Manase məni mazə dzəkən ka Zhuda
(2 NəMezh 33.1-10,18-20)
21
Piya məŋ lə bakə niy nza sa Manase ghala pi tsaa niy pəərə məndi ka mazə, dza na mbaʼ mənti piya cifəmətsəkə mbə mazə. Mbə məlmə Zheruzalem niy nza na lə nziy tsa ci, Hefəshiba niy nza slən tsa mbəghiy. 2 Kuma gəmgəm na niy məni na kwa kuma Kwa sləkəpə. Kuma jikirkir na va niy məməni hulfəhi mbəzliy niy tahanti Kwa sləkəpə va tə hiɗi shi ta nziy ka Izərayeli ti shiy, ghənzə niy məni na. 3 Pəhiy niy gugumati məndi va ta ta hiyalahi, mbaʼ Ezekiyas diy niy zantishiy, aa niy zhanatishi dzəghwa tə pi tsaa niy nza ghəshi va. Dza na mbaʼ gugumati pihi ta vəlanta shiy kaa hiyala har məndi vaa Baal ti shi, mbaʼ gariy shiy ka məjəʼa hiyalaa mali har məndi vaa Akera, njasa niy mənti Akab mazə ka Izərayel va. Dza na ka tsəfəku kwa kuma shi dziy tə ghumə gwanashi diɓa. 4 Aa niy zhiniy ngangati nihuti pihi ta vəli shiy kaa nihuti hiyalahi, kiy ghyi tsa Kwa sləkəpə va mbə məlmə Zheruzalem, ya tsəgha niy nə Kwa sləkəpə: «Kiy ghyi tsee va mbə məlmə Zheruzalem dzee ci ghən tsee,» kə niy niy. 5 Sa dza na diɓay, ngaʼ ngangati pihi ta vəli shiy kaa shi dziy tə ghumə gwanashi dzar kwa tipəhi bakə ni va kiy ghyi tsa Kwa sləkəpə. 6 Aa niy ndəhu zəghu ci kaa hiyalahi, ka ninighə shiy ghənghən ghənghən, ka nga zləra. Aa niy fiy mbəzli ta ɗuw kuma ghəshi va mbəreketi, ka nighə shiy dzaa məniva tarɓa kwa kuma. Kwa kuma kwa kuma niy dzati na lə məməni shi gəmgəm ni kwa kuma Kwa sləkəpə. War ə nəfə tsa Kwa sləkəpəə sati va shi məməni na va ki. 7 A Manase niy mənivə shiy ka məjəʼa hiyala har məndi vaa Akera, mbaʼ fiyshi kiy ghyi tsa Kwa sləkəpə. A Kwa sləkəpə niy gəzanakə kaa kar mazə Davitə lə zəghu ci mazə Saləmuŋ ngar ki: «Mbə məlmə Zheruzalem, tikə kiy ghyi tsa na pi tsa tivee mbə takəhi ka Izərayel gwanashi ta ci ghən tsee kaa mbəzli tiɓa, ya paʼa humɓa. 8 Kama na war mbə nu kuma gəzanakəshe ka Izərayel, ka nu kuma pəhanatishi Muyizə ndə sləni tsee gwanatay, ka dzee zhiniy fambəshi mbə dadaŋərə kərakə lə hiɗi ɓanavəshee va kaa jijihi shiw,» kə niy ni. 9 Ya tsəgha nzə kiy, niy ɗiti fəti ka Zhuda ta kuma va na shi kiw. Dza Manase mbaʼ ngaɗambəshiy dzəmbə məni kuma jikir na təruŋɓa ghəshi kaa mbəzliy niy bakwanti kwa sləkəpə va ta nziy ghəshi tə hiɗi shi. 10 Dzəghwa Kwa sləkəpə ki, mbaʼ ghunashi ka gəzə kuma nzə, ka sləni nzə ta gəzə kuma. Ma kə ghəshi na: 11 «A mazə Manase mənti kuma jikirkir na kwa kume. Təruŋɓa na mənti na va kuma jikir na na kaa naa niy məni ka Amuritə va kwataŋa. Zhini, mbaʼ fambə ka Zhuda mbə kuma jikir na lə ta mbəreketi ci va diɓa. Va tsəgha kiy, 12 avanta kuma gəzəkə Kwa sləkəpə Hiyala ka Izərayel: “Ta ɓəkə ngəraʼu dzee dzəkən mbəzli mbə məlmə Zheruzalem lə dzəkən mbəzli tə hiɗi Zhuda. Ya wa ntsaa dzaa favə gəla ngəraʼu tsa vay, ta səta dza məhərli ci. 13 Njasa niy məntee va lə məlmə Samari mbaʼ mbəzli kwa miy dəgha Akabiy, tsəgha dzee ta mənti lə məlmə va. Njasa ka məndi vaa nanti kwakwa fəleɗekə, mbaʼ məndi dzəɓiyiy, tsəgha dzee ta zanti mbəzli mbə məlmə Zheruzalem. 14 Niy dzaa tərə mbəzli tə ghuməshi mbə mbəzlee vay, ta zhəghanavəshi hum dzee, mbaʼee zlashi kaa ka mbəzə shi. Nza mbəzli va pahu shiy və shi, mbaʼ ghəshi ɓasəhu shi tə hiɗi shi gwaʼ gwaʼa. 15 Sa nza na mbaʼ mbəzlee va mənti kuma jikir na kwa kumee, war ə ghəshiy ɓəra nəfə tsee sati, ghava na tə vəghu tsa səvəri jijihishi va mbə hiɗi ka Ezhiptə paʼ va ndatsə, va tsəgha dzee ta mananshi kuma va tsəgha,” kə Kwa sləkəpə,» kə ka gəzə kuma nzə. 16 Zhəkən kuma jikir na va niy mənti na, lə naa niy fambə na va ka Zhuda mbə məni nziy, a mazə Manase niy bəkuhu mbəzli kama fəti vəshi dalala, gar təhay pi tsa mbə məlmə Zheruzalem paʼa tə pi tsa kəray na miymiy shi.17 Nahuti kumaa tərmbəə dzəkən mazə Manaseyiy, kwa zliya kuma mənəhu mezhizhi ka Zhuda tsaslaghwa məndi. Kwaɓa tsasliti məndi kumaa dzəkən shi mənəhu na gwanashi lə dzəkən kuma jikir na mənəhu na. 18 Liy hum sa mətiy nay, mbaʼ məndi lanti kwa tsa ci. Tsa Uza, ka məndiy har tsa va diɓa. Mbaʼ zəghu ci Amun mbərəhu məni mazə kwa pi tsa ci.
Amun məni mazə dzəkən ka Zhuda
(2 NəMezh 33.21-25)
19 Liy hum ki na, mbaʼ məndi pəərəti Amun ka mazə tsaa sləkə ka Zhuda. Ghəci lə piya bakəmətsəkə bakəti niy pəərə məndi. Piya bakə niy mənti na mbə mazə, mbə məlmə Zheruzalem niy nza na lə nziy tsa ci. Meshulemet, kə məndi niy ni kaa slən tsa mbəghiy, zha Harus ndə ka Yutəva niy nza na. 20 Kuma gəmgəm na niy məni Amun kwa kuma Kwa sləkəpə nja Manase diy tsa va. 21 War njasa niy məni diy va shiyiy, tsəgha niy mənishi na. Mbəreketiy niy tata diy vay, mbə tashi niy nza na kuraku, ka tsəfəku kwa kuma shi. 22 Aa niy zhəghanavə hum kaa Kwa sləkəpə Hiyala jijihiy, niy nu kumaa niy gəzəkə na naw. 23 Sa dza mbəzli dikə dikə ni mbə ka sləni ciy, mbaʼ ghəshi pəhəti kuma ti, mbəh ghəshi paslanti kiy ghyi tsa ci. 24 Dza mbəzli tə hiɗi ci kuraku mbaʼ ghəshi bakwanti mbəzliy niy pəhəti kuma vaa paslanti, pəərə ghəshi pəərəti zəghu ci Zhuziyas ka mazə kwa pi tsa ci. 25 Nahuti kumaa tərə dzəkən mazə Amuniy, kwa zliya kuma mənəhu mezhizhi ka Zhuda tsaslaghwa məndi. 26 Kwa na ci kuli niy lanti məndi, kwa tsa Uza, mbaʼ zəghu ci Zhuziyas mbərəhu məni mazə kwa pi tsa ci.