پولُس، دێم په مَکْدونیَه و یونانا
20
1 اِپِسُسئے شهرئے شۆرشے هلاسیا رَند، پولُسا آ شهرئے مرید لۆٹت و دِلبڈّی داتنت، گڑا چه آیان رُکستی گپت و دێم په مَکْدونیَها راه کپت.
2 چه آ هَند و دَمگان که گوَست، گۆن وتی هبران، باورمندی بازێن دِلبڈّیے داتنت.
رندا آتک و یونانا رَست.
3 اۆدا تان سئے ماها مهتل بوت.
گۆن بۆجیگێا سوریَهئے رئوگا پێسر، یَهودیان په آییا پندلے سازِت، پمێشکا چه مَکْدونیَهئے راها پِر ترّگئے شئوری کرت.
4 آییئے همراه اِش اتنت:
پیرّوسئے چُکّ سوپاتِروس که بیریَهئے مردمے اَت، اَریسْتَرکاس و سِکونْدوس که تِسالونیکیئے مردم اتنت، گایوس که دِرْبِهئے مردمے اَت، تیموتاووس، تیکیکوس و تْروپیموس که آسیائے دَمگئے مردم اتنت.
5 آ چه ما پێش کپتنت و تْرواسئے شهرا شتنت.
همۆدا په مئے آیگا رهچار بوتنت.
6 بێهُمیرێن نانئے اییدا رند، ما چه پیلیپیئے شهرا بۆجیگێا سوار بوتێن و پنچ رۆچا رَند، تْرواسا آیانی کِرّا آتکێن و تان هپت رۆچا همۆدا داشتێن.
وَرنایے زندگَ بیت
7 هپتگئے ائولی رۆچا،* په نانئے چُنڈ چُنڈ کنگا هۆریگا نِشتگ‌اتێن و پولُسا گۆن باورمندان تْران کرت.
دومی سباها آ رئوگی اَت، پمێشکا تان شپنێما هبری کرت.
8 هما بُرزادی بانا که نِشتگ‌اتێن، بازێن چِراگے رۆک اَت.
9 پولُسئے هبرانی وهدا، یوتوکوس نامێن وَرنایے دَریگئے دپا نِشتگ‌اَت.
وابێنگ بوت، کۆچَنڈگا لگّت و واب کپت.
چه لۆگئے سئیمی تَبَکا جهلاد کپت و مرت.
مردمان آییئے جۆن چِست کرت.
10 پولُس اێر آتک، آییئے نێمگا جَهل بوت، گُلاێشی کرت و گوَشتی:
«متُرسێت، ساهی مان اِنت.»
11 گڑا بُرزاد شت، نانی چُنڈ چُنڈ کرت و وارت، رندا گۆن آیان وتی گپّ و تْرانی تان گوَرباما* دێما برت و پدا چه اۆدا در کپت و شت.
12 آ وَرنااِش، زِندگ و دْراه آییئے لۆگا برت و آیان مزنێن تسلّا و دِلبڈّیے رَست.
دێم په میلیتوسئے بندنا
13 ما بۆجیگێا سوار بوت و چه پولُسا پێسر، آسوسئے شهرا شتێن که چه اۆدا آییا گۆن وت بزورێن.
پولُسئے واهگ اِش اَت که تْرواسا بگر تان آسوسا هُشکیا سپر بکنت.
14 وهدے آسوسئے شهرا گۆن آییا دُچار کپتێن، گڑا بۆجیگا سوارِن کرت و میتیلینیئے شهرا آتکێن.
15 چه اۆدا دومی رۆچا کیوسئے جزیرهئے دێما آتک و رَستێن.
سئیمی رۆچا، ساموسئے بندن و چارمی رۆچا میلیتوسئے شهرا آتکێن.
16 پولُسئے شئور اَت، اِپِسُسئے شهرا هچّ مه‌اۆشتیت، تانکه آسیائے دَمگا باز مهتل مبیت.
آییا اِشتاپ اَت که اگن بوتَ کنت پِنْتیکاسْتئے اییدئے* رۆچا اورْشَلیما ببیت.
گۆن اِپِسُسئے کماشان پولُسئے تْران
17 پولُسا چه میلیتوسئے شهرا، په اِپِسُسئے کِلیسائے کماشان کُلئو راه دات و آ وتی کِرّا لۆٹتنت.
18 کماش که آتکنت، گۆن آیان گوَشتی:
«شما وتَ زانێت چه هما ائولی رۆچا که من آسیائے دَمگا پاد اێر کرتگ، چِه پئیما وتی زِند گۆن شما گوازێنتگ.
19 من اَرس رێچان و په بێکِبری و دربێشی هُداوندئے هِزمتکاری کرتگ و یَهودیانی پَندلانی سئوبا بازێن سکّی و سۆری سَگّتگ.
20 وتَ زانێت، شمئے نپ و سوتّا هرچے که منی دستا بئیگی بوتگ من کرتگ و هُدائے کُلئو په شما، مُچّیانی تها و لۆگ په لۆگ آورتگ و سر کرتگ.
21 من یَهودی و یونانی، دوێن پنت و سۆج داتگ‌اَنت که چه وتی رَدێن کاران پشۆمان ببنت، هُدائے راها بگرنت و مئے هُداوندێن ایسّائے سرا باوَر بکننت.
22 انّون گۆن پاکێن روهئے رهشۆنیا اورْشَلیما رئوان.
نزانان اۆدا گۆن من چے بئیگی اِنت.
23 بله اِشیا زانان که پاکێن روه منا هر شهرا پێشگۆیی کنگ و گواهی دئیگا اِنت، کئید و بند و سکّی و سۆری منی ودار و اِنتزارا اَنت.
24 منا په وتی ساه و زِندا پرواه نێست، منی یکّێن واهگ اِش اِنت که وتی دئور و باریگا په سر برسێنان و هُداوندێن ایسّائے داتگێن کارا سرجم بکنان، بزان هُدائے مِهر و رهمتئے مستاگا برسێنان.
25 «نونَ زانان، من که هُدائے بادشاهیئے وشّێن مستاگ په شما آورتگ و رسێنتگ، چه شما هچکَس پدا منا نگندیت.
26 پمێشکا مرۆچی شمارا په راستی و دلجمیَ گوَشان که شمئے هچکسئے هۆن منی گردنا نه‌اِنت.
27 چیا که من په شما هُدائے سجّهێن واهگانی رسێنگا هچبر چَکّ و پَد نبوتگان.
28 شما وتی جند و وتی رمگئے سجّهێن باورمندانی هئیالداریا بکنێت که پاکێن روها شمارا آیانی نِگهپان کرتگ.
هُدائے کِلیسائے شپانکی و نگهپانیا بکنێت، هما کِلیسا که هُداوندێن ایسّایا گۆن وتی هۆنا په بها گپتگ.
29 منَ زانان چه منی رئوگا رَند، دِرّۆکێن گُرک شمئے نیاما کاینت و رمگئے سرا رهمَ نکننت.
30 تنتنا شمئے وتی نیاما هم انچێن مردم پادَ کاینت که راستێن هبران پرُشت و پرۆشَ کننت تانکه مریدان وتی نێمگا بکَشّنت.
31 پمێشکا هُژّار بێت و یات بکنێت که تان سئے سالا، من شپ و رۆچ په شما گرێتگ و شمارا ڈاه* داتگ.
32 «نون شمارا هُدا و آییئے پُرمِهر و رهمتێن هبرانی سپردهَ کنان که آ هبر شمارا مُهر داشتَ کننت تان هۆر گۆن سجّهێن هُدائے پَلگارتگێنان میراس ببرێت.
33 منا چه کَسێا هچّ چیزێئے تَمَه و لالِچ نبوتگ، نه سُهر و تنگئوئے، نه نُگره و زَرّئے و نه گُد و پۆشاکئے.
34 شما وتَ زانێت که من گۆن وتی اے دستان کار کرتگ، وتیگ و وتی همکارانی زلورت و گَرَز وت سرجم کرتگ‌اَنت.
35 من شمارا دروَر و نمونه پێش کرتگ که شما هم منی ڈئولا وتی دستان کار ببندێت و کار بکنێت و وار و بَزّگان کُمک بدئیێت.
شما چه هُداوندێن ایسّائے اے هبران بێتْرانگ مبێت و مشمۆشێت که آییا گوَشت:
‹چه زورگا، دئیگ بَهتاورتر اِنت.›»
36 چه اے هبرانی هلاسیا رَند، پولُس کۆنڈان کپت و گۆن سجّهێنان هۆر دْوایی کرت.
37 سجّهێنان پولُس گُلاێش کرت، چُکِّت و باز گرێتِش.
38 آ گێشتر په اِشیا گَمیگ اتنت که پولُسا گوَشتگ‌اَت:
«شما پدا منا نگندێت.»
گڑا تان بۆجیگا رسێنتِش.