Nehəmiy 8

Esdəras kwa kuma mbəzli gwanashi mbə jangə kuma pəhəti Hiyala

Dzəghwa ka Izərayel ki, mbaʼ ghəshi ɓasəshi gwanashi lə nəfə kutiŋ tə pi tsa kwa miy dəgha har məndi vaa miy dəgha yam. «Mbala ɓəkə zliya kuma pəhəti Kwa sləkəpə va niy ɓanavə na kaa Muyizə ta nuw ghummə, ghummə ka Izərayel,» kə ghəshi kaa Esdəras ntsaa kurahəhu kuma kwa zliya kuma pəhəti Hiyala. 2 Fəcavay, kwa taŋa vici kwa mbərfaŋa tir niy nza na. Zhər lə miʼi, mbaʼ ndərazhi gar favə kuma gəzanshi məndi niy ɓasəshi na tə pi tsa va. Dzəghwa Esdəras ndə ta Hiyala ki, mbaʼ dzaa ɓəkə zliya va. 3 Sa ɓəkə na ki na, dza na tiɓa tə pi tsa kwa miy dəgha har məndi vaa miy dəgha yam, ka janganshi kuma kwa zliya va zlaŋ zlaŋ kaa mbəzliy ɓasəshi va tə pi tsa va. Sa ʼwa na jangə nzə pətə mekəshiy, vici kwa ghən kərə na lə jangə nzə. Zhər tiɓa va lə miʼi, mbaʼ ndərazhi gar favə kuma gəzanshi məndi gwanashiy, war ə niy fa ghəshi kuma kwa zliya va va wuzə wuzə.

4 Mə ɗal pi tsa dəʼuti məndi tə shighu ta jangə kuma va məɓa niy gariy Esdəras ta jangə nzə. A mbəzli niy nza vəgha. Tar kwa bəzəmə ciy, kar Matitiya, mbaʼ Shema, mbaʼ Anaya, mbaʼ Uriya, mbaʼ Hilkiya mbaʼ Maseya niy nza ghəshi. Ma tar kwa zleɓi ci na: Kar Pedaya, mbaʼ Mishayel, mbaʼ Malkiya, mbaʼ Hashum, mbaʼ Hashəbadana, mbaʼ Zekariya mbaʼ Meshulam. 5 Ghala vəghu tsa ghuni Esdəras va zliya va ta jangiy, mbə nay niy nza mbəzliy niy ɓasəshi va tiɓa gwanashi, sa nza nay, mə ɗal niy nza na, takə mbəzli gwanashi. Ma ghəci mbə ghuni zliya va ki na, mbaʼ mbəzli gwanashi satishi məgarə. 6 Dzəghwa na mbaʼ mananati usa kaa Kwa sləkəpə Hiyala dikə na. Dza mbəliy ɓasəshi va tiɓa gwanashi mbaʼ ghəshi zləɓati «Amin, amin,» kə ghəshi kala kafə divədivi dzəta ghumə. Dza ghəshi tsəfəku ghəshi tsəfəkushi ka fal Kwa sləkəpə, gaʼa kuma shi mbə hiɗi . 7 Liy hum ki na, mbaʼ ghəshi zhakatishiy garəshi. Dzəghwa mbəzli mbə takə tsa Levi ka pəraslanshi kuma pəhəti Hiyala va. Kar Zhuzəwe, mbaʼ Bani, mbaʼ Shereviya, mbaʼ Yamin, mbaʼ Akuv, mbaʼ Shabətay, mbaʼ Hudiya, mbaʼ Maseya, mbaʼ Kelita, mbaʼ Azariya, mbaʼ Yuzavad, mbaʼ Hanan, mbaʼ Pelaya niy nza mbəzli mbə takə tsa Levi va. 8 Kutiŋ kutiŋ niy jangə ghəshi kuma kwa zliya kuma pəhəti Kwa sləkəpə va, ka pəraslanshi kaa mbəzli ta mbə ghəshiy favə shi ɗi kuma vaa gəzə.

9 Sa favə mbəzliy ɓasəshi va tiɓa gwanashi kuma janganshi məndi va na, tapə ghəshi məshi mbə wahə. Ma kə kar nguməna Nehemiy, ghəshi lə Esdəras ndə ta Hiyala, ntsaa kurahəhu kuma kwa zliya kuma pəhəti Hiyala, mbaʼ mbəzli mbə takə tsa Levi va pəraslanshi kuma va kaa ngəshi na: «Vici ndatsə nay, vici Kwa sləkəpə, Hiyala ghuy na, ka nziyŋuy ghuy nja ta mbəri ma, ka wahə ghuy ma,» kə ghəshi. 10 Zhini ma kə Esdəras kaa ngəshi diɓa na: «Mbalam jighi, a ghuy dza ta zəmə shi wuzə ni, ka sa shi wuzə ni, ka təhəshi lə mbəzliy tahu ma shiy. Sa nza na, vici ndatsə nay, vici Kwa sləkəpə ghummə na. Ka nziŋuy ghuy ciliku ciliku ma. Ta ndaŋuy bərci dza vəshiy səəkə va Kwa sləkəpə,» kə. 11 Dzəghwa mbəzli mbə takə tsa Levi kuraku ka dəpə mbəzliy ɓasəshi va gwanashi. Ma kə ghəshi kaa mbəzli na: «Guŋəŋuy pə ghuy, sa nza na, vici ndatsə nay, vici Kwa sləkəpə na, ka nziyŋuy ghuy ciliku ciliku ma,» kə ghəshi.

12 Dzəghwa mbəzli gwanashi ki, kafə ghəshi kafəshi, ka dzashi ta zəmə shiy lə ta sa shiy, ka tihə shi zəmə kaa mbəzliy tahu ma shiy. ka vəshi təruŋ. Sa nza na mbaʼ ghəshi niy favə kumaa niy pəraslanatishi məndi va wuzə wuzə.

Ka Izərayel məni makwaghwa mbə ceker daŋə daŋə ni

13 Ma tə kwa baka vici na, dzəghwa mbəzliy sləkə mbəzli kwa miy dəghahi mbə ka Izərayel gwanashi ghəshi lə ka ta Hiyala, mbaʼ mbəzli mbə takə tsa Levi, ɓasə ghəshi ɓasəshi vəgha Esdəras ntsaa kurahəhu kuma kwa zliya kuma pəhəti Hiyala ta mətsəhə favə kumaa dzəkən kuma pəhəti Hiyala va wuzə wuzə. 14 Ma ghəshi mbə cacəhə kumaa niy pəhəti Hiyala va mbaʼ ɓanavə kaa Muyizə na, mbaʼ ghəshi kəsata kumaa niy gəzəkə Hiyala kaa ka Izərayel dzəkən makwaghwa cikə tsa daŋəti məndi dzar tə hiɗi. Ma kə məndi dzəghwa tə pi tsa va na: «Tə kwa mbərfaŋa tiriy, nza ka Izərayel məni makwaghwa cikə tsa daŋəti məndi dzar tə hiɗi. Mbə makwaghwa vay, dzar mbə ceker daŋə daŋə ni kə ghəshi dzaa nziy. 15 Ka məndi gha məni makwaghwa vay, ə ka məndi dzaa zlapiy zlapə kaa mbəzli dzar mbə məlməhi gwanashi lə mbə məlmə Zheruzalem ta gwaʼa. A kə məndi dzaa ni kaa zlapə tsa vay: “Maɗim dzəmə dəlagwa a ghuy dza ta pəlakə kəslifə fə har məndi vaa Ulivə, ya na nguɓəti məndi nguɓə nguɓə na, ya naa pəsəta kutita tə gamba, mbaʼ kəslifə fə har məndiy mirə, mbaʼ kəslifə slərpə, mbaʼ kəslifə fəhi nza kəslifə ti shi təruŋ. Sa ka ghuy palakəshiy, nza ghuy daŋə ceker li shi, njasa tsasliti məndi va kwa zliya kuma pəhəti Hiyala” kə məndi dzaa ni kaa mbəzli,» kə məndi kwa zliya va dzəghwa tə pi tsa va. 16 Sa jangəvə ka Izərayel kuma va tsəgha ki na, mbaʼ ghəshi dzashi ta pala shi ɓəlakə məndi va ta daŋə ceker li shi. Ya wa ndə na, ka daŋə mə ghən ciki tsa ci, sa nza na nja bela pi tsa məɓa, ka daŋəshi kwa hur tipə shi, ka daŋəshi kwa hur tipə kiy ghyi tsa Hiyala, ka daŋəshi geʼi tə pi tsa nza miy dəgha har məndi vaa miy dəgha yam lə miy dəgha Efrayim. 17 Mbəzliy niy zhəghəkəvashi va tə hiɗi ka Babilunə gwanashiy, cəkeʼ niy dadaŋəti ghəshi ceker, mbaʼ ghəshi dzəmbəshi ta nziy mbə shi mbə makwaghwa va. Təruŋ məndi vəshishi mbə makwaghwa va, sa nza nay ghala vəghu tsa Zhuzəwe zəghu Nun niy kəray ka Izərayel məni makwaghwa va. Niy zhəkə ghəshiy mənəhu diɓaw. 18 Mbə makwaghwa vay, njasa səəkə vici niy jangə məndi kuma kwa zliya kuma pəhəti Hiyala va. Ghava na tə kwa taŋa vici paʼa tə kwa kərni vici. Vici mbərfəŋ niy mənti məndi mbə makwaghwa va. Ma tə kwa dəghasa vici na, mbaʼ məndi ɓasəshi gwanashi njasa sənaɓəshi məndi mbə məni.