Zəlghu tsa mazə Ezekiyas lə mbəli tsa ci
(Ezay 38.1-8; 2 NəMezh 32.24)
20
Ghala vəghu tsa va ki na, mbaʼ zəlghu kəsəvə mazə Ezekiyas gar mətiy ghəci və. Dzəghwa Ezay ndə gəzə kuma Hiyala, zəghu Amuts mbaʼ səəkəə kəsay, ma kə kaa ngəci na: «Ma kə Kwa sləkəpiy: “Mbazlanti miy tsa gha kaa mbəzli kiy ghyi tsa gha. Sa nza nay, ka mbəliŋa ghaw, ta mətiŋa dza gha” kə,» kə Ezay. 2 Sa favə Ezekiyas kuma va tsəgha na, dza na tərəɗ zhəghata kuma ci dzəmbə baŋwa ciki ka cəʼu Kwa sləkəpə, ma kə na: 3 «A Kwa sləkəpə, titihu əə cəʼuŋee, zəzətiy dzəkən nziy tsee kwa kuma gha, kuma wəzə na niy mənee, lə nəfə kutiŋ niy nuŋee, lə kwal tsa nzə niy nuwee kuma, ka məni kumaa təɓaŋa,» kə Ezekiyas, war ə ghəciy wahə təruŋ təruŋ. 4 Ghala vəghu tsa vay, ghulay niy nza Ezay kwa tipə mazə. Ma kə Kwa sləkəpə kaa ngəci na: 5 «Zhəghəva, a pə gha kaa Ezekiyas ntsaa sləkə mbəzli yay: “A kə Kwa sləkəpə, Hiyala jijiŋa Davitiy: Ee favə cəʼu gha, mbaʼee nata wahə gha. Ta mbəlantəŋa dzee. Sa ka gha mənti vici bakə sanay, ta mbay dza ghaa tsəhəŋa kiy ghyi tsee yən Kwa sləkəpə tə kwa mahəkana vici. 6 Məŋ lə cifə dzee mətsahakənəŋa piya kən piya gha. Ta mbəlantəŋa dzee mbə dəvə mazə ka Ashiri ghuy lə mbəzli mbə məlmə Zheruzalem. Ta ndəghu məlmə va dzee, sa nzee Hiyala, mbaʼ tə mbərkə Davitə ndə sləni tsee, kə Kwa sləkəpə,” pə gha kaa ngəci,» kə Kwa sləkəpə kaa Ezay. Mbaʼ Ezay zhəghətəvay gəziy kuma va tsəgha.7 Liy hum ki, ma kə Ezay diɓa na: «Mbalam zlərəvəm ya bəzakə a ghuy nahamiy miy zhi tsa mazə va, ta kəɗiy dza na,» kə. 8 Ma kə Ezekiyas kaa Ezay ndə gəzə kuma Hiyala na: «Tə wa dzee sənay, ta mbəlantəra dza Kwa sləkəpə kataŋ, ta dzakə ghyi tsa nzə dzee liy hum vici mahəkanə pənaa?» kə 9 Ma kə Ezay kaa ngəci na: «Avanashi shi gəzəkə Kwa sləkəpə məniŋa ta mbə ghaa sənay tsəgha dza kuma gəzəkə na va ta məniva kataŋ, pə gha, nza gha tivə shiy kutiŋ ta shi bakə ni ni: Dzəy liy hum ɗi gha məceku zhəkiyshi gar bəlakə səɗa məŋ shəkənaa, naa dzati kwa kuma ɗi gha ghəshi kətəghəvashi gar bəlakə səɗa məŋ na?» kə 10 Ma kə Ezekiyas na: «Ta kətiva məceku dzati kwa kuma gar bəlakə səɗa məŋiy, shiy ɓəlaŋ na niva shiy. Wəzəɓa dziy liy hum ɗee ghəshiy zhəkiyshi gar bəlakə səɗa məŋ,» kə. 11 Dzəghwa Ezay ndə gəzə kuma Hiyala ki, mbaʼ cəʼuti Kwa sləkəpə. Dza Kwa sləkəpə mbaʼ zhəghəkiy məceku gar bəlakə səɗa məŋ dzəmə vəgha pi tsa ka məndiy dzəmə ta dzəmbə cikə tsa Akaz.
Məndi ghunikə mbəzli tə hiɗi ka Babilunə va Ezekiyas (Ez 39)
12 Geʼi ghala vəghu tsa va ki na, mbaʼ mazə ka Babilunə, Merudak-Baladan, zəghu Baladan ghunashi mbəzli va Ezekiyas lə zliya mbaʼ lə shiy kaa ngəci. Sa nza na mbaʼ niy favə, gurapiy na, kə məndi. 13 Dza Ezekiyas mbaʼ kaʼutishi, mbaʼ cacanatishi pi tsa ka naa fə shi ci nza dimə ti shi gwanashi, shiy nja kar gəna, lə mbəzə kwa shamshama, mbaʼ urdihi, mbaʼ in tsa nza dimə ti, mbaʼ nihuti shi sləni nza dimə ti shi, mbaʼ nihuti shiy niy nza tə pi tsa ka naa fə shi ci nza dimə ti shi gwanashi. Nihuti shiy tiɓa kalaa niy cintishi Ezekiyas kiy ghyi tsa ci lə tə hiɗi ci gwanashiw.
14 Liy hum ki na, mbaʼ Ezay ndə gəzə kuma Hiyala səəkəə kəsay Ezekiyas, ma kə kaa ngəci na: «Njaa nə mbəzliy səəkə va tiɓa kaa ngəŋaa? Kuma səəkə ghəshia?» kə kaa ngəci. «Tə hiɗi kərakə səəkə ghəshi, tə hiɗi ka Babilunə,» kə Ezekiyas. 15 Ma kə Ezay kaa ngəci diɓa na: «A shi nighəhu ghəshi kiy ghyi tsa gha shiki?» kə. «Shi kiyɓa gwanashiy nashi ghəshi. Shiy tə pi tsa kee fə shi ya nza dimə ti shi, kala cintishi yaw,» kə Ezekiyas. 16 Ma kə Ezay kaa Ezekiyas ki na: «Avee dzaa gəzəŋa kuma gəzəkə kwa sləkəpə, ma kiy: 17 “Mbə səəkə na tsahuti vəghu, mbə vəghu tsa vay, cəkeʼ dza məndi ta pahu shi kiy ghyi tsa gha lə shiy niy ɓasəti jijihiŋa ghala kwataŋa paʼa va vəghu tsa ndatsə, mbaʼ məndi dzashi li shi dzəti hiɗi ka Babilunə. Shiy tiɓa dzaa tərmbə tikuw. 18 Ka məndi dza diɓay, mbaʼ məndi kəəsəhu nihuti mbə mbəzliy səvəri kwa miy dəgha gha, mbaʼ məndi tsəʼwantishi ta nza ghəshi ka mbəzliy ghəra sləni kiy ghyi tsa mazə ka Babilunə,” kə Kwa sləkəpə,» kə Ezay kaa Ezekiyas. 19 Ma kə Ezekiyas kaa Ezay na: «Kuma gəzəkə Kwa sləkəpə na zhanavəra ghay, kuma wəzə na. Nza zərkə nza tiɓa kala kumaa gagashi mbəzli tiɓa yən mbə mazə nanzə sa?» kə. 20 Nahuti kumaa tərmbəə dzəkən mazə Ezekiyasiy, kwa zliya: Kuma mənəhu mezhizhi ka Zhuda tsaslaghwa məndi. Kwa zliya va tsasliti məndi kumaa dzəkən zal tsa mənəhu na. Kwaɓa tsasliti məndi njasa ngati na pi ta nza yam kwa, lə njasa lati na kwal ta ɓə yam vaa dzəmbə məlmə Zheruzalem. 21 Sa mətiy nay, mbaʼ məndi pəərəti zəghu ci Manase ka mazə kwa pi tsa ci.