Maghāmbo ^ghalokasūlika mu nfuku sya ku bhuhela
3
Ughwe Timoseo, ndikuhensa umānye kubhala nfuku sya ku bhuhela kulokabha liima ikaka nkana. 2 Leelyo liima, bhantu bhalokabha bhetēhile bheene, bhalokabha ne iitama lya mpijha, bhalokabha bhakanya kwitiipa, bhakanya bhutulunfi, bhakanya matusi, bhasila kujhimbika bhafyasi bhaabho, bhasila kusīima, bhasimutiikisye Kabhumba. 3 Kabhili, tebhakatēhe muntu ghoghonse, tebhakatēhe kusaana, bhalokabha bhaghambanyi, tebhakabhe bhantu bha kwijhughalalila, bhalokabha bhakali, tebhakatēhe masogha. 4 Bhalokabhahīnduka bhenaabho, bhalokabha bhalikukola lusaka lusaka, bhalokabha bha myala. Bhalokabha bhatēhile iitama ibhi lya hanu ha bhweleelo kusumba kumutēha Kabhumba. 5 Bhaabho bhantu bhalokalōleka ni bhantu bhalikumupeela Kabhumba, tukubha mu myēgho jhyabho bhalikughatuna managha gheke Kabhumba gha kuhīndula nsembo syabho. Ghwaliijheka na bhantu bha jheejhyo nsembo.6 Mu bhaabho bhalimo ^bhalikwingila ku bhubhi mu ngo sya bhantu, kubhalemba bhanabhakeema bhangalangala. Bhaabho bhanabhakeema bhakasumbilwa na bhubhi, bhalikujhejhesibhwa ne iitama ibhi. 7 Bhaabho bhanabhakeema bhalikujhigha nfuku syonse, tukubha bhalikupootwa bhuliko kubhumānya bhwene. 8 Bhaabho bhamakota bhalokabhutuna bhwene, kobhe tilya Jhane no Jhyambule, bhobhakamutunilanga Musa.a Bhaabho bhantu bhakabhiiha masāla, bhakalēka kwisigha kwabho. 9 Tukubha tebhakobhwele kufīka hohonse, bhukohela bhungalangala bhwabho bhulomānyika ku bhantu bhonse, kobhe bhofikabheele kwa Jhane no Jhyambule.
Malaghi gheke Paulo kwa Timoseo
10 Tukubha ughwe Timoseo, ghwalōnda malāngululo ghaane, nsembo jhyane, kulanganyia kwane, kwisigha kwane, no kutuusya mwēgho kwane, 11 kutēha kwane no kumila mwēgho mu kusamba kwane. Ughajhinsi maghāmbo ghonankēlilwanga ku Antiokia, ku Ikonilo no ku Lisitila.b Nankamilanga mwēgho ku makaka ghonse, no Sifwe Bhusya Jheesu ghakansābhulanga ku ghaagho ghonse. 12 Kansi, bhantu bhonse ^bhamwisighile Jheesu Kiliisito bhanēela na gha kumulyohya Kabhumba, bhalobha bhalikusanfisibhwa. 13 Bhantu bhēela bhubhi na bhakanya malami, bhalosiibha no bhubhi bhwabho, bhalobha bhalikutebha bhanatebhwa.
14 Tukubha ughwe Timoseo, bhāngilila ghalya ghoghwakalāngululwanga ghwanaghesigha, bhukohela ubhajhinsi ^bhakabheele bhalikukulāngulula. 15 Kufuma bhutwana, ulijhinsi Ighāmbo lyeke Kabhumba. Maghāmbo ghaagho ghalikukusūla kumānya kubha ti, kusābhulwa kulikulōleka kwi isiina lyeke Jheesu Kiliisito. 16 Ighāmbo lyolyonse lyeke Kabhumba, linyeghilwe ku kulombolwa na Kabhumba. Leelyo likobhwele kulāngulula bhwene, kubhakabha bhantu bhalēke bhubhi bhwabho, kubhalomba hobhabhiihya no kubhalānsya kwīla ghalya ghwahensile. 17 Maghāmbo ghaagho gho ghalikusūla bhantu bheke Kabhumba bhakole ghonse masogha.