Jhona alikumusēegha Kabhumba
2
Haaho Jhona nali mu nda jhya isembe ikulu ghabha nalikumusēegha SYE BHUSYA Kabhumba ghwajhe. 2 Ghasumbula kutenda kubhala,“Bhonkabheele nendikusamba, nankakusēeghanga, ee TAATA BHUSYA
noghwe ghwanhulika.
Bhonkabheele kwihi na kusimu, nankakwitanga,
noghwe ghwanetabhuka kwita kwane.
3 Ghwanteela mwi isībha hakati na tanganika.
Mabhīmbi ghaniengela,
na ghandi ghahita ku lughamba none.
4 Une nkabheele nenkulanganyia kubha,
‘Ti ghwangājha imbe hale noghwe.
Kansi ni bhwene nonkajhilōla kabhili Nyumba Nkulu jhya Ipeeleloa lyobhe ilafu.’
5 Mansi ghakaniengelanga honse, ghanfīka mwi ikōsi.
Nansīibha mwi isībha,
nanfimbilwa na makangakanga gha mu mansi.
6 Haaho nansooka mu nkōmo,
mwakukabha mwighalilwe nfuku syonse.b
Tu ughwe TAATA BHUSYA Kabhumba ghwane,
ghwanfumya bhupanga kufuma kwihi na kusimu.
7 Halya mu kukolobhela namba nankusēegha TAATA BHUSYA,
kusēegha kwane ghwakuhulika mu Nyumba Nkulu jhya Ipeelelo lyobhe ilafu.
8 Bhantu bhakopeela misimu,
bhalipampula bheene, bhaalēka sighōngo syobhe.
9 Tukubha une nonkwimbila lwimbo lwa kusīima no lufuho nankuha,
no kuhwa kahīgho kaane,
TAATA BHUSYA ughwe ukosābhula.”
Isembe lilikumuluka Jhona
10 Haaho SYE BHUSYA ghweke Jhona ghalibhalila isembe ikulu, “Muluke Jhona!” Kundi isembe lyamuluka Jhona ku lutambo.