Ezekiyas ɗuw kuma va Ezay ndə gəzə kuma Hiyala
(Ez 37.1-7)
19
War sa zhananavə mbəzli va kuma gəzəkə ndə ka Ashiri va kaa mazə Ezekiyas ki na, dza na kuyahə kuyahə slakwanti kubeŋer kən ghən ci, mbaʼ pakən kubeŋeriy təhuni mbəri ka dzay dzakə ghyi tsa Kwa sləkəpə. 2 Dzəghwa na mbaʼ ghunashi kar Eliyakim ntsaa sləkə pi tsa kiy ghyi tsa mazə, ghəshi lə Shevəna ndə tsasli shiy, mbaʼ pəhepəhər mbə ka ta Hiyala va Ezay ndə gəzə kuma Hiyala zəghu Amut. Lə kubeŋeriy təhuni mbəri niy nza mbəzli va kən ghən shi kuraku. 3 Ma kə ghəshi kaa ngəci sa tsəhəshi ghəshi na: «Ma kə Ezekiyasiy: “Vici ndatsə nay, vici ngəraʼu na, a məndi dəʼuvəmmə, mbaʼ məndi pakənəmmə haʼu. Ghala mbə ghummə lə maliy kemahə va ta ya kala bərci və ta təɗi zəghuw. 4 A mazə ka Ashiri ghunay ntsaa sləkə mbəzliy nighə dzəkən shi tə hiɗi ci ta tsərə Hiyalaa ɓəpə piy. A Hiyala gha Kwa sləkəpə dzaa favə kuemer gəzəkə na va gwanashi bərke. Nda nza naa ɓasanakən nguvə tə kuemer vay? Titihu əə cəʼuŋee a gha cəʼu Hiyala ta niy tərmbə mbəzli mbə hulfə ghummə,” kə Ezekiyas,» kə ghəshi.5 Sa dza mbəzli ghunashi Ezekiyas vaa gəziy kuma va na, dza Ezay ka zləɓanshi kuma. 6 Ma kə na: «Mbalam gəzancim kaa dikə tsa ghuy: “A kə Kwa sləkəpə, kə Ezayiy: Kuma favə gha va ka sləni mazə ka Ashiri gəzə, ka tsərəɗa mbə kuma shi vay, ka dza her gha və ma. 7 Ta ɓanakə nuwur dza məndi kaa mazə ka Ashiri. Sa dza naa favə nuwur tsa vay, ta fanambə nahuti zəzə kuma dzee mbə nəfə tsa ci, ka na dza na, mbaʼ zhəghətəvay zhəti hiɗi ci. Sa kee dza ki na, mbaʼee ghunashi mbəzli ta paslanti lə kafaʼi tə hiɗi ci, kə Kwa sləkəpə, kə Ezay,” pə ghuy kaa ngəci,» kə Ezay kaa mbəzli ghunikə Ezekiyas va.
Mazə ka Ashiri zhiniy ghunikə ndə
(Ez 37.8-13; 2 NəMezh 32.17)
8 Mbaʼ məndi səəkəə gəzanci kaa ntsaa sləkə mbəzliy nighəə dzəkən shi tə hiɗi ka Ashiri: «A ntsa gha dikə tsa kafiy mbə məlmə Lakish, mbaʼ dzay ta mbəzə lə mbəzli mbə məlmə Livəna,» kə məndi kaa ngəci. Sa favə na tsəgha na, mbaʼ dzaa kəsay mazə tsa ci va mbə məlmə va. 9 Dzəghwa mbaʼ məndi səəkəə gəzanci kaa mazə ka Ashiri: «Ava Tirkas mazə ka Etiyupiy mbə səəkə ta pəsli tə gha,» kə məndi kaa ngəci. Dza na ki, mbaʼ zhiniy ghunashi mbəzli va Ezekiyas. 10 Ma kə kaa ngəshi na: «Mbalam kəsayim mazə ka Zhuda, ma pə ghuy kaa ngəciy: “Ya əə nə Hiyala gha va vəshi gha ti: Ta makətəra dza na va mbashi mbəzli mbə məlmə Zheruzalem kiy, əə dakəŋa na. 11 Əə sənay ma gha njasa irəhu mezhizhi ka Ashiri mbəzli tə nihuti hiɗi gwanashi paʼa ka zantishi ta fə shəndəkə dzəti Kwa sləkəpə shəkəna? Gha na sa dza Hiyalaa mbəlanti nə gha na? 12 Ghala vəghu tsaa niy bəku mezhizhiy gha məni mazə tə hiɗi ghiy mbəzli mbə məlmə Guzan, lə ni mbə məlmə Haraŋ, mbaʼ ni mbə məlmə Resef, mbaʼ mbəzli mbə hulfə Eden va niy nza mbə məlmə Telasariy, Tawa niy mbəlanti ma hiyalahi shi mbəzli vaa? 13 Zəzətiy dzəkən kumaa kəsahi mezhizhi ka Hamat, lə mazə ka Arpad, mbaʼ mazə ka Layir, mbaʼ mazə ka Sefarwayim, mbaʼ mazə ka Hena, mbaʼ mazə ka Iwa, njaa kərkə ghəshia? kə mazə ka Ashiri,” pə ghuy kaa ngəci,» kə mazə ka Ashiri kaa mbəzli ghunashi na va.
Cəʼu Ezekiyas
(Ez 37.14-20)
14 Dza mbəzli ghunashi mazə ka Ashiri va, mbaʼ ghəshi dzaa ɓanavə zliya ghunashi məndi va li kaa mazə Ezekiyas. Sa jangəti na na, mbaʼ dzay dzakə ghyi tsa Kwa sləkəpə, dzakə na pəli pələniy. 15 Dza na ka cəʼu, ma kə na: «A Kwa sləkəpə Hiyala ka Izərayel, Hiyalaa nziyta mə Sherubeŋhi, gha kutiŋa na Hiyala slən hiɗi sləkə mezhizhi tə hiɗi gwanashi, gha mənti na hiɗi lə ghumə. 16 Əə cəʼuŋee a gha favə kuma ghunay Sansherib mazə ka Ashiri va ndə ta gəzə kaa gəŋa gha Kwa sləkəpə. Nighətiy dzəkən kuma va wuzə. Favə njasa tsərətəŋa na gha Hiyalaa ɓəpə piy mbə kuma ci va. 17 Ta na navay kwa sləkəpiy, a mezhizhi ka Ashiri bakwanti mbəzli tə nihuti hiɗi ɗaŋ, mbaʼ ghəshi papahu shi tə hiɗi shi. 18 A ghəshi ndandaghambə hiyalahi mbəzli va mbə ghu, raʼi ghəshi zantishi. Niva hiyalahiy, hiyalahi kataŋ ni niy nza ghəshiw. Shi fəɗiti ndə ngəri tə shighu, mbaʼ shi mənti na tə hərezli lə dəvə ci niy nza ghəshi. 19 Sana kiy Hiyala ghiy Kwa sləkəpiy, əə cəʼuŋee a gha mbəlantəŋiy mbə dəvə Sansherib. Ghalaɓay, ta sənay dza məzhizhi tə hiɗi lə mbəzli sləkə ghəshi gwaʼ gwaʼa gha na Hiyala kutiŋa gha kwa Sləkəpə, kə ghəshi,» kə.
Ezay zhini kuma zləɓanakə Kwa sləkəpə kaa Ezekiyas
(Ez 37.21-35)
20 Liy hum ki na, dza Ezay mbaʼ ghunay ndə va mazə Ezekiyas. Ma kə kaa ngəci na: «Mbala kəsay Mazə Ezekiyas nza gha gəzanci: “Ezay zəghu Amut ghunara na va gha, ma kə Kwa sləkəpə Hiyala ka Izərayel kiy: Ee favə cəʼu cəʼura gha va ta kuma kən Sansherib mazə ka Ashiri, 21 va tsəgha kiy, avanta kuma gəzee yən Kwa sləkəpə dzəkən:
Ghala mbə Zheruzalem lə zha səəkə ma zal dzar kwaw.
Ka naŋa na nja shiy kwa kuma nzuw, əə ʼushəŋa na,
Zheruzalem kiyas na vay, mbə gənəgəni liy hum gha.
22 A ntsa sawa gha va, ka tsərəaa?
A ntsa ʼwaŋə gha vaa dzəkən ka nighə lə zləra mətsəaa?
Yən na sa mananta gha va shi va yən Hiyala ka Izərayel va ɗewɗew na na?
23 A gha ghunashi mbəzli ta tsərəɗa yən Kwa sləkəpə.
Ma pə gha lə miy tsa shiy: Ɗaŋ na mutiti gədewesli viya yən Sansherib.
Ee səəkə mə ghən dəlegwigwi li shi,
Ee tsəhəra paʼa tə pi tsa kama məndi gar tsəhəshi ti mə dəlagwa Libaŋ.
Ee kəsləhu shighu fə har məndiy sedər məɓa, niy gura bitə bitə ni,
zhini mbaʼee kəsləhu shighu fə har məndiy shipəre məɓa, niy guraa təɓə məɓa.
Ee tsəhəra tə pi tsa kərkəva dəlagwa va, tə pi tsa gura zhighu mbəɓa.
24 Yəniy, ee lahu yam, ka sahushi tə hiɗi nihuti mbəzli.
Kwataka sa dzahuee dza dzar tə hiɗi ka Ezhipətiy,
cəkeʼ mbambasəshi yam kwa həleɗemer tə hiɗi shi, pə gha kaa kuma gəzə gha gha Sansherib.
25 A kuma tiɓa kala sənata gha ki Sansheribə.
Sənay gha yən pəhəti na shi va ta məniva ghəshi tsəgha ghala kwataŋata pə ghaw.
Ghala vəghu tsaa niy nza kwataŋa pəhantee məni shiva tsəgha,
na maɗee zlashi, a ghəshi məniva nana.
Va tsəgha nay gha sana kiy, war ə ghaa babaʼu məlməhi ngaghwa məndi kwa kələm, mbaʼ gha zhəghantishi nja hərezli ɓasiy məndi.
26 Va tsəgha kama bərci va mbəzli mbə məlməhi va.
Gwaʼa gwaʼa ghəshi tashi va hazləni, kala sənata ma kuma ka ghəshi məni.
A ghəshi zhəghəshi kuɗəkuɗəshi nja guzən tsa dzar mbə za.
A ghəshi zhəghəshi nja guzən tsa ʼwar pəsə tsa, nja guzən tsaa pəsiy dzar mə ghən ciki.
A ghəshi zhəghəshi nja haa niʼuta ghənzə ghula ta nakə.
27 Gha sanay, kuma gha tiɓa kala sənata yaw.
Njasa sati gha lə njasa nziy ghay, cəkeʼ kee sənay.
Njasa səvəri gha kiy ghyi tsa gha lə njasa səəkə ghaa dzakə ghyi tsa ghay, cəkeʼ kee sənay.
Ya ghala ka nəfə tsa ghaa satiy dzəkən yay, cəkeʼ kee sənay.
28 Njana nza na, war ə ghaa ghurvəə dzəkənee,
mbaʼ gəzə kuma səna gəzə ghaa dzəkənee tsəhəta kwa sləmə yay,
ta ighə takəsee dzee dzar mbə kəshən tsa gha, mbaʼee fambə radzama mbə miy gha.
Kee dzay, mbaʼee zhinəghəŋaa jighi kwa kwal tsaa niy səəkə gha va kə Kwa sləkəpə kaa kuma gəkə naa dzəkən Sansherib, kə Ezay” pə gha kaa Ezekiyas,» kə Ezay kaa ntsa ghunay na va.
29 Zhini ma kə Ezay diɓa na: «Ma kə Kwa sləkəpə kə Ezay, pə gha dzaa ni kaa Ezekiyas diɓay: “Ta na na ghay Ezekiyasiy, avanashi shiy dzaa mənishi, ta mbə ghaa sənay tsəgha dza shiva ta məniva kataŋ pə gha: Tə penay, veŋkereŋ alkamari dza məndi ta zəmə, hazhiy alkamari tsaa pəsəy kutiy nja guzən dza məndiy zəmə. Ma tə kwa mahəkana piyay, nza ghuy tsəŋu alkamari ka dəʼu, ka za fəhi ka məndiy ta tay tə ya shi, ka zəmə ya shi. 30 Niy dzaa tərmbə mbəzli tə hiɗi ka Zhuda tə ghuməshiy, nja fəhi juw juw ni dza ghəshiy nza. Njasa ka fəhi juw juw ni vaa ha hililiŋə shiy dzəmbə hiɗi ka yay, tsəgha dza ghəshiy nza. 31 Tsəgha dza na ta məniva, niy dza vaa tərə mbəzliy, ta səvəri dza ghəshi mbə məlmə Zheruzalem. Ta səvərishi dza ghəshi mbə dəlagwa Shiyuŋ. Ava kuma dza Kwa sləkəpə ta məni sa nza na mbaʼ ɗiti mbəzli nzə təruŋ. 32 Ta na mazə ka Ashiriy, avanta kuma gəzə kwa sləkəpəə dzəkən: Ka dzəmbiy naa dzəmə məlmə Zheruzalemuw, ka həghə havə naa dzəmbə ya kutiŋuw, ka dza naa mbəzəhu mbəzə lə mbəzli mbəɓaw, ka dza naa kəsəhu galhi ci ta ka shiy mbə mbəzə lə mbəzli mbəɓaw. Ka dza naa ɓasəhu hiɗi dzəta kələm tsaa dəzlay məlmə vaw. 33 Kwa kwal tsaa niy səəkə na va vay, kwaɓa dza naa zhəghəvaa dzay. Ta na məlmə Zheruzalem nay, ka dza naa dzəmbiyiw, yən gəzə na yən Kwa sləkəpə. 34 Ta ndəghuti mbəzli mbə məlmə Zheruzalem dzee, ta mbəlantishi dzee sa nzee Hiyala, mbaʼ tə mbərkə Davitə ndə sləni tsee, kə Kwa sləkəpə, kə Ezay,” pə gha kaa mazə Ezekiyas» kə Ezay kaa ntsa ghunay na va.
Məndi paslanti Sansherib mazə ka Ashiri
(Ez 37.36-38; 2 NəMezh 32.21-22)
35 Ma həvir va ki na, mbaʼ ndə kwal tsa Kwa sləkəpə səəkiy dzəti pi tsa ɓasəshi ka sawji ka Ashiri, mbaʼ bakwanti ka sawji bələku bələku məŋ mbaʼ dəghəsəmətsəkə cifəti bələku. Ma sa waliy pi na, war mbəreketi va ghaa nay ma pi tsa dzar tə pi tsa va. 36 Dzəghwa Sansherib mazə ka Ashiri mbaʼ kafiy tiɓa lə ka sawji ci, ka dzay dzəmbə Ninivə, məlməə gura dikə tə hiɗi ci, mbaʼ nziyiy mbəɓa. 37 Ma tə nahuti vici ghəci mətsəfəku mbə cəʼu, mbə cikə tsa hiyala ci va har məndiy Nisruŋ na, dzəghwa nihuti ndərazhi ci, kar Adramelek ghəshi lə Sareser mbaʼ ghəshi səəkəə paslanti lə kafaʼihi shi. Sa paslanti ghəshi na, mbaʼ ghəshi hushiy dzəti hiɗi ka Ararat, mbaʼ məndi pəərəti Asarhaduŋ tsahuti zəghu ci ka mazə kwa pi tsa ci.