پولُس، پِستوسئے دێما
25
1 والی پِستوس، اے دَمگئے رَسگا سئے رۆچا رَند، چه کئیسَریَها دێم په اورْشَلیما شت.
2 اۆدا، مزنێن دینی پێشوا و یَهودیانی سرۆکان آییئے دێما پولُسئے سرا بُهتام جت و
3 دَزبندی‌اِش کرت که آیان وتی مِنّتوار بکنت و پولُسا اورْشَلیما راه بدنت.
شئورِش کرتگ‌اَت که پولُسئے آیگئے وهدا، راها آییئے سرا اُرُش بکننت و بکُشنتی.
4 پِستوسا پَسّئو دات:
«پولُس کئیسَریَها بندیگ اِنت، منا وت په همے زوتان همۆدا رئوگی اِنت.
5 چه شما لهتێن مستر و کماش منی همراهیا همۆدا بیئیت، اگن آییا مئیار و گناهے کرتگ گڑا همۆدا آییئے سرا بُهتام بجنێت.»
6 هَشت تان ده رۆچا گۆن آیان نندگا رند، پِستوس کئیسَریَها پِر ترّت.
دومی رۆچا آییا هَکدیوان کرت و هُکمی دات که پولُسا بیارنت.
7 وهدے پولُسِش آورت، چه اورْشَلیما آتکگێن یَهودی آییئے چپّ و چاگردا مُچّ بوتنت و آییئے سرا بازێن بُهتامِش جت، بله آیان چه آ بُهتامان یکّے هم، راست پَدّر کرت نکرت.
8 پولُسا په وتی بێمئیاریئے پَدّر کنگا درّاێنت:
«من په یَهودی شَریَت و مزنێن پرستشگاه و په رومئے کئیسرا، هچ ڈئولێن رَد و نارَهبندێن کارے نکرتگ.»
9 بله پِستوسا لۆٹت یَهودیان وتی مِنّتوار بکنت، پمێشکا چه پولُسا جُستی کرت:
«تئو اورْشَلیمئے رئوگا رزا ائے، که من همۆدا هَکدیوان بکنان و اے اَڑا بگیشّێنان؟»
10 پولُسا گوَشت:
«من رومئے کئیسرئے هَکدیوانئے دێما اۆشتاتگان.
منی دادرسی باید همِدا ببیت.
انچُش که تئو وت شَرَّ زانئے من په یَهودیان هچ مئیار و گناهے نکرتگ.
11 اگن من انچێن مئیارے بکرتێن که مَرکئے سِزایا هکدار بوتێنان، گڑا مَرکئے سِزائے سَگّگا هم تئیار بوتگ‌اتان، بله اگن منی سرا یَهودیانی اے بُهتام راست نه‌اَنت، هچکَس منا په کُشگا آیانی دستا داتَ نکنت.
منا کئیسرئے هَکدیوانا ببرێت.»
12 پِستوسا گۆن وتی سَلاهکاران شئور کرت و رَندا گوَشتی:
«تئو کئیسرئے هَکدیوانا پێشی لۆٹتگ، همۆدا پێش کنگَ بئے.»
پولُس، بادشاه اَگْریپاسئے دێما
13 کمّے رۆچان و رَند، بادشاه اَگْریپاس وتی گهار بِرنیکیئے همراهیا، په پِستوسئے مُبارکیا کئیسَریَها آتک و
14 تان بازێن رۆچێا همۆدا مَنت.
پِستوسا بادشاهئے دێما پولُسئے بارئوا تْران کرت و گوَشت:
«منی کِرّا بندیگے هست‌اِنت که والی پیلیکْسا اِشتگ.
15 وهدے اورْشَلیما شتگ‌اتان، یَهودیانی مزنێن دینی پێشوا و کماشان آییئے سرا بُهتام جت و منا گوَشتِش که مئیاریگی بکنان.
16 من گوَشتنت:
‹رومیانی رَهبند اِش اِنت، تان وهدے کَسێا بُهتام جنۆکانی دێما وتی دێمپانیئے مۆه دئیگ مبیت، آ سِزا دئیگَ نبیت.›
17 وهدے آییئے بُهتام جنۆک اِدا آتکنت، من آیانی اے اَڑئے گیشّێنگا دێر نکرت، دومی رۆچا هَکدیوانا نِشتان و پرمان دات که پولُس پێش کنگ ببیت.
18 وهدے بُهتام جنۆک په هبر کنگا پاد آتکنت، آیانی بُهتام چُش نه‌اتنت که من گُمان کرتگ‌اَت.
19 اے مردئے سرا آیانی بُهتام وتی جِندئے دینی هبر و ایسّا نامێن مرتگێن مردێئے بارئوا اتنت که پولُسَ گوَشیت آ زندگ اِنت.
20 من سَربَتَگ و هئیران اتان که اے اَڑا چِه پئیما بگیشّێنان؟ پمێشکا چه پولُسا جُستُن کرت که:
‹اورْشَلیمئے رئوگا رزا ائے، تانکه اے اَڑ همۆدئے هَکدیوانا گیشّێنگ ببیت؟›
21 بله پولُسا لۆٹت همِدا بمانیت و کئیسر وت آییئے اَڑا بگیشّێنیت.
پمێشکا من پرمان دات، تان وهدے آییا کئیسرئے دربارا راه مدئیان، همِدا دارگ ببیت.»
22 اَگْریپاسا گوَشت:
«من وت اے مردئے هبران گۆش دارگَ لۆٹان.»
پِستوسا گوَشت:
«باندا تئو آییئے هبرانَ اِشکنئے.»
23 دومی رۆچا، اَگْریپاس و آییئے گهار بِرنیکی، گۆن مزنێن شان و شرپێا، شهرئے پئوجی مَنسبدار و لهتێن نامدارێن سرۆکانی همراهیا، والیئے دیوانجاها آتکنت.
پِستوسا، پولُسئے پێش کنگئے پرمان دات و پولُس دیوانئے دێما آرگ بوت.
24 پِستوسا گوَشت:
«او بادشاه اَگْریپاس و دیوانئے نندۆکێن مردمان!
اے مردا که شما گِندگا اێت، اورْشَلیم و کئیسَریَهئے شهرانی سجّهێن یَهودیان اِشیئے سرا بازێن بُهتامے جتگ و گۆن من کوکّار کنان دَزبندی‌اِش کرتگ که اِشیا بکۆشارێنان.
25 منی زانگا، اِشیا چُشێن مزنێن مئیار و گناهے نکرتگ که کُشگ ببیت، بله وهدے اِشیا لۆٹت که کئیسرئے هَکدیوانا پێش کنگ ببیت، گڑا من شئور کرت رومئے شهرا راهی بدئیان.
26 نون منی دستا اِشیئے بارئوا پکّاێن چیزے نێست که په کئیسرا بنبیسان.
پمێشکا، من پولُس په شما سجّهێنان و گێشتر په تئو، او بادشاه اَگْریپاس، پێش کرتگ تان جُست و پُرسا رند، چیزے په نبیسگا در بگێجان.
27 چیا که اے بے سر و بُنێن کارے، من یک بندیگێا دێم بدئیان بله آ بُهتامان که آییئے سرا جنَگ بوتگ‌اَنت، مَنبیسان.»