Niheemiya Itooraraab
6
Sanbalaatwa,
Toobyaawwa,
Jashim W'arabiiwwa,
y'ashooyaan aarawwa ukirra itkwakwaayt,
kaakt han hooy mhiyaat bitkaayeet toona imaasiwna.
Oodoor beeb aree ani idheefaayeeb eebab masi d'iyaab kaaki.
2 Sanbalaatwa Jashimwa toon tudiigwat anii dehaay diigwatiyaana:
<<M'aa!
Gariyaat gaanaatiib Oonooy w'atmuuriib nimmarariyeet toonaati.>>
idiin.
Laakiin baraah aneeb adaatiib niyaamiin.
3 Aflaay ani bareeh beeti diigwatkinaab afdig,
bak aree dehaay agwibi:
<<Ani win shaga daayani,
bareek beeti whoogti ka'adgiran.
Ani bareek beeti hoogiit naanhooy ushaga asingadi?>>
adi.
4 Baraah fadhig doora toon tudiigwat tookna diigwatiyaan.
Ani han doorka toon tugwabii tookna dehaay agwibi.
5 Malya,
oodoor w'ayya Sanbalaat tudiigwat tookna ushagaamanaayooh geeb nagaal jawaabiib diigwatiya.
6 Ujawaab bak kataabu:
<<Uudehaywa Jashimwa bhaliib hadiideen.
Baruukwa Iyahuudiiwwa whad'aay kehii finaab niyaamteena attiyoodiyaati.
Oon usabbii aree baruuk ukirra tind'iira.
Masi aree uudehay indiyeeb ibhaliyeeb,
baruuk bareeyooh kehii had'aab tikatiya.
7 Masi aree bariiyook dehaay Alguduseeb beet toona isarid nabiyaab tikwaasa,
baraah:
<Yahuudaay had'aab eefi!>
iyadna.
Oont'a aan ibhali aree whad'aay dehaay it'agiirna.
Aflaay m'aa,
tehalaagaay hiddaab hooy tarootsamni.>>
indi ujawaab.
8 Ani bak dehaay agwibi:
<<Baraak tiyadneet tuuna akaat kitti.
Baraak ugirmaayiisookna tiyadna.>>
adi.
9 Baraah kassaah hinin israakwakwiineet toona jarrabiyaan.
Baraah <<Bareeh y'ayaahna winneet n'akwa,
ushaga aree faayami kiidi.>>
idiiniit ikwinna.
Laakiin ani siileelan,
<<Ukwaasanaay oont'a y'ayeen s'akira.>>
adi.
10 B'eeb gaal ani Shama'iya Dalaayi oor,
Maheetab'iili oori gaw abi.
Baruuh ugawiyooh tehooyteeb assamaa iifi.
Baruuh <<Ukwaasanaay ugawiib,
udiini gawi tehooyteeb nimmiriri.
Da y'eetiit idaar hook iyadna.
Baraah hawaad y'eetiit idaar hook iyadnayt,
udiini gawi dheefa nhikwir.>>
idiheeb.
11 Laakiin ani,
<<Aneeb t'iiti tak ifoori han?
Tari aneeb t'iiti tak ishuukeeh ishidhhiini jillaay udiini gawiib shuumiini han?
Ani giigi kaadi!>>
adi.
12 Ani ashbibihoob,
Shama'iyaab Ukwaasana diigwataab biikaayeet toona akan.
Laakiin baruuh anii kehii siruud haay iikwsiyeeb usabab,
Toobyaawwa Sanbalaatwa barooh kiriyaaba.
13 Baruuh aneeb iifiki jillaay karaayi.
Aflaay ani naat gwibibtiit danuub akwasiyeet toona yhiriw.
Malya baraah aree aneeb amaag sim simtiit neewseeneet toona yhiriwna.
14 Ani siileelan,
<<Yaa Ukwaasanaayu,
Toobyaawwa Sanbalaatwa id'iineet toomaag sh'aa!
Masi aree tunabi Noo'aadiyaatwa,
inabiya eeraw aneeb isriikwakwiinwa sh'aa!>>
adi.
Ukirra Faayamiya
15 Aflaay ukirra ootrig Ayluul tutagwgwu ayyaatiib timmiimiya.
Ay tamuunwa maloot yina aree iyhi.
16 Y'ashooyaan kassaah toon toona imaasiwnihoob,
kassaah idehaya yhadabeeyoon iifiin irkwiina aree b'iint hooy daata.
Oon ushaga Ukwaasanaayt shamaamtii daamaab ikatiyeet toona ikannayt irkwiin.
17 Masi aree baliit teeyina Yahuudaay isuurkina Toobyaab ookiik gwida jawab diigwatiin.
Toobya han bareeyooh dehaay igwiib.
18 Gwida dehay Yahuudaay iifiin Toobyaay geeb ingadna.
Iyahuudi Shakaanya Aarhaay oor bariiyooh ham iikti.
W'ooruuh Yoohaanaan aree Mashullaam Barakhiyaayiit oot d'iraabuuyt,
uudehay bariiyooh geeb ingadna.
19 Masi aree,
baraah bariitooh tudaayiinaay anii dehaay hadiidiyaan.
Malya aree aniib ibhali barooh sooyaan.
Toobya aree faakiit diigwata anii dehaay ifdig.