Paulo ajhiile ku Makedonia no ku Bhujhunani
20
Kajhunga ka ku Efeso bhokakabhanga kaahwa, Paulo ghakabhetanga bhahemba bheke Jheesu, ghabhasīipya mwēgho. Kundi ghabhatāahya, ghabhuuka kujha mu sihugho sya Makedonia. 2 Mukubha nalikuhita mu seesyo sihugho, akabheele nalikujha ghabhalomba bhahemba fibhalwa fingi fya kubhasīipya mwēgho. Kundi ghafīka mu sihugho sya Bhujhunani. 3 Moomo ghakahwangamo myensi itatu. Bhwakabheele nali ha bhwihi kuheleela mu sihugho sya Siilia ku nsīla jhya meeli, ghapāta bhwaku kubhala, Bhajhahudi bhengana bhajhīkala kalimbo ka kumwīlila mabhi. Kundi ghalanganyia kuheleela ku kuhitila nsīla jhya ku Makedonia.4 Ku mafuku ghaagho, Paulo akabheele nalōndenkene no Sopatelo mwana Piilo, muntu ghwa mu lugho lwa Bhelojha, Alisitaliko no Sekundo, bhantu bha mu lugho lwa Tesalonike, Ghaajho, muntu ghwa mu lugho lwa Delibhe, Timoseo na bhantu bhabhili bha ku Asia, Tikiko no Tolofimo. 5 Bhaabho bhantu, bhakatulombolelanga bhaajha mukatuhembela mu lugho lwa Toloa. 6 Mafuku gha mubhāla ghwa mabhu ghasibhikilwemo bhumelaa bhoghakabhanga ghahwa, twakafumanga mu lugho lwa Filipi ku nsīla jhya meeli. Twalyāta lwēndo lwa nfuku itaanu, kundi twafīka ku Toloa. Bhotwakafīkanga kooko, twasangaana na bhalya bheneetu. Twajhīkala haaho, nfuku ndwi.
Paulo alikumuhembuula Eutiko
7 Ifuku lya kusumbula lya nyumab twakomenkana hamwi, aleke tulye hamwi fyakulya fyeke Sifwe Bhusya. Kundi Paulo ghasumbula kubhalāngulula bhantu, bhukohela akabheele nabhasile kubhuuka mulāabho ghwajhe, ghajhililika kulāngulula bhwasumwa bhwabha bhufuku kati. 8 Kulya kukati kotukabheele twakomenkana, tumūni twingi tukabheele tulikughaka moomo. Jheejhyo nyumba jhikabheele jhya kapungu.
9 Mu nkengelesi jhya kooko kukati, akabheele najhīkeeleho mulughalugha ghumwi akabheele najhitilwe Eutiko. Mulughalugha ghoogho ghasumbula kukunila, ghasumwa ghaghōna bhukohela Paulo ghajhililika kulāngulula kwi ikunka ikulu. Bhwakabheele ghaghōna, ghahitila mu jheejhyo nkengelesi kufuma ku kapungu, ghahona hansi. Kundi bhantu ^bhakesanga mu kumusōla, bhamusānga ghasumaalika. 10 Paulo naagho ghasooka hansi, ghamubhungatila ghoogho mulughalugha, ghabhalomba bhantu kubhala, “Musighubhahi! Bhupanga bhusyalimo!” 11 Kundi Paulo ghaheleela kabhili, ghatanda ku kapungu kukati, ghametula ibhu, bhalya. Ghajhililika kulāngulula kwasumwa kwasya, kundi ghabhuuka ghaajha. 12 Bhaabho bhantu bhamutwala ghulya mulughalugha, bhamufela kumwajhe nali mupanga, bhasangabhala nkana.
Lwēndo lweke Paulo kufuma ku Toloa kujha ku Mileto
13 Paulo ghaajha mu lugho lwa Haaso lwa maghūlu, kobhe bhwakabheele ghalanganyia. Ufwe twatanda mu meeli twalombola kufīkako. 14 Ghatusānga ku Haaso, twamutansya mu meeli twajha hamwi mu lugho lwa Mitilene. 15 Mulāabho ghwajhe, twajha na jheejhyo meeli, twahita ku mbalimbali na kalila ^kakabheele kajhitilwe, Kiijho. Mukubha kwasya, twafīka ku kalila kakabheele kajhitilwe Saamo, twajhīkala mu lugho lwa Tiloghilio. Ifuku lyakalōndanga, twafīka mu lugho lwa Mileto. 16 Paulo akabheele ghaabhala lwēndo lwajhe lusibhi lwa kuhita mu lugho lwa Efeso, akulinga nasitindi mu sihugho sya Asia. Akabheele nalikuhensa kubha finakakobholeke aghanguhe kufīka mu lugho lwa Jhelusalemu mubhāla ghwa Pentekositec ghusyali kufīka.
Paulo alikwitāahya na bhaghosibhakulu bha kaniisa jhya ku Efeso
17 Paulo bhwakabheele ghafīka ku Mileto, ghalaghiila fibhalwa mu lugho lwa Efeso, kubhajhita bhaghosibhakulu bha kaniisa bhese bhelōle naajhe. 18 Bhobhakabhanga bhajhisa, ghabhalomba ghaabhala, “Umwe mwebheene mujhinsi bhonankēkalanga nenyu, kusumbula ifuku lyonankafīkanga hanu mu sihugho sya Asia. 19 Nkabheele nendikumukolela mulīmo Sifwe Bhusya Jheesu ku bhutendeke nkana nendi na bhusungu. Nkabheele nemisile mwēgho ku mabhi ghonse gha kusanfisibhwa, tulimbo tubhi ^tukabheele tulikusūlwa na bhandi Bhajhahudi bhabhi. 20 Mujhinsi kubhala, nsikasubhiila kumilomba ighāmbo lyolyonse lya kumifūnaanila umwe. Gho fyakatumanga nendikulāngulula Sikūla Sisogha halafu no mu nyumba jhimwi jhimwi. 21 Nkabheele nendikubhalomba Bhajhahudi hamwi na bhasili Bhajhahudi kubhala, bhamulōnde Kabhumba, bhalēke bhubhi bhwabho, bhamwisighe Sifwe Bhusya Jheesu Kiliisito.
22 “Nonwe, une nandaghiilwa na Mwēgho Mulafu ghweke Kabhumbad kubha ti, inje mu lugho lwa Jhelusalemu. Hamwi ne teetyo ndikujha, bhusila kumānya filonsānga kooko. 23 Tukubha, syonyinsi ni kubhala, mu ngo syonse syonkabheele nendikuhita, Mwēgho Mulafu ghweke Kabhumba akabheele nalikunangisya kubhala, kusamba no kwighalilwa finhembeele. 24 Singa nanfwa, te sintu kumwane, ndikuhensa inkwisye milīmo jhilya Sifwe Bhusya Jheesu jhyoghakampanga injikole. Milīmo jheejhyo, ni jhya kutangaasya Sikūla Sisogha sya sighōngo syeke Kabhumba ku bhantu.
25 “Tukubha nonwe, nyinsi kubhala ti, umwe mwense nankamitangaasisyanga Bhwami bhweke Kabhumba, temwakandōle kabhili. 26 Teetyo, ndikumilomba bhwalelo kubhala, kubha ghumwi mu umwe ghataajhika, malaso ghaajhe une nsinajhimukilwa. 27 Bhukohela lyolyonse Kabhumba lyakabheele nahensile mulimānye, nkabheele nendikumilomba bhusila kughubhaha. 28 Mwēgho Mulafu ghweke Kabhumba amibhiikile umwe, mubhe bha kujhughalalila bhantu ^bhamwisighile Kabhumba. Ku teetyo, bhe menso, mubhe bhakemi bha bhahemba bhaajhe, bhukohela Jheesu unyene ghakafwanga, aleke abhasābhule.
29 “Nyinsi kubhala, une kubha nanja, bhamakota bha malami bhalokabhasampa bhahemba bheke Jheesu kobha mapuughe makali mu mulēgha ghwa ntaama, tebhalokabhalōlela sighōngo bhahemba. 30 Kabhili, mu umwe bhalolōlekamo bhantu bha kulāngulula bhandi ku nsīla jhya malami, aleke bhahemba bhabhalōnde. 31 Teetyo, mubhe mubhengile! Mwisukile kubhala, ku myaka itatu, bhufuku ne isyubha nsyakalēkanga kumukabha muntu ghoghonse mu umwe, nankēlanga teetyo ku bhusungu.
32 “Kundi nonwe, ndikumibhiika mu mabhoko gheke Kabhumba ne ighāmbo lya sighōngo syajhe. Unyene ali nagho managha gha kumisīipya no kumipambulila kobhe bhoghakabhalanga ku bhantu bhaajhe bhoghakafūla.
33 “Une nsikabheele muntu ghwa kutēha mahela, ajhe sahabhu ajhe myenda jhya muntu ghoghonse. 34 Umwe bheene mujhinsi kubha ti, nkabheele nendikukola milīmo ku mabhoko ghaane nenyene, aleke impāte fyonkabheele nenhensile ne fya bhenaane. 35 Ighāmbo lyolyonse lyonkabheele nendikukola, nankabhalangisyanga kubhala, ku nsīla jhya kukola milīmo ku managha, tuhenseelwe kubhafūna bhasili na bha kubhafūnaanila. Mubhe mwisukiile maghāmbo ghakatendwanga na Sifwe Bhusya Jheesu kubhala, ‘Sumbwa kufumya, hali kupokeela.’”
36 Paulo bhoghakabhanga ghahwa kutenda ghaagho, ghasukama ghajha kutendajhyuka kwa Kabhumba hamwi na bhalya bhwakabheele kumwi nabho. 37 Kundi bhonse bhalīla nkana, bhamubhungatila Paulo bhalikumusyusyuta. 38 Ighāmbo lyakasūlanga bhabha na bhulanda nkana, ni lilya lyakabheele ghabhalomba kubhala ti, tebhakamulōle kabhili. Bhobhakabhanga bhahwa, bhamuhelekesya bhamufīsya mu meeli.