Zhuziyas məni mazə dzəkən ka Zhuda
(2 NəMezh 34.1-2)
22
Ghala vəghu tsaa niy pəərə məndi Zhuziyas ka mazə tsaa sləkə ka Zhuday, piya dəghəs niy nza sa ci. Piya mahəkanəmətsəkə tanti niy mənti na mbə mazə, mbə məlmə Zheruzalem niy nza na lə nziy tsa ci. Yedida, niy nza slən tsa mbəghiy, zha Adaja ndə ka Butsəka niy nza na. 2 Kuma tiɗiɗə na niy məni Zhuziyas kwa kuma Kwa sləkəpə. Njasa niy məni jijiy Davitə vay, tsəgha niy məni na kuma. Niy zlata nuw səəbə ci va na ta dzay dzar kwa nahuti bəla ya kutiŋuw.Dikə tsa ka ta Hiyala dzanavə dza kaa zliya kuma pəhəti Kwa sləkəpə
(2 NəMezh 34.8-18)
3 Zhuziyas mbə məni kwa məŋ lə dəghasa piya ci mbə maziy, mbaʼ ghunay Shafan ndə tsasli shiy, zəghu Atsaliya jijiy Meshulem dzakə ghyi tsa Kwa sləkəpə. Ma kə kaa ngəci na: 4 «Mbala kəsay Hilkiya, dikə tsa ka ta Hiyala, a gha dzaa gəzanci, a ghəci mbərati gəna ɓəkə məndiy dzakə ghyi tsa Kwa sləkəpə gwanata, mbaʼ na tsəhəvə ka ta Hiyalaa ndəghu miy dəghaa dzakə ghyi tsa va va mbəzli. 5 Sa ka na mbərati gəna vay, nza ghəci fanambəshi mbə dəvə mbəzliy nighəə dzəkən sləni guma ghyi tsa Kwa sləkəpə, nza mbəzli va wanshi kaa mbəzliy dzaa guma ghyi tsa Kwa sləkəpə. 6 Kaa mbəzli nja ka ghəra sləni shighu, lə ka nga shiy lə nihuti ka sləni mbəɓa. Ka ghəshi dza lə gəna va diɓay, ka pa shiy nja kar shighu lə herezli fəɗiti məndi gar guma ghyi tsa kwa sləkəpə va məndi li shi. 7 Nəghətaa məndi dzaa pəla sənay nda njaa ghərati ghəshi sləni lə gəna va ma, sa nza nay, mbəzliy ghəra sləni lə kwal na ghəshi, pə gha kaa ngəci,» kə mazə Zhuziyas kaa Shafan.
8 Ma sa tsəhiy Shafan ndə tsasli shiy mbaʼ gəziy kuma va kaa Hilkiya ndə ta Hiyala ki, ma kə Hilkiya kaa ngəci na: «Ee dzanavə dza kaa zliya kuma pəhə pəhə na kiy ghyi tsa Kwa sləkəpə,» kə. Dza na mbaʼ ɓanavə zliya va kaa Shafan, mbaʼ ghəci jangəti. 9 Liy hum ki na, mbaʼ zhəghəghəvay dzəvəgha mazə ta gəzanci njasa mənta kuma. Ma kə kaa ngəci sa tsəhiy na na: «A ghiy ghiy ka sləni gha mbərati gənaa niy nza kiy ghyi tsa Kwa sləkəpə mbaʼ ghiy fanambəshi mbə dəvə mbəzliy nighəə dzəkən sləni guma ghyi tsa Kwa sləkəpə,» kə. 10 Zhini ma kə kaa mazə diɓa na: «A Hilkiya dikə tsa ka ta Hiyala ndara zliya kuma pəhə pəhə na,» kə, mbaʼ jangəti zliya va kwa kuma mazə.
Zhuziyas ghunashi mbəzli va Hulda Kwa gəzə kuma Hiyala
(2 NəMezh 34.19-28)
11 Ma sa favə mazə Zhuziyas kuma jangəti məndi va kwa zliya kuma pəhə pəhə na ki na, mbaʼ slakwanti kubeŋer kən ghən ci. 12 Ma kə kaa kar Hilkiya dikə tsa ka ta Hiyala ghəshi lə kar Ahikam zəghu Shafan, mbaʼ Akəbur zəghu Mishe, mbaʼ Shafan ndə tsasli shiy, mbaʼ Asaya ndə sləni tsa ci dikə tsa na: 13 «Mbalam a ghuy dzaa ɗuti kuma va Kwa sləkəpə tə ya, lə ta mbəzli ka Zhuda gwanashi dzəkən kuma kwa zliya kəsata məndi na. Sa nza nay, ɗiti fəti jijihimmə ta kuma kwa zliya vaw, nuti kuma gəzəkə məndi kwaɓa ghəshiw. Tə mbərkə kuma vay, a Kwa sləkəpə dzaa ɓakən nəfə təruŋ dzəkən ghummə,» kə kaa ngəshi. 14 Dza kar Hilkiya dikə tsa ka ta Hiyala ghəshi lə kar Ahikam, mbaʼ Akəbur, mbaʼ Shafan, mbaʼ Asaya ki, mbaʼ ghəshi dzaa kəsata Hulda Kwa gəzə kuma Hiyala, tə yuwən giwa mbə məlmə Zheruzalem niy nza na. Mali Shalum zəghu Tikuwa jijiy Harəsa ntsaa nighəə dzəkən kubeŋer ka məndiy ghəra sləni kiy ghyi tsa Kwa sləkəpə li shi niy nza na. 15 Ma kə Hulda kaa ngəshi sa kəsata ghəshi na: «Avanta kuma gəzəkə Kwa sləkəpə Hiyala ka Izərayel: “Mbalam gəzancim kaa ntsaa ghunaŋuy va viya: 16 Ma kə Kwa sləkəpə Hiyala ka Izərayel pə ghuy ngəciy: Ta ɓəkə ngəraʼu dzee dzəmbə məlmə Zheruzalem lə dzəkən mbəzli mbəɓa, njasa tsasliti məndi va kwa zliya jangəti mazə ka Zhuda va. 17 Sa nza nay, a ghəshi zhəghavəra hum mbaʼ ghəshi dzashi ta slasla shiy kaa nihuti hiyalahi. Təruŋ satiy nəfə tsee dzəkən shi va kuma mənti ghəshi va gwanata. Təruŋuy satiy nəfə tsee dzəkən məlmə va, ka dəpəva naw. 18 A na mazə ka Zhuda tsaa ghunaŋuy va ta ɗu kuma vəyay, avanta kuma ka ghuy gəzanci: Ma kə Kwa sləkəpə Hiyala ka Izərayeliy: A gha favə kuma kwa zliya va, 19 mbaʼ kuma va dapaŋa mbə nəfə tsa gha. Dza ghay, mbaʼ gha mənti ghən tsa gha Juwə kwa kume, sa favə gha kuma gəzəkee dzəkən Zheruzalem lə dzəkən mbəzli mbəɓa, sa nə ya va ta bakwantishi dza məndi, mbəzli bazla bazla ni dza ghəshiy nza, pən. Dza gha diɓay, sliku sliku gha slakwanti kubeŋer kən ghən gha, ka wahə təruŋ. Tə mbərkə kuma mənti gha va tsəgha na gwanatay, ee zləɓavə cəʼu gha kuraku. Tsəgha gəzee yən Kwa sləkəpə. 20 Njana mənti gha tsəghay, lə zərkə dza ghaa məti, mbaʼ məndi dzaa lantəŋa kwa kuli gha. Ka dza ghaa nashi ngəreʼuerhi dzee va ta ɓəə səəkəə dzəkən ka Zheruzalemuw,” kə Kwa sləkəpə,» kə Hulda kaa mbəzli ghunikə mazə Zhuziyas va. Dza mbəzli va ki, mbaʼ ghəshi dzaa zhananavə kuma va kaa mazə Zhuziyas.