Niheemiya Oodehay Yhamraab Isham
5
Oont'a aandaawwa tim'ataahwa isanaayeehna Iyahuudi kehii winneet ashkiimiyaan.
2 Gwadi bareesooh,
<<Hininwa y'araanwa t'artaanwa gwidaaba.
Hinin tameetiit needhhaniyi jillaay ibakii harroob nimeereet toonaati.>>
iidna.
3 Wari aree,
<<Hinin tehargwiiti door harroob nimeeri jillaay,
tidir'aateenwa,
tim'adayaateenwa,
igawaayeenwa arbuuniib nis'abiikeet toonaati.>>
iidna.
4 Masi wari aree,
<<Hinin tidir'aateenwa tim'adayaateenwa dehaay whad'aayt tilba nikweesi jillaay,
mhallagaab nistaliifeet toonaati.
5 Hininwa whaashiyuun uudehaywa gaal jinisa.
Y'araan han bareeyeeh y'areet daayiiba,
laakiin hinin y'areenwa t'arteenwa kishiyaab nikwasi.
Artaan gwadit suur akay kishiyaat ikeen.
Laakiin tidir'aateenwa tim'adayaateenwa wari dehay kinaamiyaanayt,
hinin ootaad ninaw.>>
iidna.
6 Ani toon toowaawwa w'ashkiimtiiwwa amaasiwihoob,
winneet gadaban.
7 Ani beet toona winneet hooy akwin.
Malya isuurkinaawwa idaabtaawwa atehiman.
Ani bareeyooh dehaay,
<<Baraakna udehayookna ookna n'ati teetirna.>>
adi.
Shaawti tehalaagaay hiddaab niitkwikwi jillaay win majlisii dehaay bareeh waliikan.
8 Malya ani,
<<Baliib Iyahuudi girba dehayiib idlab,
hinin utaadiisoon bareeh har'a nidlib niyhi.
Oont'a baraakna isanaayeekna tidalibna,
aree aan baraah hineeb har'a itdaliibna.>>
adi.
Baraah hadiidiineena miraab kiikeenayt,
tim ikeen.
9 Aflaay ani masi asoorarim,
<<Baraak tid'aneet tuuna daayiit kitti.
Oodehay igirbaab y'ashooyeen baaneewsaan hoon.
Ukwaasanaay mirkwaayiib sakteeneet toona kitti han?
10 Aneebwa,
isanaayaawwa,
y'arawaawwa han oodehay mhallagaabwa harroobwa nisiisaliif.
Laakiin oon oodeen afoonay.
11 Baraakna han bareeh tidir'aateehwa,
tim'adayaateehwa,
saytuunoohwa,
igawaayeehwa willa dehaay agirna.
Mhallagaabwa,
harroobwa,
gayi haabwa,
saliitwa,
bareeh naat han baashiikna.>>
adi.
12 Baraah <<N'igir niyad.
Shaawti bareeh weena hooy nhiriw kindi.
Baruuk tidiyeet toona niiwari niyad.>>
idiin.
Malya ani ifagiiriya waliiksanaayt,
isuurkinaawwa idaabtaawwa halafooyiit toona tuwaadiyaayaab ikatiineet id'aneet toona hooy ahariw.
13 Ani masi whalakiitu farda digan,
malya <<Oont'aaneet oon uwaadiya baatakwiikw eenda,
Ukwaasana igawaayeehwa umraayoohwa bak digi indi.
Aflaay bak t'iiteeb uutak digamiit harar ba'iikti!>>
adi.
Beentooy umajlis kassuuh <<Aamiin!>>
idiiniit W'ankwana yhamidna.
Uudehay aree toona waadiyaayaab iiktiineet id'iin.
14 Masi aree,
whad'a Artashiish had'aab iiktiyeekka whawil utagwuugwii,
imhay tamuunwa malu hawla ookiik ani Yahuudaay whaashiib haakim aki.
Een yhawla itamna malooyeeb,
ani tari isanaayi whaakmii dehaay waasamtiit m'ari tamaab kinki.
15 Laakiin yhaakma anii suurii iifiin,
oodehayi kehii akra rabi daasiyaan.
Baraah oodehayii b'eebka fadhig tamuunt jineehi ashteetiit iyiyna.
Masi aree m'ariitwa haabwa hooy iyiyna.
Bareeh ishagaamanaayaahna han oodehay adlimiin.
Laakiin ani Ukwaasana iriikwuuyt bak d'iyaab kaaki.
16 Laakiin ani ugarooyu ookna oon ukirraay shagaay jillaay waasan.
Aniib y'araw kassaah beentooy ushagaay dehaay idbalna.
Haash han harwaab kinki.
17 Masi aree,
aniit tutarabeesaatiib sheebwa ay tamuunwa Yahuudiiwwa daabtaawwa geebu tamiyaan.
Yhadabeeyoon iifiin yhashee eeyaan uudehay han geebu tamiyaan.
18 Oomb'i oongaal yoobwa,
asagwir waasama arginaabwa,
kilay gwadibwa anii dehaay isuumirna.
Tamint yinaatka aree gwida jinsaayi haab haay y'iin.
Tuun kastuuh haayee,
whaakmii dehaay waasamaat tim'ari harwaab kaaki.
Oodehayi kehii tiifiit titilba gwidaat tiiktiyeet toona iktiin.
19 Yaa Ukwaasanaayu,
kastooh oon oodehayii jillaay ad'iyeet toona,
baruuk daayiinaatii sh'aaheeb!