Lupapulo lwa bhubhili lweke Paulo kwa
Timoseo
Paulo alikumuposya Timoseo
1
Loolu lupapulo nyeghile une Paulo. Nankasāaghulwanga kubha muntengwe ghweke Jheesu Kiliisito kobhe Kabhumba bhwahensile. Kabhumba ghakandaghilanga kutangaasya kubhala bhulya bhupanga bhoghakabhalanga kutuha, bhulikulōleka ku kumwisigha Jheesu Kiliisito. 2 Ndikukunyeghela ughwe Timoseo, mwanaane ntone.Ndikusēegha kubhala sighōngo na maholo kufuma kwa Taata Kabhumba, no kwa Jheesu Kiliisito Sifwe Bhusya, fibhe hamwi naghwe.
Maghāmbo gha musīimo na gha kumusīipya Timoseo
3 Ndikumusīima Kabhumba ghondikukolela milīmo ku mwēgho musogha, kobhe bhobhakamukolelanga bhanyinefwekulu. Teetyo, mafuku ghonse mu kutendajhyuka kwane bhufuku ne isyubha, nkobha nenkwisukiile. 4 Njisukiile ndiilo syobhe bhotukabheele tulikwitāahya. Ndikuhensa nkana kusangaana naghwe kabhili, aleke mwēgho ghwane ghusangabhale. 5 Kabhili, njisukiile kwisigha koobhe kwa bhwene. Kooko kwisigha, akabheele nako nyokokulu Loisi no nyoko Eunike. Ntembekeesye kubha ti, noghwe ulisighile teetyoe. 6 Teetyo, ndikukwisukisya kubhala, ghwalifinda kughakosya managha ghoghakakuhanga Kabhumba mukubha nendikukubhiikila mabhoko.a 7 Jhīla teetyo, bhukohela mwēgho ghoghakatuhanga Kabhumba te ghwa bhoobha, ni ghwa kutuha managha, kutēha no kwijhughalalila.
8 Kundi, nosilōli nsonyi kubhatembekesesya bhantu Sikūla syeke Sifwe Bhusya Jheesu Kiliisito, ajhe kulōla nsonyi bhukohela une bhondi mwi ighelesya ku nfūno jhya kumutangaasya. Tukubha, mila mwēgho mu kooku kusamba hamwi nane, ku Sikūla Sisogha, ku managha gholikuheebhwa na Kabhumba. 9 Unyene ghakatusābhulanga, ghatwita tubhe bhantu bhaajhe bhasila kanyanyala. Teghakēlanga teetyo bhukohela bhotuli na milīmo misogha, tukubha ghakēlanga teetyo kobhe bhwahensile unyene no ku sighōngo syajhe. Kabhumba ghakatwīlilanga teetyo ku nsīla jhyeke Jheesu Kiliisito, nasyali no kubhumba bhweleelo. 10 Tukubha nonwe, Kabhumba ghalāngisya sighōngo syajhe kumwetu, ku kwisa kwajhe Jheesu Kiliisito Kasābhula ghwetu. Unyene ghasumba managha gha liilufu, ghanalānsya no bhupanga bhwa nfuku syonse ku nsīla jhya Sikūla Sisogha.
11 Ku seesyo Sikūla Sisogha, nankasāaghulwanga kubha mulonfi, muntengwe kabhili ikota. 12 Ghooghu mulīmo ghwa kutangaasya Ighāmbo lyeke Kabhumba, gho nfūno jhya kusamba kwane mwi ighelesya. Tukubha nsibhwene nsonyi, bhukohela une mujhinsi ghondisighile. Kabhili nyinsi mpola sya bhwene syampeele Jheesu Kiliisito. Unyene alosibhāngilila seesyo mpola mpaka lyakwila ifuku lya kuheleela kwajhe. 13 Ghwanīgha fisogha malāngululo gha bhwene ghonankakulāngululanga. Ghwalāngulula ghaagho ghwanasiibha nolisighile no kutēha ^kufumile kwa Jheesu Kiliisito. 14 Sikūla sya bhwene syoghwakahebhwanga, sibhāngilile ku managha gha Mwēgho Mulafu ghweke Kabhumba ghotuheebhilwe mu myēgho jhyetu.
15 Ughwe ujhinsi kubha ti, bhantu bhonse bha mu sihugho sya Asia bhandēka. Mu bhaabho alimo Fighelo no Helimaghene. 16 Ndikusēegha Sifwe Bhusya Jheesu abhalōlele sighōngo bha ku lugho kwa Onesifoolo, bhukohela akabheele teghandyohya mwēgho ghwane. Kabhili, teghakalōlanga nsonyi kwisa mukundōla bhonkabheele mwi ighelesya. 17 Bhoghakesanga munu mu lugho lwa Luumi, ghakanhesanga nkana ghasumwa ghandōla. 18 Noghwe ujhinsi fisogha, bhuli bhoghakanfūnanilanga mu lugho lwa Efeso. Sifwe Bhusya Jheesu amulōlele sighōngo Onesifoolo mwi ifuku lyajhe lya kuheleela.