Jhona alikubhatangaasisya Bhaninawi ighāmbo lyeke Kabhumba
3
Kufuma haaho ighāmbo lyeke SYE BHUSYA ghweke Jhona lyamwīsila kabhili kubhala, 2 “Bhuuka ujhe mu lugho lulya lukulu lwa Ninawi, ukabhatānyisye ghaagha ghondikukulaghiila.” 3 Kundi Jhona ghabha ghaswa kujha ku Ninawi kobhe bhoghakalaghilwanga na SYE BHUSYA. Ninawi lukabheele lugho lukulu, kuluhwa kuluputula bhakabheele bhalyāta nfuku itatu. 4 Ifuku lya kusumbula Jhona ghakalyātanga mpaka mu lugho kati. Ghasumbula kubhatangasisya kubhala, “Kobhe syahita nfuku makumi ane lugho lonse lwa Ninawi lulohiila.” Bhaninawi bhalikughalaghala
5 Bhantu bhonse mu Ninawi bhamumānya Kabhumba bhanaswa. Jhyatangaasibhwa bhasīngwe na nsāla bhonse bhakulu ku bhatwana, bhafwale myenda jhya maghunila, kulānsya bhuli bhobhaghalaghala. 6 Gho bhofyakabhanga bhukohela lupola bholwakamufīkilanga mwami ghwa Ninawi, ghabhuuka kwi itebhe lyajhe lya bhwami ghajhīkala mwi isyāla. Syakalōndanga ghafuula myenda jhyajhe jhya bhwami ghafwala mwenda ghwa maghunila. 7 Kufuma haaho ghabhalaghiila bhantu bhonse bha mu lugho lwajhe lwa Ninawi, “Kwi ilaghi lya mwami na bhahelekesi bhaajhe musimuswēsi muntu ghoghonse, hamwi na manywele gha kutungwa kulya kasintu kokonse no kunywa mansi. 8 Silikuhenselwa bhantu na manywele bhafimbilwe myenda jhya maghunila no kubha bhamwighongeele Kabhumba ku managha nkana. Bhalēke bhubhi bhwabho na masōola. 9 Ni ghanyi ajhinsi hamwi Kabhumba akobhwele ghatufwila sighōngo, ghaalēka sisila syajhe, akukabha tusile!”
Sighōngo syeke Kabhumba
10 Kabhumba bhoghakabhanga ghaalōla fyobhajhīla bhobhaghalaghala bhaalēka nsīla syabho mbi, ghabhafwila sighōngo, tebhakahiila kobhe bhwakabheele ghaabhala.