Lwēndo lweke Paulo lwa kujha ku Jhelusalemu
21
Bhotwakahwanga kwitāahya na bhaghosibhakulu bha kaniisa lya haaho ha Efeso, twatanda mu meeli, twajha syalimwi mpaka mu kalila ^kakabheele kajhitilwe Koosi. Mulāabho ghwajhe, twajha mu kalila ^kakabheele kajhitilwe Loodo. Kufuma haaho, twajha kabhili twasumwa twafīka mu lugho lwa Patala. 2 Haaho, twapāta jhindi meeli ^jhikabheele jhilikughambuka kujha mu sihugho sya Foinike. Twatanda moomo twajha najhyo. 3 Bhotwakafīkanga ha kubha tubhwene kalila ka Kiipulo, twakalēka luhande lwetu lwa kunso. Bhotwakabhanga twafīka mu lugho lwa Tiilo mu sihugho sya Siilia, twasooka kufuma mu jheejhyo meeli, bhukohela haaho hobhakabheele bhalikusoosya miligho. 4 Kooko, twakasangaananga na bhahemba bheke Jheesu, twajhīkala nabho nfuku ndwi. Bhaabho bhahemba, bhalombwelwe na Mwēgho Mulafu ghweke Kabhumba bhamubhalila Paulo, nasijhi mu lugho lwa Jhelusalemu. 5 Nfuku syetu sya kubha haaho bhosyakabhanga syahwa, twabhuuka twajhililika na lwēndo lwetu. Bhahemba bhonse, bhanabhaghoosi kumwi na bhakasi bhaabho na bhaana bhaabho, bhatuhelekesya mpaka kunse na loolo lugho. Twasukama haaho he isinsi, twatendajhyuka kwa Kabhumba. 6 Kundi twalitaahya, twatanda mu jheejhyo meeli, bheene bhaheleela kumyabho.7 Twajhililika na lwēndo lwetu kufuma haaho ha Tiilo, twafīka mu lugho lwa Tolemai. Twabhaposya bhahemba bha haaho, twajhīkala nabho ifuku limwi. 8 Mulāabho ghwajhe, twabhuuka mpaka mu lugho lwa Kalisaalia. Twajhīkala mu nyumba jhyeke Filipo, ^akabheele ikota ghwa Sikūla Sisogha syeke Jheesu. Nonyene akabheele ghumwi mu bhalya ndwi bhakasāaghulwanga kubhaghabhulila fyakulya bhahemba kooko ku Jhelusalemu.a 9 Ghoogho Filipo, akabheele na bhaana bhaajhe bhahāla bhane, bhaabho bhakabheele ketebhaaghwa ilaghu.
10 Bhotwakabhanga twajhīkala nfuku singana haaho ha Kalisaalia, ghakesanga mughwelaghu ghumwi kufuma ku sihugho sya Jhudea. Ghoogho mughwelaghu ghajhitwa Aghabho. 11 Ghoogho Aghabho ghatwisila, ghatwala musipi ghweke Paulo, ghalihamba maghūlu na mabhoko ghaajhe nyene. Kundi ghatenda kubhala, “Mwēgho Mulafu ghweke Kabhumba ghaabhala, ‘Teeti gho bhuli Bhajhahudi bhobhalokamuhamba nyene ghooghu musipi kooko ku Jhelusalemu, bhalokamubhiika mu mabhoko gha bhantu bhasili Bhajhahudi.’ ”
12 Kundi, bhotwakahulikanga teetyo, ufwe kumwi na bhahemba bha haaho, twamulebhelesya Paulo nkana, kubhala nasitandi kujha mu lugho lwa Jhelusalemu. 13 Tukubha Paulo ghatuhindula kubhala, “Kusi mulikundilila no kunyingika mwēgho? Une nankehala kwighalilwa singa kwabha kufwila haaho ha Jhelusalemu, kwi isiina lyeke Sifwe Bhusya Jheesu.” 14 Bhotwakalōlanga ghatuna kuhānwa nofwe, twahumbula, tulikutenda kubhala, “Fyahensile Sifwe Bhusya gho fikoleke.”
15 Maghāmbo ghaagho bhoghakabhanga ghahwa, twatelenkanyia, twatanda kujha ku Jhelusalemu. 16 Bhahemba bhandi bheke Jheesu haaho ha Kalisaalia, bhatuhelekesya mpaka kwa muhemba ghumwi ajhitilwe Munasoni, akulinga tukēkale kumwajhe. Ghoogho muntu ghakafumanga ku kalila ka Kiipulo, akabheele mu bhalya bhahemba bha kusumbula.
Paulo ghafīka ku Jhelusalemu
17 Bhotwakafīkanga haaho ha Jhelusalemu, bhahemba bheneetu bhatusangaanila bhasangabheele. 18 Mulāabho ghwajhe, twajha no Paulo mukasangaana na Jhakobho. Na bhaghosibhakulu bhonse bha kaniisa bhakabheeleho. 19 Paulo ghabhaposya, kundi ghabhalomba fibhalwa fyonse ighāmbo limwi limwi, Kabhumba fyakabheele ghakola ku bhantu bhasili Bhajhahudi kuhitila kumwajhe.
20 Bhobhakabhanga bhahulika ghaagho maghāmbo, bhamutiikisya Kabhumba. Kundi bhamulomba Paulo kubhala, “Ghwamughana ghwetu, ubhwene bhuli bhofili Bhajhahudi maghāna na maghāna bhobhakamwisighanga Jheesu. Bhaabho bhonse, bhali na majhemi nkana kulōnda Kabhāngo keke Musa. 21 Tukubha bhalombwa ku luhande loobhe kubhala, ulikulāngulula Bhajhahudi bhonse ^bhēkeele mu findi fihugho, bhalēke kulōnda kaako Kabhāngo. Kabhili kubhala, ulikubhalesya bhalēke kubhaputa nkōpa bhaana bhaabho,b bhalēke kulōnda mughenyi ghwetu. 22 Nonwe twīle bhuti? Bhajhahudi bhalohulika kubha ti, uli hanu. 23 Nonwe, tulikuhensa ukole ighāmbo lyotulakukubhalila. Mu ufwe haaha, bhaliho bhanabhaghoosi bhane, ^bhakalya kahīgho ha mbele jhyeke Kabhumba. 24 Ku teetyo lipampike ku bhaabha, uliifūle hamwi nabho, ubhalihile bhabheghwe nyele syabho. Ku kwīla teetyo, muntu ghoghonse alomānya kubhala ti, fibhalwa fyobhakabhalilwanga luhande loobhe te fya bhwene, no kubha kabhili, ughwe ukanīghile Kabhāngo keke Musa. 25 Tukubha, ku luhande lwa bhalya bhasili Bhajhahudi, bhakamwisighanga Jheesu, twakabhanyeghelanga lupapulo lwa kubhalomba maghāmbo gho twakatendanga syahamwi. Twakabhalombanga bhalēke kulya nyama sya kupeela, bhasibhi bhalikulya malaso, kabhili bhasili nyama sya manywele gha kukulika, no kubha bhasijhīli bhulabha.”c 26 Kundi mulāabho ghwajhe, Paulo ghabhafela bhaabho bhanabhaghoosi bhane, ghalifūla hamwi nabho. Ghajhingila mu lusinga lwa Nyumba Nkulu jhya Ipeelelo lyeke Kabhumba, aleke atangaasye nfuku sya bhuhela sya kufūlwa kwabho, ne mpeesi ^jhilofumisibhwa jhya kubhafūla.
Paulo alikunīghwa
27 Nfuku ndwi sya kufūlwa bhosikabheele sili ku bhwihi kuhwa, Bhajhahudi bhandi kufuma ku sihugho sya Asia, bhakamulōlanga Paulo ha Nyumba Nkulu jhya Ipeelelo. Bhamusongelela ku linyabhwingi lya bhantu bhamunīgha. 28 Bhatenda ku silongo sikulu kubhala, “Umwe Bhesilaheeli bheneetu, mutufūnaanile! Muntu ghooghu gho ghulya, alikulāngulula bhantu bhonse bha mpande syonse, bhabhe bhalikututunguula, no kutunguula Kabhāngo keke Musa kumwi ne Nyumba Nkulu jhya Ipeelelo. Hamwi na ghaagho ghonse, ghajhingisya bhantu bhasili Bhajhahudi ha Nyumba Nkulu jhya Ipeelelo, ku teetyo, ghalunga misīlo jhya Ipeelelo.”d 29 Bhakatendanga teetyo bhukohela bhakamulōlanga Paulo mu lugho, hamwi no Tolofimo. Bhalanganyia ti Paulo akabheele ghamujhingisya ha Nyumba Nkulu jhya Ipeelelo lyeke Kabhumba. Ghoogho Tolofimo ni muntu ghwa ku Efeso.
30 Kundi lugho lonse lwa Jhelusalemu lwabha na kajhombe. Bhantu bhajhisa bhalikukilima kufuma kooku no kooku, bhamunīgha Paulo. Kundi bhamutamba kufuma haaho ha Nyumba Nkulu jhya Ipeelelo. Misīgho jhya jheejhyo Nyumba Nkulu, jhyajhīghalwa. 31 Bhobhakabheele bhalikuhensa kumwihagha, fibhalwa fyamufīkila munyampala ghwa bhasilikale bha Siluumi kubhala ti, lugho lonse lwa Jhelusalemu lwabhumbika kajhombe. 32 Kundi ghatwala bhasilikale bhaajhe, kumwi na bhakulu bhandi bha bhasilikale, bhasooka lubhilo kujha kooko ku kajhombe. Bhalya bhantu ^bhakahulanga kajhombe bhobhakamulōlanga ghoogho munyampala na bhasilikale bhalikwisa, bhaalēka kumuhuula Paulo. 33 Haaho ghoogho munyampala ghakoleela ghamunīgha Paulo, ghalaghiila kubha ti, ahambwe na mighīla ibhili. Kundi ghabhasya kubhala, “Ghooghu ni ghanyi? Ghaajhīla sighanyi?” 34 Bhantu bhahuula kajhombe nkana, bhandi bhatenda itye na bhandi itye. Ghoogho munyampala ghwa bhasilikale bhoghakabhulwanga muntu ghwa kulomba bhwene, ghalaghiila Paulo afelwe mu lusinga lwa bhasilikale. 35 Paulo bhoghakabhanga ghafīka ha ntandilo, bhasilikale bhamunyanyula mu lughamba, bhukohela bhantu bhakabheele bhepatile nkana. 36 Ghulya mulēgha ghwa bhantu, ghwajhililika kuhuula kajhombe bhalikubhala “Mwihaghe ghoogho!”
Paulo alikufumya muhogho ghwajhe ha mbele jhya Bhajhahudi
37 Paulo bhobhakabheele bhalikuhensa kumwingisya moomo mu nyumba jhya bhasilikale, ghamulomba ghoogho munyampala kubhala, “Teeti unanhulikisya inkutānyisye ighāmbo limwi?” Kundi ghoogho munyampala ghamuhindula kubhala, “Kansi, ughwe ujhinsi Sijhunani! 38 Ughwe tuli Mumiisili akasūlite kajhunga mu nfuku sya ha bhwihi, ghabhalombolola bhehaghanyi elufu ine kujha mwi isala?”
39 Paulo ghamuhindula ghaabhala, “Une ndi Mujhahudi, mufyalwa ghwa mu lugho lwa Taaso sihugho sya Kilikia. Lugho loolo luli na mpunda nkana. Ndikuhensa undēke insāhule na bhaabha bhantu.” 40 Ghoogho munyampala ghwa bhasilikale ghamuswesya, Paulo ghajhughalala ku ntandilo, ghabhatalikila kubhoko kwajhe aleke bhaabho bhantu bhahumbule. Bhonse bhahumbula, Paulo ghatenda nabho, ku katendelo kaabho ka Sihebhulania. Ghatenda kubhala,