2 Mazə 18

Ezekiyas məni mazə dzəkən ka Zhuda

( 2 NəMezh 29.1-2; 31.1)

Ma Uze zəghu Ela mbə məni kwa mahəkana piya ci mbə mazə dzəkən ka Izərayel na, mbaʼ məndi pəərəti Ezekiyas zəghu Akaz ka mazə tsaa sləkə ka Zhuda. 2 Piya bakəmətsəkə cifəti niy nza sa ci ghala pəərə məndi. Piya bakəmətsəkə məsliɗəti niy mənti na mbə məni mazə, mbə məlmə Zheruzalem niy nza na lə nziy tsa ci, zha Zakari niy nza mbəghiy, Avi kə məndi ka slən tsa nzə. 3 Kumaa təɓanta kaa Kwa sləkəpə niy məni na. War njasa niy məni jijiy Davitə va niy məni na kuma. 4 Ghəci niy zanti na pihiy niy gugumati məndi va ta ta hiyalahi, zhini ghəci babaʼuanti hərezliy niy gagariy məndi va ka məjəʼa hiyalahi, ghəci slaslanti shighu ləliy məndi va ka məjəʼa hiyalaa mali har məndi vaa Akera. Dza na diɓa mbaʼ ɓəɓəlivəri shishi tsaa niy vasəti Muyizə va tə mbəzə ghəm na, sa nza na ghulashi ka Izərayel niy nza ghala vəghu tsa va mbə ndi shiy zən nja urdi kaa shishi tsa va. Nehushətaŋ niy har məndi shishi tsa va. 5 A Ezekiyas niy ɓanavə nəfə tsa ci kaa Kwa sləkəpə Hiyala ka Izərayel. Mbə mezhizhi ka Zhuda gwanashiy, niy nza ndə tiɓa nja ghəci ya mbə niy mənəhu mazə pərɓa ghəshi kaa ngəci, ya mbə niy mənəhu liy hum ciw. 6 War kwasəbə Kwa sləkəpə niy nza na mbə nziy tsa ci, səəkə naa zhəghanavə humuw. Mbə nuw kuma pəhəti Kwa sləkəpə va mbaʼ ɓanavə kaa Muyizə niy nza na lə nəfə tsa ci kutiŋ. 7 Kwasəbə niy nza Kwa sləkəpə, ya a shi məni nay, war mbə dzava niy nza ghəshi. Aa niy zhananati ghən kaa mazə ka Ashiri, kala kama ghəci tə dəvə ci ghula. 8 Dzəghwa na diɓa mbaʼ mbashi ka Filisteŋ, mbaʼ nughəshi paʼa tə hiɗi ka Gaza. Dza na mbaʼ ɓəɓəhu pəhi ka məndiy nziy mə shi ta ndəghu məlməhi, mbaʼ məlməhi kwa kələm.

Njasa niy ɓəhu məndi məlmə Samari

9 Ma tə kwa faɗa piya Ezekiyas mazə ka Zhuda mbə mazə, Uze zəghu Ela mazə ka Izərayel mbə məni kwa mbərfaŋa piya ci mbə mazə na, mbaʼ Salmanasar mazə ka Ashiri niy səvəriy lə ka sawji ci, mbaʼ pəsliy ta mbəzli mbə məlmə Samari, ka mbəzə li shi. 10 Piya mahəkanə niy mənti na mbə mbəzə li shi. Tə kwa mahəkana piya va na, mbaʼ mbashi. Ghalaɓay, Ezekiyas mbə məni kwa kwaŋa piya ci mbə mazə niy nza na. Ma Uze mazə ka Izərayel na, ghəci mbə kwa məsleɗa piya ci mbə mazə. 11 Dzəghwa mazə ka Ashiri ki, mbaʼ kəəsəghə ka Izərayel dzəti hiɗi ka Ashiri. Mbaʼ dzaa fiyshi mbə məlmə Hala, mbaʼ dziy miy həl Habur tə hiɗi ka Guzaŋ, mbaʼ mbə məlmə ka Medə. 12 Niy fa kuma ka Izərayel va Kwa sləkəpə Hiyala shiw, a ghəshi niy dzəghwashi kən kuma sla kiri tsaa niy nza kwa jipə shi li. Niy fa kumaa niy gəzanakəshi Muyizə ndə sləni tsa Kwa sləkəpə ghəshiw, niy məni kuma gəzanshi na ghəshiw, va tsəgha niy mənishi shiva li shi tsəgha.

Ka Ashiri pəslishi ta mbəzli tə hiɗi ka Zhuda

(Ez 36.1 ; 2 NəMezh 32.1)

13 Ma Ezekiyas mazə ka Zhuda mbə məni kwa məŋ lə faɗa piya ci mbə mazə na, dza Senakerib mazə ka Ashiri, mbaʼ pəsliy ta məlməhi kwa kələm tə hiɗi Zhuda. Dza na mbaʼ zləghuhushi. 14 Dzəghwa Ezekiyas mbaʼ ghunay ndəə dzəmbə məlmə Lakish va mazə ka Ashiri. Ma kə kaa ngəci na: «Mbala kəsay mazə ka Ashiri, ma pə gha kaa ngəciy: “Ee hənira, zlay mbəzə lə ya. Ya a kuma dza ghaa gəzəkəray, ta məni dzee,” kə mazə ka Zhuda, pə gha kaa ngəci» kə kaa ntsa va. Sa dza məndiy gəzanci kuma va tsəgha kaa mazə ka Ashiri ki na, mbaʼ sləniy kiluw gəna diwi diwi məsliɗəmətsəkə, mbaʼ tsahi mbəzə kwa shamshama tunə kutiŋ kaa mazə ka Zhuda, ta wancishi ghəci . 15 Dza Ezekiyas mbaʼ ɓanavə gənaa niy nza kiy tsa Kwa sləkəpə gwanata, mbaʼ naa niy nza kwa hutəvə tsa kiy ghyi tsa mazə gwanata. 16 Geʼi lə vəghu tsa va niy ɓəɓəlaŋəhu Ezekiyas mbəzə kwa shamshamaa niy vasati naa dzəti gizlgizl lə dzar tə pi tsaa dzati vəgha slərpəhi gizlgizl miy ciki tsa Kwa sləkəpə, mbaʼ vəlanaghə kaa mazə ka Ashiri.

Gəzə kuma dikə tsa ka sawji ka Ashiri

(Ez 36.2-22 ; 2 NuMezh 32.9-16)

17 Ya tsəgha nzə kiy, dza mazə ka Ashiri ghəci mbə məlmə Lakish mbaʼ ghunashi kar ntsaa sləkə ka sawjihi ci gwanashi, lə tsahuti ntsa dikə tsa mbə ka sawjihi ci, mbaʼ ntsaa sləkə mbəzliy nighəə dzəkən shi zəmə tə hiɗi ci, lə ka sawji ɗaŋ kwasəbə shi va mazə Ezekiyas mbə məlmə Zheruzalem. Sa tsəhəshi ghəshi na, mbaʼ ghəshi garəshi ndəku vəgha həl tsa məkə məkə tsa va, kwa kwal tsaa dzəti pi tsa ka ka yaɓə shiy yaɓə shiy ti. 18 Dza ghəshi ka har mazə. Dzəghwa kar Eliyakim ntsaa sləkə pi tsa kiy ghyi tsa mazə, zəghu Hiləkiyahu ghəshi lə kar Shevəna ndə tsasli shiy tsa mazə, mbaʼ Yuwah zəghu Asaf, ndə kwal tsa mazə, mbaʼ ghəshi səvərishi ta kumə li shi. 19 Ma kə ntsaa sləkə mbəzliy nighəə dzəkən shi zəmə tə hiɗi mazə ka Ashiri kaa ngəshi na: «Ma pə ghuy kaa mazə Ezekiyasiy: “Ma kə mazə tsa dikə tsa, mazə ka Ashiriy: A shi kəɗiti gha dza ma her ghaa? 20 Mbata ma ndə gəzə kuma lə miy na, əə tsəhuliy ndə ta mbay mbəzə nə məndi kaa ngəŋa na? A ntsa nay gha tsa gar yəpəti yəpə tə gha ɗi gha zhiniɗa ghən tay? 21 Ka Ezhiptə vəshi gha ni ti shi ta kətiŋa ghəshiy, ghala mbə shi lə guləvə tsa ɓəli ɓəli tsa va ka ndəə ni, ee jihətəvara ti, kə ndə na, mbaʼ bətəkwanti dəvə tə ntsaa jihəva tiw. Tsəgha na Farawaŋ mazə ka Ezhiptə ta mbəzliy vəshi ti, ta kəətishi ghəci. 22 Aw bay na, nda nza ghuy ni ngəra: Ta Kwa sləkəpə Hiyala ghiy vəshi ghiy, pə ghuy shəki. Hiyala va sa zanti gha va gha Ezekiyas pihiy niy gugumati məndi ta ta nzə ti shi, mbaʼ pihiy niy ngati məndi ta vəlanta shiy dzar ti shi sa? Ghənzə sa niy nə gha va kaa mbəzli ka Zhuda lə ka Zheruzalem: War tə pi tsa ngati məndi va ta vəlanta shiy kaa Hiyala mbə məlmə Zheruzalem gwaʼa tsəgha pə ghuy tsəfəku kwa kuma Kwa sləkəpə, pə gha sa? kə mazə ka Ashiri,” pə ghuy kaa mazə Ezekiyas,» kə ntsaa sləkə mbəzliy nighəə dzəkən shi zəmə tə hiɗi mazə ka Ashiri, kaa mbəzli ghunikə Ezekiyas va. 23 Zhini ma kə ntsa va vay diɓa na: «Ə pə ghuy dzaa gəzanci kaa Ezekiyas a ghəci ngati mbaza ghəshi lə mazə ka Ashiri, ntsee dikə tsa: Ta ɓanavə gədewesli diwi diwi bakəmətsəkə dzee ghəci kə gar kumavə mbəzli ta zlərə shi. 24 Ya tsəgha vəshi na ta ka Ezhiptə, ta kumavə mutiti gədewesli lə gədewesli və shiy, Sənayee nda njaa dza naa mənti dza naa zəmanavə bali kaa nguməna kutiŋ, tsaa guranti tə daw bərci mbə ka sləni ntsee dikə tsaw? 25 Talay, əə ghavə ntsee dikə tsaa səəkiy ta pəsli ta hiɗi ni tsəgha ta zantishi, kala ɓanavə kwal kwa sləkəpə nə ghuy na? Kwa sləkəpə dəʼu ghən tsa nzə gəzanci na: “Mbala pəsli ta hiɗi va a gha zantishi” kə kaa ngəci,» kə ntsa va. 26 Ma kə kar Eliyakim zəghu Hiləkiyahu ghəshi lə Shevəna mbaʼ Yuwah kaa ndə ka Ashiri tsa va na: «Titihu lə kuma ka Aram pə ghaa gəzəŋiy kuma, a ghiy favə. Ka gəzəŋiy kuma gha lə kuma ka Hebərə ma. Sa nza nay, ka ɗi ghiy mbəzli dzar tə kələm va mbə fa kuma gəzə gha vaa sənata kuma gəzə gha vaw,» kə ghəshi. 27 Ma kə ndə ka Ashiri tsa va kaa ngəshi na: «Kwataka kaa mazə tsa ghuy lə kaa ngəŋuy ghunara ntsee dikə tsa ta gəzə kuma, nə məndi kaa ngəŋuy na? Kuma ghunara dikə tsee va ta gəziy, kaa mbəzli dzar tə kələm va gwanashi na kuraku. Njasa dza ghuy va ta zəmə viʼ tsa ghuy ka sa kushi ghuy ɗi ghuy lə ɗima ghuy, kwa kuma juwiy, tsəgha dza ghəshi ta zəmə tsa shi viʼ, ka sa ni shi kushi, ɗi ghəshi lə ɗima ghəshi kuraku,» kə.

28 Dza ndə ka Ashiri tsa va garə gariy, ka zhiniy gəzə kuma lə kuma ka Ebərə zlaŋzlaŋ. Ma kə na: «Fam kuma gəzəkə mazə tsa dikə tsa, mazə ka Ashiri. Ma kiy: 29 “Ka ngəɗiŋuy Ezekiyas ma, ka mbəlantəŋuy na mbə dəvə yaw. 30 Ka zlaɓa ghuy ghəciy ngəɗiŋuy ta vəshi ta Kwa sləkəpə ma. Əntaa ghuy zləɓa ghəciy gəzaŋuy: Ya njaaɓay, ta mbəlantəmmə dza kwa sləkəpə, ka dza naa fanambə nana məlmə mbə dəvə mazə ka Ashiriw, kə ma,” kə mazə ka Ashiri,» kə ntsa va. 31 Ma kə diɓa na: «Ka fa kuma gəzəŋuy Ezekiyas ghuy ma. Na gəzəŋuy mazə ka Ashiri pə ghuy fa. A kə mazə ka Ashiriy: “Sləkaŋuyim lə ya, zhəghəvam zhimbə hur tsee. Ghalaɓay, ya wa ndə mbə ghuy na ta zəmə ya fəhi viŋəhi ci lə ya fəhi bəzakəhi ci dza na. Ya wa ndiy, yam lati na dza naa sa. 32 Liy hum kiy, nzee səəkə ta ɓəŋuy dzəti nihuti hiɗi yim ni lə hiɗi ghuy. Hiɗi vay, hiɗi məni kar Alkamari lə fə ka məndi vaa ta tay tə ya nzə, mbaʼ fə har məndi vaa ʼulivə ti shi na ghəshi. Ngəsl dza ghuy nza va kar peŋ, lə tay tsa wuzə tsa, mbaʼ mbəzəku, ka ɓəsə in njasa ɗi ghuy tə hiɗi va. Ghalaɓay tə ghuməŋuy dza ghuy nza, ka dza ghuy bəkuŋuyiw. Ka fa kuma gəzəŋuy Ezekiyas ghuy ma. Sa nə na va kaa ngəŋuy: “Ta mbəlatəmmə dza Kwa sləkəpə,” kiy, əə dakəŋuy na, ka zləɓa kuma ci ghuy ma. 33 Ndata tsəgha nay, tawa niy makətəra ma hiyalahi hulfəhi nihuti mbəzli va ɓə hiɗi shee shiki? 34 Kuma niy nza hiyalahi mbə məlmə Hamat lə ni mbə məlmə Arpad ghala pi tsaa ɓee məlməhi va niy makətəra ma ghəshi va ɓəshi kiyaa? Ya hiyalahi mbə məlmə Sefarəwayim, lə ni mbə məlmə Hena, mbaʼ ni mbə məlmə Avay, kuma niy nza ghəshi ɓee məlməhi vaa? Niy makətəra ghəshi va ɓə məlmə Samari tsəna? 35 Nama hiyala na saa niy mbəlanti hiɗi nzə mbə dəvee mbə hiyalahi va gwanashi tsiy? Kwa sləkəpə na naa dzaa makətəra va ɓə məlmə Zheruzalem nanzə nə ghuy na?” kə mazə ka Ashiri,» kə ntsaa sləkə mbəzliy nighə vaa dzəkən shi zəmə tə hiɗi mazə ka Ashiri.

36 Dzəghwa mbəzli tiɓa gwanashi mbaʼ ghəshi nziyshi ɗekəɗekəɗek kala zləɓa ma kuma, sa nza na mbaʼ mazə Ezekiyas niy gəzanshi: «Nəghətaa ghuy zləɓanci kuma ma,» kə niy ni. 37 Liy hum ki na, dza kar Eliyakim zəghu Hiləkiyahu, ntsaa sləkə pi tsa kiy ghyi tsa mazə, ghəshi lə Shevəna ndə tsasli shiy, mbaʼ Yuwah ndə kwal tsa mazə, zəghu Asaf kuyahə kuyahə ghəshi slaslakwanti kubeŋer kən ghən shi, mbaʼ ghəshi zhəghəghəvashiy dzəvəgha mazə Ezekiyas, mbaʼ ghəshi slanakə kuma gəzəkə ndə ka Ashiri tsa va va.