ایسّا پیلاتوسئے دێما
15
1 سَباها پَگّاه،* مزنێن دینی پێشوا، کئومئے کماش، شَریَتئے زانۆگر و سرۆکانی دیوانئے سجّهێن باسک همشئور بوتنت و ایسّااِش بست، گِرّان کرت و پیلاتوسئے دستا دات.
2 پیلاتوسا چه آییا جُست کرت:
«تئو یَهودیانی بادشاه ائے؟» ایسّایا پَسّئو دات:
«تئو وت گوَشگا ائے.»
3 مزنێن دینی پێشوا آییئے سرا بازێن بُهتام جنَگا اتنت.
4 پیلاتوسا پدا جُست کرت:
«په چے پَسّئوَ ندئیئے؟ بچار تئیی سرا چینچُک بِڈّ و بُهتام جنَگا اَنت.»
5 ایسّایا هچ پَسّئو ندات.
پیلاتوس هئیران مَنت.
6 پیلاتوسا، هر سال اییدئے وهدا، چه یَهودی بندیگان یکّے، هما که مردمان بلۆٹتێن، آزاتَ کرت.
7 بندیگانی تها باراباس نامێن مردے هست‌اَت.
گۆن هما آشۆپیان گِرگ بوتگ‌اَت که شۆرشے وهدا هۆن و کۆشِش کرتگ‌اَت.
8 مهلوک، پیلاتوسئے کِرّا آتک، دَزبندی‌اِش کرت و گوَشتِش:
«هر دابا که گوَستگێن سالانِت کرتگ، اِمبری هم هما دابا بکن.»
9 پیلاتوسا جُست کرت:
«لۆٹێت یَهودیانی بادشاها په شما آزات بکنان؟»
10 آییا زانتگ‌اَت که دینی پێشوایان، ایسّا په هَسَدّ و کُنّت آییئے دستا داتگ.
پمێشکا چُش گوَشتی.
11 بله دینی پێشوایان مردم شۆرێنت و آشُپێنتنت* تان چه پیلاتوسا بلۆٹنت ایسّائے جاها، باراباسا آزات بکنت.
12 پیلاتوسا پدا جُست کرت:
«گڑا اے مردا که شما آییا یَهودیانی بادشاهَ گوَشێت، چۆن کنان؟»
13 مردمان کوکّار کرت:
«سَلیبی کَشّ!»
14 پیلاتوسا جُست کرت:
«چیا بارێن؟ مئیاری چی اِنت؟» بله آیان گێشتر کوکّار کرت:
«سَلیبی کَشّ!»
15 گڑا پیلاتوسا که لۆٹت مردمان چه وت رزا بکنت، باراباس آزات کرت و ایسّا، شلّاک جناێنت و داتی که آییا سَلیبئے سرا بدرنجنت.
ایسّائے سرا کلاگ و ریشکند
16 سپاهیگان، ایسّا والیئے کۆٹ و ماڑیئے پێشجاها برت و سپاهیگانی سجّهێن لشکر لۆٹت و مُچّ کرت.
17 آیان، بادشاهی جَمورنگێن کَباهے ایسّائے گوَرا دات، چه ڈَنگر و کُنٹگان تاجے جۆڑێنت و آییئے سرا اێر کرت.
18 گۆن کلاگ و ریشکندے، شرپ و اِزّت دات و گوَشتِش:
«دْرود و دْرَهبات،* و یَهودیانی بادشاه!»
19 لَٹِّش سرا جت، دێما تُه کرت و سُجده‌اِش کرت.
20 وهدے کلاگ و مَلنڈِش هلّێنت، گوَرئے جَمورنگێن کَباهِش کَشّت و آییئے جندئے گُدِش پدا گوَرا داتنت.
رندا، دێم په سَلیب کَشّگا برتِش.
ایسّا و سَلیب
21 هما وهدا، کِرینیئے شهرئے* شَمون نامێن مردے، که اِسْکَنْدَر و روپُسئے پت اَت، چه کِشاران دێم په شهرا آیگا دیستِش.
سپاهیگان په بیگار گپت که ایسّائے سَلیبا بَڈّا بکنت.
22 آیان، ایسّا هما جاگها آورت که نامی «جُلْجُتا» بزان «کامپۆل» اِنت.
23 گڑا، شرابِش مُرّ مان کرت و په ورگا دات، بله ایسّایا نئوارت.
24 نون سَلیبئے سرا دْرتکِش، پُچّ و پۆشاکِش وت‌مان‌وتا بهر کرتنت و پال جتِش که بارێن کئیا چے رسیت.
25 سُهبئے وهد اَت* که ایسّااِش سَلیب کَشّت.
26 مئیارنامگئے سرا په آییئے جُرم و مئیارا چُش نبشتگ‌اَت:
«یَهودیانی بادشاه.»
27 ایسّائے همراهیا دو یاگی و دُزِّش هم سَلیبئے سرا دْرتک، یکّے راستێن و دومی چَپّێن نێمگا.
28 اے ڈئولا، پاکێن کتابئے هما پێشگۆیی سرجم بوت که گوَشیت:
آ چه رَدکاران زانگ بوت.*
29 رهگوَزان دژمان دئیان، وتی سر چَنڈێنت و گوَشتِش:
«او مزنێن پرستشگاهئے کرۆجۆک که گوَشتگِت:
‹سئے رۆچا پدا آییا اڈَّ کنان›!
30 نون وتا برَکّێن و چه سَلیبا اێر آ!»
31 همے پئیما مزنێن دینی پێشوا و شَریَتئے زانۆگر ریشکند و مَسکرا کنگا اتنت و گوَشتِش:
«آ دگه مردمی رَکّێنتنت بله وتا رَکّێنتَ نکنت.
32 بِلّ که مَسیه، اِسراییلئے بادشاه، نون چه سَلیبا اێر بکپیت تانکه ما بگندێن و باور بکنێن.»
آ دوێن هم که گۆن آییا دار کَشّگ بوتگ‌اتنت، ایسّایا بَد و رَد گوَشگا اتنت.
ایسّائے مَرک
33 نێمرۆچا بگر تان بێگاهئے سئیا،* سجّهێن مُلک اَناگت تهار بوت.
34 بێگاهئے ساهت سئیا،* ایسّایا چیهال* جت:
«اِلویی، اِلویی، لِما سَبَکْتَنی؟» (بزان:
او منی هُدا، او منی هُدا!
تئو چیا منا تهنا اِشت؟)*
35 اۆدا نزّیکا، لهتێن اۆشتاتگێن مردما وهدے اِشکت، گوَشتِش:
«بچارێت، اِلیاسا تئوار کنگا اِنت.»
36 چه آیان یکّے تچانا شت، اِسْپنجے زرت و تْرُپشێن شرابا میسّێنتی.
اِسْپنج، دارێئے سرا بست و په چوسّگا ایسّائے نێمگا شهارت و گوَشتی:
«سَبر و ودار کنێت، بچارێن بارێن اِلیاس آییئے رَکّێنگا کئیت یا نه؟»
37 گڑا، ایسّایا بُرزێن تئوارێا چیهال کَشّت و ساه دات.
38 همے وهدا، مزنێن پرستشگاهئے پرده، بُرزادا بگر تان جهلاد دِرت و دو بهر بوت.
39 هما پئوجی اَپسر که ایسّائے دێم په دێما اۆشتاتگ‌اَت، وهدے دیستی که آییا چۆنکا ساه دات، گڑا گوَشتی:
«بێشکّ اے مرد هُدائے چُکّ اَت.»
40 لهتێن جنێن دور اۆشتاتگ و چارگا اَت، گۆن آیان، مَریم مَجْدَلیَه، کسانێن آکوب و یوشائے مات مَریم و سالومه گۆن اتنت.
41 وهدے ایسّا جَلیلا اَت، اے جنێن آییئے همراه اتنت و آییئے هِزمت و چلۆپگِش کرتگ‌اَت.
اَبێد چه اِشان، دگه بازێن جنێنے هم اۆدا اَت که آییئے همراهیا اورْشَلیما آتکگ‌اتنت.
ایسّائے کَبر و کپُن
42 آ رۆچ، جُمَهئے رۆچ اَت و مردم، په شَبَّتئے رۆچئے آرام کنگا، وتا تئیار کنگا اتنت.
43 ایسُّپ نامێن مردے که اَریماتیائے شهرئے نندۆک اَت، سرۆکانی دیوانئے اِزَّتمندێن باسکے اَت و وت هم هُدائے بادشاهیئے رَهچار و وداریگ اَت.
جُمَهئے بێگاها پیلاتوسئے کِرّا شت و گۆن بهادُرّی و دِلێری، ایسّائے جۆنئے برگئے اِجازتی لۆٹت.
44 وهدے پیلاتوس سَهیگ بوت ایسّا چۆ زوت مرتگ، هئیران و هَبَکَّه مَنت و پئوجیانی مستری لۆٹت تان بزانت که ایسّا مرتگ یا نه؟
45 پئوجیانی مسترئے سجّهێن هال و هبرانی اِشکنگا رَند، ایسّائے جۆنئے برگئے اِجازتی دات.
46 ایسُّپا، گُدے بها گپت و آورت، آییئے جۆن چه سَلیبا اێر گێتک و هما گُدئے تها کپُن کرت.
کَبرێئے تها که چه پێسرا چه تلارا تْراشگ و تئیار کنگ بوتگ‌اَت، ایسّایی کَبر کرت و مزنێن ڈۆکے لێٹ دئیانا کَبرئے دپا اێر کرت.
47 مَریم مَجْدَلیَه و یوشائے مات مَریم، هر دوێنان دیست که آاِش کجا کَلّ کرت.