Paulo mu lugho lwa Efeso
19
Apolo bhwakabheele nali mu lugho lwa Kolinto, Paulo ghakahambanga lwēndo ghajha ghahita mu fihugho fya misosi, ghasookela mu lugho lwa Efeso. Kooko ghakasangaananga na bhahemba bhandi bheke Jheesu. 2 Ghabhabhasya kubhala, “Teeti bhomwakamwisighanga Jheesu, mwakapokelanga no Mwēgho Mulafu ghweke Kabhumba?”a Bhamuhindula bhabhala, “Singa tu kuhulika ti kuli no Mwēgho Mulafu ghweke Kabhumba tetwakahulikangehi.” 3 Kundi, Paulo ghabhabhasya kubhala, “Mwakabhatisibhwanga bhubhatisyo bhwa bhuti?” Bhamuhindula bhabhala, “Bhubhatisyo bhulya bhoghakabhatisyanga Jhohana.”4 Paulo ghabhalomba ghaabhala, “Jhohana akabheele nalikubhabhatisya bhantu akulinga bhaghalaghale bhamwisighe ghulya ^akabheele najhisile ku nyuma jhyajhe, no ghoogho gho Jheesu.” 5 Bhobhakabhanga bhahulika ghaagho maghāmbo, bhakabhatisibhwanga kwi isiina lyeke Sifwe Bhusya Jheesu. 6 Paulo bhoghakabhanga ghabhabhiikako mabhoko ghaajhe ku mitwe jhyabho, haahoe Mwēgho Mulafu ghweke Kabhumba ghabhasookela, bhasumbula kutenda ku tutendelo tuhya, kooku bhalikufumya ilaghu. 7 Bhaabho bhantu bhakabheele kobhe ikumi na bhabhili, bhaghoosi.
8 Ku myensi itatu, Paulo akabheele keteghaajha mu nyumba jhya kusangaanilamo, nalikutenda ku bhusimu maghāmbo masogha gha Bhwami bhweke Kabhumba.b 9 Tukubha bhandi bhakēlanga myēgho jhyabho kubha mikaka. Bhabha bhalikutuna kwisigha maghāmbo gheke Jheesu, bhasumbula kughabhenguka ha mbele jhya lūuli lwa bhantu. Kundi Paulo ghalekunkana nabho, ghabhabhiika ha mbali bhahemba, ghabha nalikusāhula nabho hamwi na bhantu bhandi mwi ibhanja lyeke Tilano. 10 Paulo ghakahwangamo myaka ibhili nalikulāngulula Sikūla Sisogha syeke Jheesu, bhasumwa bhekasi bhonse bha sihugho sya Asia, Bhajhahudi na bhasili Bhajhahudi, bhaabha bhahulika Sikūla Sisogha syeke Sifwe Bhusya Jheesu.
Bhaana bheke Sikewa bhalikulingisya kukuula limusāgha
11 Kabhumba ghakēlanga maleebha makulu kuhitila ku mabhoko gheke Paulo. 12 Kumwi ne fitambala ne myenda ^fikabheele filikukuumya ku mutūmba ghweke Paulo, bhofyakafelwanga ku bhalwele, malwele ghaabho na mamisāgha mabhi ghakabheele ghalikubhafumako.
13 Bhakabheeleho Bhajhahudi bhandi ^bhakabheele bhalikujhejheebha kooku no kooku bhalikukuula mamisāgha mabhi kufuma ku bhantu. Bhaabha bhalikulingisya kughakuula mamisāgha mabhi kwi isiina lyeke Sifwe Bhusya Jheesu. Bhakabheele bhalikutenda kubhala, “Kwi isiina lyeke Jheesu ghulya ghwalikutangaasya Paulo, ndikumilomba mufume ku ghooghu muntu!” 14 Mu bhalya bhakabheele bhalikwīla teetyo, bhakabheelemo bhaana ndwi bheke Sikewa. Unyene akabheele Mujhahudi, ghumwi mu bhapeesi bhakulu.c 15 Tukubha limusāgha ibhi lyabhahindula lyabhala, “Jheesu tumujhinsi, no Paulo naagho tumujhinsi. Kundi umwe muli bhaghanyi?” 16 Haaho na haaho, ghulya muntu ^akabheele ne limusāgha ibhi ghabhatubhukila, ghabhebhunda ghabhasumba managha bhonse. Bhafuma mu nyumba bhalikukilima, bhalibhutuhu kooku bhafulaalika.
17 Maghāmbo ghaagho, ghakamānyikanga nkana ku Bhajhahudi bhonse ^bhakabheele mu lugho lwa Efeso na bhasili Bhajhahudi. Bhaabho bhonse bhaabha na bhoobha, isiina lyeke Sifwe Bhusya Jheesu lyajha mpunda nkana. 18 Kundi, bhantu bhengi mu bhalya ^bhakabheele bhamwisigha Jheesu, bhalikughalaghala ha mbele jhya bhantu ghalya mabhi ghobhakabheele bhaajhīla. 19 Bhengi mu bhalya ^bhakabheele bhaajhīla maghāmbo gha bhufumo, bhakalentanga fitaabhu fyabho, fyatumbwa mu mulīlo ha mbele jhya bhantu bhonse. Bhobhakafipandanga bhalōla bhukulu bhwa nsābho ^jhikabheele jhyatumbwa, jhikabheele mahela mengi nkana, kobhe elufu makumi ataanu.d 20 Teetyo gho Ighāmbo lya Sikūla Sisogha syeke Sifwe Bhusya Jheesu, bholikabheele lilikukwila honse ku managha.
Mu Efeso mwasūlika kajhunga
21 Maghāmbo ghaagho bhoghakabhanga ghahwa, Paulo ghakahambanga lwēndo kujha mu lugho lwa Jhelusalemu, ghahita mu ngo sya Makedonia ne Akaajha. Ghakatendanga kubhala, “Kubha nanfīka kooko, nonkajha mpaka mu lugho lwa Luumi.” 22 Kundi ghalaghiila mu bhahemba bhaajhe ^bhakabheele bhalikumufūnaanila milīmo, Timoseo no Elasito, bhajhe ku Makedonia. Unyene ghongwa ghakasibhanga nyinambele, mu sihugho sya Asia.
23 Ku nfuku seesyo, kajhunga kakulu kakesanga mu lugho lwa Efeso, ku luhande lwa bhahemba bheke Sifwe Bhusya Jheesu. 24 Kaako kajhunga, kakasūlwanga na mususi ghumwi ghwa majhēla, ^ghaketwanga Demetilio. Unyene akabheele na mulīmo ghwa kujhōojhya mikiti jhya tulunsi twa mughābho ghwabho ghwa sikeema, ghwaketwanga Alitemi. Milīmo jheejhyo, jhyakabhahanga bhasusi bhenaajhe bhusabhaghala bhukulu.
25 Ifuku limwi, Demetilio ghakakomenkanyianga hamwi bhasusi bhenaajhe na bhandi bhakabheele bhalikukola jheejhyo milīmo. Kundi ghabhalomba kubhala, “Umwe bhanabhaghoosi, mujhinsi kubhala ti, bhutunsi bhwetu bhufumiliile mu jheejhi milīmo. 26 Tukubha nonwe, umwe bheene muhuliike mwanalōla bhuli ghoogho Paulo, bhoghahwa kubhahāna no kubhatebha bhantu bhengi bha ku Efeso, kumwi na bhantu bha mu ngo syonse sya ku Asia. Alikutenda ti, mighābho jhilikujhōjhisibhwa na bhantu, te mighābho jhya bhwene. 27 Ku teetyo, ndikulanganyia kubhala, ghooghu mulīmo ghwetu ghulakutunguulwa nkana. Ipeelelo lya mughābho ghwetu Alitemi mukulu, naagho jhilakulōleka kubhala ti, te sintu. No mughābho ghwetu Alitemi ghulya akotendajhyukilwa ku Asia jhyonse no bhweleelo bhonse, alobha ghafumisibhwa ntighili jhyajhe.”
28 Bhobhakabhanga bhahulika ghaagho maghāmbo gheke Demetilio, bhaghājha nkana. Bhasumbula kuhuula kajhombe bhabhala, “Alitemi ghwa ku Efeso gho mukulu!” 29 Kundi lugho lonse lwa Efeso lwabha na kajhunga. Bhamunīgha Ghaajho no Alisitaliko, bhantu bha ku Makedonia gho ^bhakabheele bhalikujha lwēndo kumwi no Paulo, bhaajha nabho mu luhya lwa kusaahila. 30 Paulo ghakahensanga kwingila hakati na mulēgha ghwa bhantu, tukubha bhahemba bheke Jheesu tebhakamuswesyanga. 31 Bhandi bhakulu bhakulu bha kulya ku Asia, ^bhakabheele bhanywanyi no Paulo, bhakamulaghisisyanga bhantu, bhalikumulebhelesya, nasingili mu loolo luhya.
32 Mu leelyo ikunka, muntu ghoghonse akabheeleho haaho, akabheele nalikutangiila ghundi ghatenda leeli no ghundi lilya. Bhantu bhengi tebhakamānyanga syasūla bhakomenkana. 33 Bhajhahudi bhasongola muntu ghumwi bhamujhughalalika ha mbele jhya bhaabho bhantu, isiina lyajhe Alekisanda, bhamulāngulula maghāmbo gha kutenda. Alekisanda ghatalika mabhoko kubhahumbusya, bhukohela akabheele nalikuhensa kufumya muhogho ghwa bhalya bhamusongwele ha mbele jhya bhantu. 34 Tukubha bhobhakamānyanga kubha ti ni Mujhahudi, bhonse silihamwi bhakahuulanga kajhombe ku silongo sikulu, ikunka lyakubha kobhe mansa abhili, bhalikutenda kubhala, “Alitemi ghwa ku Efeso gho mukulu!”
35 Ku bhuhela katwikilo ghwa loolo lugho, ghabhahosya bhaabho bhantu. Ghabhalomba ghaabhala, “Umwe bhanabhaghoosi bha mu lugho lwa Efeso, ghanyi asimānyile kubha ti, loolu lugho gho lulikulalilila nyumba jhya mughābho ghwetu mukulu Alitemi, hamwi no mukiti ghwajhe ^ghukabheele ghwasooka kufuma mwi ighūlu? 36 Kundi, bhukohela bhohasili muntu akobhwele kughatuna ghaagho maghāmbo, jhīkale tuusye mwēgho. 37 Mwabhalenta bhaabha bhantu haaha, tebhajhibhile fintu mu tulunsi twa kumwetu. Tebhaghutukile ajhe kughuhambaasya mughābho ghwetu mukeema. 38 Kansi, kubha Demetilio na bhasusi bhenaajhe bhali ne ighāmbo ku muntu ghoghonse, ibhalasa liliho, na bhakala maghāmbo bhaliho. Bhakobhwele kulifela ighāmbo lyabho kooko. 39 Tukubha, kubha hali ighāmbo lindi lisunfile leelyo, mwalifela mu siikalo silya sijhikenyie na kabhāngo keetu. 40 Bhukohela kajhombe kotwasūlanga bhwalelo, tukobhwele kusitaakwa, bhukohela tehali bhusogha. Kabhili tetuli na nfūno jhya kaaka kajhombe.” 41 Kundi ghoogho katwikilo ghakahwanga kutenda ghaagho maghāmbo, ghanasambaasya ne seesyo siikalo.