SITAABHU SYEKE MUGHWELAGHU JHONA
Jhona alikulīngisya kumwiluka Kabhumba
1
Ukale hakabheele no muntu ghumwi najhitilwe Jhona mwana Amitaali. Ifuku limwi, ighāmbo lyeke Kabhumba, SYE BHUSYA ghweke Jhona, lyakamwīsilanga kubhala, 2 “Bhuuka ujhe mu lugho lulya lukulu lwa Ninawi ukabhakabhe, bhukohela mbwene bhubhi bhwabho bhwasumba.” 3 Asiihi Jhona ghabhuuka tu kumwiluka SYE BHUSYA ajhe ku lugho lwa Talisiisi. Ghasooka ku lugho lwa Jhyafo, haaho ghatanda meeli jhijhiile ku Talisiisi, ghalīha mahela gha lwēndo, ghaajha nabho bha mu meeli, amukilime SYE BHUSYA. 4 Kansi SYE BHUSYA ghatuma lukugha mu tanganika mwabha mabhīmbi, meeli jhyasilila hase jhibheleke. 5 Bhakola milīmo bha mu meeli bhasūpa, bhasumbula kusēegha kila ugho mughābho ghwajhe. Bhajha kutaagha miligho mu meeli, jhihaafuke. Tukubha Jhona akabheele mwi ibhānda lya meeli nalikughōna. 6 Mukulu ghwa meeli ghamujhiila ghamubhasya, “Fili bhuti kughōna tulo? Halamuka ughusēeghe mughābho ghoobhe, hamwi ghunahulika.”
7 Kundi bhakola milīmo bha mu meeli bhajha kusāhula kila ugho na mwinaajhe, “Kookwe, tuteele bhwahulo, akubha tumānye bhubhi bhoobhu bhwajhīsa bhwalentwa na ghanyi.” Syakalōndanga bhateela bhwahulo, jhyalōleka Jhona. 8 Bhasumbula kumubhasya, “Tutānyisye filiho bhuti ghaagha mabhi ghatwīsila? Ukokola mulīmo si? No kofumile ni ihe? Sihugho syobhe ni siihe? Mulahilo ghoobhe ghuuhe?” 9 Jhona ghabhahindula, “Une ndi Muhebhulania. Nkomupeela TAATA BHUSYA, Kabhumba ghwa mwi ighūlu abhunfile tanganika ne ntambo.” 10 Kundi Jhona ghabhabhalila kubha, “Mbeele nenkumwiluka TAATA BHUSYA Kabhumba.” Bhakola milīmo bha mu meeli kuhulika ghaagho, bhoobha bhwajha bhwasumba bhamubhalila, “Ghwajhīla ighāmbo ibhi nkana!”
11 Bhukohela musāgha ghwa lukugha ghukabheele ghwasumba mu tanganika, bhamubhasya, “Twīle bhuti, aleke tanganika jhihole?” 12 Jhona ghabhalomba, “Ntwale munteele mu mansi, naagho ibhīmbi lilakuhola. Bhukohela nyinsi ghaagha ghonse nine nangasūla.” 13 Asiihi bhalya bhakola milīmo bha mu meeli bhalīngisya kujhiisya bhafīsye meeli jhyabho kwi isinsi. Tukubha tebhakakobhola kujhifīsya bhukohela mu tanganika ibhīmbi likabheele ikulu nkana. 14 Kundi bhajha kwighongeela kwa Kabhumba bhabhala, “Ee SYE BHUSYA ghweke Jhona, usitulēki tufwe twahela ku kufumya bhupanga bhwa muntu ghumwi ghooghu no kubha usitutwiki bhubhi bhusili bhwa kwetu, bhukohela ughwe ghwajhīla lyotēhile.” 15 Kufuma haaho bhatwala Jhona bhateela mu tanganika, kundi tanganika jhyabha jhyatuulama haahoe.
16 Bhaabho bhakola milīmo bha mu meeli bhabha bhamughubhaha nkana SYE BHUSYA ghweke Jhona, bhamufumisya lufuho bhaalya na kahīgho ka kumutiikisya Kabhumba. 17 Syoghakēlanga Kabhumba ghalaghiisya isembe ikulu limumīle Jhona. Kundi Jhona ghamīlwa na lilya isembe, ghajhīkala mu nda jhya isembe mo nfuku itatu bhufuku ne isyubha.