Kumila mwēgho mu mulīmo ghweke Kiliisito
2
Nonwe ughwe Timoseo mwanaane, Kabhumba akuhe managha ku sighōngo syoheebhilwe no Jheesu Kiliisito. 2 Ghwakahulika malāngululo ghonankalāngululanga ha mbele jhya bhakalōla bhengi. Nonwe ghatwale ghaagho mubhaheekesye bhantu ^bhesighiilweko, ^bhakobhwele kulāngulula bhandi.3 Mila mwēgho mu kooku kusamba, bhukohela uli musilikale ghweke Jheesu Kiliisito. 4 Hatuhu musilikale musogha ^akolēka kukola mulīmo ghwa bhusilikale, ajhingile mu milīmo jhisili jhya bhusilikale. Tyakojhingila mu jheejhyo, bhukohela alikuhensa kumulyohya munyampala ghwajhe. 5 Singa muntu ghasaaha fisogha, tyanaheebhwa lufuho kubha ghaabhula kulōnda mitontelo jhya kusaaha. 6 Kabhili, muntu ^alikwifinda kukulula, ghwakobha ghwa kusumbula kubheesya fyakulya. 7 Timoseo, ghalanganyie nkana maghāmbo ghondikukulomba. Sifwe Bhusya Kabhumba alokufūnaanila kughamānya ghonse.
8 Mwisukile Jheesu Kiliisito ghwa bhukwa bhweke mwami Daudi. Kabhumba ghakamusyulanga kufuma ku bhafu. Seesyo gho Sikūla Sisogha syondikutangaasya. 9 Ku seesyo sikūla, une ndikusamba naneghalilwa kobhe mubhiihya. Tukubha Ighāmbo lyeke Kabhumba telineghalilwa. 10 Teetyo, misile mwēgho ku ghonse ku bhantu ^bhakasāaghulwa na Kabhumba bhabhe bhantu bhaajhe. Ndikukola teetyo, aleke naagho bhasābhulwe ku nsīla jhya kumwisigha Jheesu Kiliisito no kubha hamwi naajhe mu njimiisi jhyajhe jhya bhusila ha bhuhela.
11 Ighāmbo leeli ni lya bhwene, kubhala,
“Kubha twakafwanga hamwi no Kiliisito,
tulokabha bhupanga kumwi naajhe.
12 Kubha tulikumila myēgho ku kusamba,
tulokajhima kumwi naajhe.
Kubha twamutuna nyene,
naagho alokatutuna.
13 Kubha ufwe tusili ^bhesighiilweko kumwajhe,
unyene alakusiibha nalisighiilweko,
bhukohela unyene tyanelēkanyia bhuliko.”
Malaghi kwa mukola milīmo mutendeke ghweke Kabhumba
14 Ghwabhesukisya bhahemba bheke Jheesu maghāmbo ghaagho, ghwanabhakabha ha mbele jhyeke Kabhumba, bhalēke kutambaana ku maghāmbo matooli matooli. Kooko kutambaana tekuli na bhusabhaghala, kulikubhabhiihya ^bhalikughahulika. 15 Ghwalifinda kulānsya kubha ti Kabhumba ghakuswesya ubhe mukola milīmo ghwajhe, musila nsonyi, ^alikulāngulula fisogha Ighāmbo lyeke Kabhumba lya bhwene.
16 Liijheke na maghāmbo mabhi ghasili ne iijhobho lyolyonse, bhukohela ghaagho ghalikubhabhiika bhantu hale na Kabhumba. 17 Malāngululo ghaabho ghalikughungilika kobhe silōnda sisikosila. Mu bhaabho bhalimo Himenajho no Fileto. 18 Bhaabho bhataajhika nkana, bhabhulēka bhwene ku kutenda kubhala, kusyuka kwa bhafu kwakahita. Ku kulāngulula teetyo, bhalikubhiihya kwisigha kwa bhantu bhandi. 19 Tukubha bhahemba bheke Jheesu ^bhasīipile fisogha, ni kobhe musingi musīipe ghubhiikilwe na Kabhumba. No ku lughamba no ghoogho musingi kuli maghāmbo ghanyeghilwe kubhala,
“Sifwe Bhusya Kabhumba abhajhinsi bhantu bhaajhe,”a
kabhili,
“Muntu ghoghonse ^alikwijhita kubha ti unyene ni ghweke Sifwe Bhusya Kabhumba, aleke bhubhi.”b
20 Mu nyumba nkulu filimo fibhya fya namba na namba, filimo fya sahabhu ne mpijha, filimo fya bhulongo ne fiti. Findi fijhimbiikwe, findi tefijhimbiikwe. 21 Nonwe, muntu ^ghaliihala kulēka bhoobho bhubhi bhonse, alobha kobhe sibhya ^sitenteekwe ku mulīmo ghwajhe musogha. Alobha musogha kwa Sye Bhusya, kabhili alobha nakwiliile ku milīmo jhyonse misogha.
22 Filēke fintu fya iitama ibhi lya silughalugha, ulōnde maghāmbo gha bhwene, ubhe na kwisigha, kutēha na maholo. Ghwajhīla teetyo kumwi na bhandi ^bhakotendajhyuka kwa Sifwe Bhusya Kabhumba ku mwēgho mulafu. 23 Liijheke kutambaana ku maghāmbo gha singalangala gha bhusila iijhobho, bhukohela ujhinsi ti kwīla bhoobho kukosūla masōola. 24 Kabhili, tefihenseelwe mukola milīmo ghweke Sifwe Bhusya kubha ghwa masōola. Tukubha ahenseelwe kubha mutendeke ku bhantu bhonse. Abhe muntu ghwakukabha nakobhwele kulāngulula no kumila mwēgho. 25 Ahenseelwe abhe nalikubhakabha ku bhutendeke bhantu ^bhalikutambaana naajhe, akulinga hamwi Kabhumba anabhafūnaanila bhaghalaghala no kubhumānya bhwene. 26 Hamwi masāla ghaabho ghanabhaheleelela kabhili, bhafume mu mabhoko gheke Syetani. Unyene ghakabhanīgha bhabhe bhalikukola fyahensile.