay daayiib dehaay tarjamiyaana aree fassariyaan.
9 Uudehay Whaggiit kalma imaasiwnihoob,
kassaah waawiyaan.
Malya Niheemiya whaakimwa,
Isra ufagiiriiwwa ukanaaniigaawwa,
Ilaawi oodehay sooyaanwa,
bareeh kasseeyooh dehaay,
<<Uun uumb'i W'ankwana Ukwaasanaayookna dehaay mugaddasu.
Hooy baagadabaana tari baawaawaana.>>
idiin.
10 Niheemiya <<Difnaat,
tehariwneet m'ariika tamaana,
nafirnaaka gw'aana.
Naat baabariib oodehay aree naat adhidhna.
Uun uumb'i W'ankwanaayoon dehaay mugaddasu.
Baagadabaana!
W'ankwanaayt tifirha bareekna is'akiirna.>>
idi.
11 Ilaawi oodehay kasseeh tim ikwaasna.
Baraah <<Tim akeena,
uun uumb'i mugaddasuuyt,
baagadabaana.>>
idiin.
12 Malya kassaah uudehay tamiini jillaaywa,
gw'iini jillaaywa giigiyaan.
Tim'ari t'iibriineet eeraw y'adhidhna,
aree oont'a baraah ibhali idehaay agriimamiyaan afhamiyaani sabbii,
wint aduuma id'ani jillaay giigiyaan.
13 Tooyin tumalya oodehayi indhiwaay suurkinaawwa,
ifagiiriyaawwa,
Ilaawiiwwa,
Israab ukanaaniigaay oodar immararaayna.
Baraah Whaggiit kalma daayiib afhamiini jillaay eeyaan.
14 Baraah been W'ankwana Muusaay yafii waseeyaab iiktiyeet tiwasi,
ootrig w'asaramaay w'iidiib Y'israa'iili makwaatiib ikweerneet toona whaggiib kataabt akay imriin.
15 Een ibhali aree sooyeetiit,
baraah timadiinaateehna tiknaateebwa Alguduseebwa ibarirneet toonaati.
Baraah <<Irbaayi haash beenaat,
saytuuni l'idwa,
malaali saytuuni hindiiwwa,
sanuubari hindiiwwa,
abanuusi hindiiwwa,
akaay biirwa,
l'andaaseen hindi l'idwa,
haay m'aana malya timakwa d'iina.
Tuun tuuna aree bak kataabtu.>>
idiin.
16 Aflaay uudehay idifna,
hindi l'id haay eeyaaniit aree gaalka whooshiyoohna gaw id'irna.
Baraah Ukwaasanaay gawi darwa,
Iyami Dheefaay dangaltiibwa,
Afraayimiit dangaltiibwa id'irna.
17 Uudehay imitlalii y'agar kassaah makwaat id'iiniit hooy ikwiriin.
Jeeshiwaab Nuuni ooriib udamaanii beet tooyin ookiik,
Y'israa'iili oont'aaneet masi afirhaab kiikeen.
Tifirhaataahna winneet wawint iiktiin.
18 Oomb'i w'awwaliinaay w'agiya ookiik,
Isra Ukwaasanaay Whaggi Kitaabii diimaab agriiyi.
Baraah w'iid asaramaat yina iidiyaan.
Whaggiib kataabt toonaatiit aree,
tooyin t'asimha majlis daami.