Ka Izərayel tsa titihu va jikir tsa mənti ghəshi
9
Ma tə tir tsa va vay, tə kwa bakəmətsəkə faɗəti tsa hi tsa ci na, mbaʼ ka Izərayel ɓasəshi ta məni sumay. Dza ghəshi mbaʼ ghəshi pakən kubeŋeriy təhuni mbəri, mbaʼ ghəshi ngərakən hiɗi kən ghən shi 2 Dzəghwa ghəshi ka ghən tsa shi ghəshi ka Izərayel, mbaʼ ghəshi tərakəvərivashi mbə mbəzliy kamaa ka Izərayel. Dza ghəshi ka gəzə kuma mənti ghəshi jikir na kaa Kwa sləkəpə, lə na mənti jijihi shi gwaʼa. 3 Liy hum ki na, mbaʼ ghəshi satishi məgarə, ka janganshi kuma mbə zliya kuma pəhəti Kwa sləkəpə Hiyala shi məndi. Tsahi mahəkanə ghəshi mənti mbə fa kuma va. Zhini ghəshi diɓa, mahəkanə ghəshi mənti tsahi mətsəfəku kwa kuma Kwa sləkəpə Hiyala shi, ka tsa titihu va kuma shi jikir na.4 Dzəghwa kar Zhuzəwe, mbaʼ Bani, mbaʼ Kadmiyel, mbaʼ Shevanya, mbaʼ Buni, mbaʼ Shereviya, mbaʼ Bani, mbaʼ Kenani, ɗal ghəshi dzəməshi mə pi tsa ɗal tsa va mənti məndi kaa mbəzli mbə takə tsa Levi. Dza ghəshi ka cəʼu Kwa sləkəpə Hiyala shi zlaŋ-zlaŋ ta kəətishi ghənzə. 5 Zhəghwa kar Zhuzəwe, mbaʼ Kadəmiyel, mbaʼ Bani, mbaʼ Hashavəneya, mbaʼ Shereviya, mbaʼ Hudiya, mbaʼ Shevaniya, mbaʼ Petahiya, mbəzli mbə takə tsa Levi, ka gəzə kuma zlaŋ-zlaŋ kaa mbəzliy ɓasəshi va tiɓa. Ma kə ghəshi na:
«Satim, mənim usa kaa Kwa sləkəpə Hiyala ghuy ndimndim na, ya paʼa humɓa,» kə ghəshi.
Cəʼu kwa kuma mbəzli gwanashi
Ma kə ghəshi diɓa na:
A Kwa sləkəpə, ya wa ndiy, ə kəə fal slən tsa gha va nza shəndəkə ti.
Ya njaaɓa faləŋa məndi, ya njaaɓa fə məndi shəndəkə dzəti ghay, daw na ta shəndəkə tsa tə slən tsa gha va.
6 Gha kutiŋa na Kwa sləkəpə.
Gha mənti na ghumə gwanata paʼa tə pi tsa kərkəva na lə shiy dziy ti gwanashi.
Gha mənti na hiɗi lə shi ti shi gwanashi.
Gha mənti na kufahiy kərkəvama lə shi kwa shi gwanashi.
Gha ɓə na piy kaa shiy gwanashi.
Ya nimaɓa shiy dziy tə ghumiy, kwa kuma gha tsəfəku ghəshi.
7 A Hiyala Kwa sləkəpə, gha təravə na Abəram,
mbaʼ gha gəzanci ɓarvay mbə məlmə Ur tə hiɗi ka Kalde,
mbaʼ gha fanati slən Abrahamª.
8 Sa nay gha ghəci ndaŋa nəfə tsa ciy,
mbaʼ gha slati kiri li, ma pə gha kaa ngəci na:
«Ta ɓanavəshi hiɗi ka Kanan, mbaʼ shi ka Hiti, mbaʼ shi ka Amur, mbaʼ shi ka Perizi, mbaʼ shi ka Zhebuzi lə shi ka Girgashi dzee kaa jijihiŋa,» pə gha niy ni kaa ngəci.
Kumaa niy gəzəkə gha vay, a gha mənti tsəgha, sa nza nay, ka dzəghwa gha kən kuma gəzəkə gha məni nzuw.
9 Ghala vəghu tsaa niy nza jijihiŋiy tə hiɗi ka Ezhipətiy, a gha niy nay ngəraʼu tsa sa ghəshi.
Mbaʼ gha favə har tsa harəŋa ghəshi ta kəətishi ghala vəghu tsaa niy nza ghəshi miy kufa har məndi vaa kufa ghuvəl.
10 Dza gha, mbaʼ gha mənti kuma maɗaŋa maɗaŋa na, lə kumaa canshi bərci gha kaa kar Farawaŋ mazə ka Ezhiptə
ghəshi lə ka sləni ci gwanashi mbaʼ mbəzli tə hiɗi ci gwanashi.
Sa nza na mbaʼ gha sənay njasa sanamiy ghəshi ngəraʼu kaa jijihiŋiy səvəri mbə kəli ghən tsa shi.
Ghalaɓa kiy, mbaʼ gha cikəvəri shəndəkə tsa məni gha njasa nay məndi tsa ndatsə.
11 A gha niy təhəvəri yam bakə mbə kwa kuma jijihiŋiy mbaʼ ghəshi taŋəshi dzəvəri tə həl tsa va dzar tə hiɗi, kala dapashi ma yam.
Ma mbəzliy niy nushi na, mbaʼ gha pəlashi yam dzəkən shi, tikətikə ghəshi kwaɓa, nja haku tsa bəzlati məndi tə hur yaməə hu lə bərci.
12 Havəghuy, lə timbətimbə niy ʼwanshi gha kwal kaa mbəzli gha va,
ma həvir na, lə ghani ghu waŋ kwal tsa dza ghəshi kwa.
13 A gha niy səkwaŋa səəkə mə ghuməə dzəmbə dəlagwa Shinay.
Mbaʼ gha gəzanakəshi kuma səəkə mə ghumə.
Mbaʼ gha gəzanakəshi kuma lə kwal na, ta məni ghəshi,
mbaʼ gha pəhanatishi kuma kataŋ na ta nuw ghəshi,
mbaʼ gha ɓananavəshi kuma wuzə na ta məni ghəshi,
pəhə gha pəhanatishi kuma wuzə na ta nuw ghəshi.
14 Dzəghwa gha diɓay, mbaʼ gha ghunay Muyizə ndə sləni tsa gha ta gəzanshi vici dəkəva, na gha vici.
Mbaʼ gha ghunay diɓa ta gəzanshi kuma pəhəti gha ta məni ghəshi, ka gəzanshi nuw na gha kuma garəŋa gha ti, ka ɓananavəshi kuma dza ghəshiy məni.
15 Ghala vəghu tsaa niy ghəranshi may, gha niy ɓanshi na shi zəmə səəkə mə ghumə.
Mbaʼ gha təzlanakəvərishi yam səvəri mbə kəlɓa ta sashi ghəshi va ndir tsa shi.
Mbaʼ gha ghunashi a ghəshi dza ta zləghu hiɗiy niy zəməkə gha va fəla ta ɓanshi.
16 Ya tsəgha nzə kiy, mbaʼ jijihiŋiy va kəliti ghən tsa shi nashi ki, caslakiy ghən tsa shi niy nza,
kala fa ma kuma gəzanshi gha məni nzə ghəshi.
17 kala fa ma kuma gəzanshi gha ghəshi.
mbaʼ ghəshi zanti ghən ta kuma maɗaŋa maɗaŋa na va niy manatishi gha.
caslakəslakə ghəshi mənti ghən tsa shi.
Wuzəɓa zhəghəvaa zhəti hiɗi ka Ezhiptə ta məni mava ghəshi favə.
Ya tsəgha nzə kiy, zhəghanavəshi hum ghaw.
Sa nza nay, Hiyala kwa kəsə ndə mbə nəfə nza ghaw.
Hiyala kwa zhəhur ta ndə nza gha, kwa wuzə hur gha diɓa.
Ka ɓə nəfə gha kiyaŋu-kiyaŋuw, təruŋ na ɗi va gha.
18 Ya tsəgha niy vasəvə ghəshi shiy nja pa meceri tə tsahi:
«Avanata hiyala ghiy ɓəkəvəriŋiy mbə hiɗi ka Ezhiptə,» kə ghəshi, zhini ka məni shiy təɓə ma ya Juwiy,
19 sa nza na kwa zhəhur gha təruŋ na,
niy zlashi gha mbə gambaw.
Timbətimbəə niy canshi kwal va havəghuy, niy zlay canshi kwal naw.
Ghani ghuu niy canshi waŋ pi va həvir ɓa na, niy zlay mananshi waŋ pi naw.
20 Səvəri mbə wuzə hur tsa ghay, a gha niy ɓanavəshi safə tsa gha va wuzə tsa, ta mbə ghəshiy sənata kuma.
Mbə ɓanshi shi zəmə har məndi vaa manə niy nza gha ta zəməshi ghəshi va ma.
ka ɓanshi yam ta sashi ghəshi va ndir.
21 Piya faɗəmətsəkə mənti gha mbə zəmanshi shiy mbə gamba,
Shiy tiɓa mbaʼ ghəshi niy ghəzlishi ti shiw.
Niy hali kubeŋer kən ghən shiw,
Ya shiɗəshəɗer shiy, niy pəpə ghəshiw.
22 A gha niy ɓanavəshi bərci mbaʼ ghəshi zləghuhu hiɗi nihuti mbəzli, lə hulfəhi nihuti mbəzli.
Mbaʼ ghəshi ɓəhu hiɗi ka ghalahi shi:
hiɗi sləkə Shihuŋ mazə ka Heshəbuŋ, mbaʼ hiɗi sləkə Ug mazə ka Bashaŋ.
23 A gha niy yati hulfəhi shi ɗaŋ nja sasərkuhiy dziy tə ghumə.
Mbaʼ gha pəməghəshiy dzəti hiɗi Kanan,
hiɗiy niy gəzanshi gha va dza ta zləghushi kaa jijihi shi.
24 Dza ndərazhi shi mbaʼ ghəshi dzashiy dzəti hiɗi va, mbaʼ ghəshi ɓəhu hiɗi va ka shishi.
Ma ka Kanan ghəshi niy ghaa nziy tə hiɗi va na, mbaʼ gha zhəghətishi ka ka daw bərci kwa kuma shi.
Mbaʼ ghəshi zhəghəshi ka mbəzliy fa kuma va jijihiŋiy va.
Dzəghwa hulfə mbəzli gha va ki, ka məni kuma ɗi ghəshi lə mezhizhi tə hiɗi va, mbaʼ hulfəhi mbəzli ti shi gwaʼa.
25 Dza ghəshi mbaʼ ghəshi ɓəɓəhu məlməhiy niy nza kwa kələm, mbaʼ veher ləɓə ləɓə ni.
Mbaʼ ghəshi ɓəɓəhu ghiyeghiyer nza shiy kiy shi təruŋ, mbaʼ yam lalati məndi,
mbaʼ za fəhi har məndiy viŋə, lə ni har məndiy ulivə, mbaʼ fəhiy zəmə ɗaŋ.
Tə mbərkə wuzə hur tsa gha va təruŋ tsay, a ghəshi zəməhu shiy ka ngəslishi.
Mbaʼ ghəshi niy kəkəlishi bəvə bəvə. Niy dapashi ndərmaw.
26 Ya tsəgha nzə kiy, a ghəshi niy zhiniŋa ghən,
kala fa ma kuma va gha, tərəɗə ghəshi zhəghanavə hum kaa kuma pəhanatishi gha ta nuw ghəshi.
Dza ghəshi mbaʼ ghəshi bakwanti ka gəzə kuma gha va niy gəzanshi zhəghəvaa dzəvəgha gha.
Təruŋ səəkə ghəshi mbə məni kuma jikir na kaa ngəŋa .
27 Dzəghwa gha ki, mbaʼ gha zlashi dzəmbə dəvə ka mbəzə shi,
mbaʼ ka mbəzə shi irətishi.
Ghala vəghu tsaa niy sa ghəshi va ngəraʼu na, dza ghəshi ka wahəŋa wahə ta kəətishi gha.
Dza gha mbaʼ gha favə wahə shi va, gha mə ghumə.
Tə mbərkə wuzə hur tsa gha va təruŋ tsa ki na, dza gha mbaʼ gha ghunashi mbəzli ta mbəlishi.
Mbaʼ ghəshi mbəlantishi mbə dəvə ka mbəzə shi.
28 War nay ma ghəshi nziy tsa shi wuzə ki na, zəku Juw ghəshiy zhashiy zhimbə məni kuma jikir na kaa ngəŋa.
Sa ka ghaa dza diɓa na, mbərəkə gha zhiniy zlashi mbə dəvə ka mbəzə shi. Ka ka mbəzə shi va dza na, ka sanshi ngəraʼu
Ka gha nighə diɓa na, ghəshiy zhiniy wahəŋa wahə.
Sa ka gha dza diɓa ki na, mbaʼ ghaa favə wahə shi va gha mə ghumə.
Səvəri mbə wuzə hur tsa gha va təruŋ tsay, ɗaŋ səɗa səəkə ghaa mbəlantishi.
29 War mbə mbaɗəshi niy nza gha ta nuw kuma pəhəti gha.
Ta na nashi, sa nza na təruŋuy kəli ghən və shi na, kala zləɓa ma nuw kuma pəhəti gha va ghəshi.
Mbaʼ ghəshi dzəghwashi kən kuma pəhəti gha va.
Ntsaa nuw kuma pəhəti gha va ngar kiy, ta kumavə piy dza na.
Ma ghəshi nashi ki na, mbaʼ ghəshi mənishi ka ka zhini ghən, caslakəslakə ghəshi mənti ghən tsa shi.
Kala fa ma kuma ghəshi va gha ya juw.
30 Piya ɗaŋ mənti gha mbə səʼwa kuma shi.
ya humɓay, war mbə gəzanshi kuma safə tsa gha niy nza lə miy tsa ka gəzə kuma gha ta mbə ghəshi zlata məni kuma jikir na. Ya tsəgha nzə kiy, niy fa kuma va ghəshiw.
Dza gha ki, mbaʼ gha fambəshi mbə dəvə nihuti hulfəhi mbəzli.
31 Ya tsəgha nzə, sa nza hur tsa gha va wuzə təruŋ ki na, zantishi ghaw, zhəghanavəshi hum ghaw.
Sa nza nay, Hiyala kwa wuzə hur nza gha, zhini kwa zhəhur gha diɓa.
32 Sana kiy Hiyala ghiyiy, Hiyala dikə na nza gha, Hiyala kwa bərci, ka dza her mbəzli va gha.
Ka dzəghwa gha kən kuma gəzəkə gha mbə sla kiri tsa slati gha lə ghiyuw, ti garəŋa gha.
Titihu zəzətiy dzəkən ngəraʼu tsaa səəkə kən ghiy, ghiy mbəzli gha
mbaʼ kən mezhizhi ghiy, mbaʼ kən nihuti mbəzli ghiy dikə dikə ni, mbaʼ kən ka ta Hiyala ghiy, ghəshi lə ka gəzəŋiy kuma gha, mbaʼ kən jijihiŋiy lə ghiyŋiyshi ghiy nihuti mbəzli gha gwanashi,
sa ghava na tə vəghu tsa mezhizhi ka Ashiri paʼa va ndatsə.
33 Mbə kumaa kəsaŋiy va gwanatay, fəti va gha na na ghaw,
lə kwal tsa nzə mənti gha na gha kuma.
Ta na na ghiyiy, nuti kuma ghiy lə kwal tsa nzuw.
34 Nuti kuma pəhəti gha mezhizhi ghiy lə nihuti mbəzli ghiy dikə dikə ni ghəshi lə ka ta Hiyala ghiy mbaʼ jijihiŋiyiw.
Niy dzəghwa sləmə shi kumaa niy gəzanshi gha məni nzuw
Niy fati bama ghəshiy dzəti naɓəə niy naɓəshi ghaw.
35 Ya tsəgha niy mananshi gha kuma wuzə na təruŋ tə hiɗi shi,
ya tsəgha niy ɓanavəshi gha hiɗi buŋ, ləɓə ləɓə ghəshiy,
niy nuŋa ghəshiw, niy zlata məni kuma jikir na ghəshiw.
36 Ndatsə kiy, avanaŋiy ka mevivi.
Hiɗi ɓanavə gha va kaa jijihiŋiy
ta mbə ghəshiy vəshi ta shi dza ghəshiy zakə wuzə ni ti shiy,
mevivi nza ghiy ti shi.
37 Shi tə hiɗi ni ni təruŋ niy, kaa mezhizhi fambəŋiy gha ni mbə dəvə shi tə mbərkə kuma ghiy jikir na na ghəshi nana.
Shi ɗi ghəshiy məni ghəshi lə ghiy, mbaʼ dəbəkə tsa ghiy.
Ngəraʼu gaga na sa kən ghiy kiw,» kə ka ta Hiyala va kaa cəʼu shi.