4
Ughwe Timoseo, ndikukulaghiila ha mbele jhyeke Kabhumba, na ha mbele jhyeke Jheesu Kiliisito, ^alokabhakalila ^bhali bhupanga na bhafu. Unyene gho alokeesa ha bhweleelo mukujhima kobhe mwami. 2 Nonwe, ubhe nolikutangaasya Sikūla Sisogha syeke Kabhumba. Ghwabha nokwiliile kwīla teetyo liima lyolyonse, ku liima isogha ne lisili isogha. Ghwabha nolikubhakabha, nolikubhakalihila no kubhasīipya bhantu. Teghwajhīla teetyo, kooku nolikubhalāngulula ntusya mwēgho.3 Ndikukulomba teetyo, bhukohela lilokeesa liima lya kukabha bhantu tebhakahulikisye malāngululo gha bhwene. Bhalokahensa kuhulikisya ghalya ghakubhalyohya bhuhela, no kusāaghula bhamakota bhengi, bha kubhalāngulula ghalya ghobhatēhile kuhulika. 4 Bhalokalēka kuhulikisya bhwene, bhalōnda nsumuulilo sya kale sisili no bhwene bhobhonse. 5 Tukubha ughwe Timoseo, ghwabha menso ku ghonse, ghwamila mwēgho mu kusamba. Ghwakola mulīmo ghwa kutangaasya Sikūla Sisogha, teghwajhīla fisogha mu bhukola milīmo bhoobhe bhonse.
6 Ndikukulomba ghaagho, bhukohela liima lyane lya kufwa lili habhwihi. Malaso ghaane ghali habhwihi kufumisibhwa kobhe divai ha bhulunga bhwa ipeelelo.a 7 Ghwalifinda kusoola isumo isogha lya kwisigha kwetu, lubhilo lwane nanduhwa fisogha, nankubhāngilila fisogha kwisigha kwetu. 8 Nonwe nhembeele tue kuheebhwa ngala jhya bhusila kanyanyala. Sifwe Bhusya Jheesu mukala bhwene, ghwalokampa jheejhyo ngala ifuku lya kuheleela kwajhe. Jheejhyo ngala teghakampe une bhuhela, alokabhaha na bhandi bhonse ^bhalisighile kuheleela kwajhe.
Kusēegha kweke Paulo kwa Timoseo
9 Ughwe Timoseo, jhīla bhwangu ujhise kumwane, 10 bhukohela Deema ghandēka. Unyene ghakatēha maghāmbo gha ha bhweleelo, ghahamba lwēndo lwa kujha mu lugho lwa Tesalonike. Kelesike ghaajha mukakola mulīmo ghweke Kabhumba mu sihugho sya Ghalatia, no Tiito naagho ghaajha mu sihugho sya Dalimatia. 11 Luuka unyene ghongwa gho ghasīibha kumwi nane hanu. Nonwe, kubha ghwajhisa kunu, ghwajhisa no Maaliko, bhukohela akobhwele kunfūnaanila mu mulīmo ghweke Kabhumba. 12 Nankamulaghilanga Tikiko kujha kooko ku lugho lwa Efeso. 13 Kubha ghwajhisa, ghwajhisa ne ikooti lyane lyonankalēkanga kulya kwa Kaalipo mu lugho lwa Toloa, kumwi ne fitaabhu fyane, nkana filya fya nsabha.
14 Alekisanda, ghulya musula majhēla, ghakanjililanga maghāmbo mabhi nkana. Sifwe Bhusya Jheesu alokamukalila ku maghāmbo ghaajhe. 15 Noghwe mu kusumba naajhe nobhengile, bhukohela akabheele nalikughatuna nkana malāngululo gheetu.
16 Bhonankeghongeelanga kwi ibhalasa lwa kusumbula, tyakabheeleho singa tu ghumwi ^ghakajhughalalanga luhande lwane, bhonse bhakandēkanga. Ndikumusēegha Kabhumba abhalesisye bhoobho bhubhi. 17 Tukubha Sifwe Bhusya Jheesu akabheele kumwi nane. Ghakampekesyanga managha gha kutangaasya Sikūla syonse Sisogha, aleke bhantu bhonse bhasili Bhajhahudi bhahulike. Ghakansābhulanga kufuma hakuti, bhukohela nkabheele kobhe ndi mu kanywa ka nsimba. 18 Nyinsi kubha ti alakubha nalikunsābhula mu mabhi ghonse no kumpa bhupanga, nonsumwa nanfīka mu Bhwami bhweke Kabhumba.
Sifwe Bhusya Jheesu alumbwe, nfuku syonse bhusila ha bhuhela. Na fibhe bhoobho.
Maghāmbo gha kwitāahya
19 Ghwamutāahya Akila no mukasi Pilisikila, na ^bhali mu lugho lweke Onesifoolo. 20 Elasito ghakasibhanga mu lugho lwa Kolinto. Tolofimo nankamulēkanga ku lugho lwa Mileto, akabheele mulwele. 21 Nonwe, jhīla bhwangu ujhise kunu sisyali kufīka nfuku sya luheehi. Hebhulo, Puude, Liino, no Kilaudia, kumwi na bhahemba bheke Jheesu bhonse, bhalikukuposya.
22 Sifwe Bhusya Jheesu abhe kumwi naghwe. Ndikusēegha kubhala sighōngo syajhe sibhe kumwi namwe mwense.