12
Gusunɔ bɛsɛn Bɑɑbɑ
1 Bɛsɛ mɑɑ, seedɑ dio dɑbi teniwɑ tɑ sun sikerenɛ. Ǹ n mɛn nɑ, i de su ye fɛ̃rɑ su kɔ̃ ye yɑ sun bɑɑsi bɛsɛn sɑnum sɔɔ kɑ durum ye yɑ rɑ sun fuuku mɑni sim sim, kpɑ su tɛmɑnɑ gɑrɑsɑn dukɑ sɔɔ ye yɑ sun mɑrɑ. 2 Su nɔni wukiɑ sɑ n Yesu mɛɛrɑ. Win min diyɑ bɛsɛn nɑɑnɛ dokebu wee, wiyɑ mɑɑ bu yibiɑmɔ. U wurɑ bɑ nùn go dɑ̃ɑ bunɑnɑru sɔɔ, u ǹ gɔɔ win bweserun sekuru mɛɛrɑ domi u nuku dobu yĩiyɔ bu nùn yiiye. Tɛ̃ u sɔ̃ Gusunɔn sinɑ kitɑrun nɔm geuɔ.
3 I win gɑri bwisikuo nge mɛ u tɛmɑnɑ kɑ yibɛrɛ tɛɛ te durumgibɑ kɑ nùn nɛnuɑ, kpɑ i ku mwiɑ kpɑnɑ i dɑm biɑ. 4 Domi bɛɛ kɑ durum gɑbirinɑɑ sɔɔ, i ǹ ginɑ gɑbirinɛ sere n kɑ ko gɔɔ. 5 I dɑm kɛ̃ɛ gɑri duɑri yi Gusunɔ u bɛɛ sɔ̃ɔmɔ nge win bibu? U nɛɛ,
<<Nɛn bii, ɑ ku Yinni Gusunɔn sɛɛyɑsiɑbu ɑtɑfiiru ko.
A ku mɑɑ nuki sɑnkirɑ ù n nun gerusimɔ.
6 Domi wi Yinni u kĩ wiyɑ u rɑ sɛɛyɑsie,
kpɑ u tɔnu bɑɑwure sɛnɑ so wi u gɑrisi win bii.>>
7 I kɑ bɛɛn nɔni swɑ̃ɑru tɛmɑnɔ, Gusunɔ u bɛɛ kuɑmmɛwɑ nge win bibu. Bii wɑrɑ wɑ̃ɑ wi win bɑɑbɑ ku rɑ sɛɛyɑsie. 8 Bɑ̀ kun bɛɛ sɛɛyɑsie, nge bii be bɑ tie, ǹ n mɛn nɑ, i ǹ sɑ̃ɑ bɑɑn bibu, bɛɛ bii seegebɑrɑ. 9 Su bɛsɛn tundobu yɑɑyɑ. Bɑ sun sɛɛyɑsiɑ sɑ mɑɑ bu bɛɛrɛ wɛ̃. Ǹ n mɛn nɑ, sɑ ǹ ko bɛsɛn Bɑɑbɑ wɔrukoo wiru kpĩiyɑ kpɑ sɑ n wɑ̃ɑru mɔ? 10 Bɛsɛn tundo be, bɑ sun sɛɛyɑsiɑ sɑɑ fiiko sɔɔ nge mɛ n bu wɛ̃re. Adɑmɑ Gusunɔ u rɑ sun sɛɛyɑsie bɛsɛn ɑrufɑɑnin sɔ̃ kpɑ sɑ n kɑ dɛɛre nge wi. 11 Bɑ̀ n sun sɛɛyɑsiɑmɔ n dɑ n ginɑ sɑ̃ɑwɑ nuku sɑnkirɑnu, n ǹ mɔ nuku dobu. Adɑmɑ ɑmɛn biru be bɑ swɑɑ geɑ giɑ sɛɛyɑsiɑ bi sɔɔ, bɑ rɑ bin ɑrufɑɑni di ye yɑ sɑ̃ɑ bɔri yɛndu kɑ dɑɑ geɑ.
Bwisi kɛ̃ru kɑ kirɔ
12 Bɛɛ be i wɑsire i nɔmɑ sɑ̃ɑre, i tii tɑ̃sisio i nɔmɑ suɑ kpɑ i de bɛɛn dũɑ yɑ n dɑm mɔ. 13 I n sĩimɔ swɛɛ yi yi wɑ̃ sɔɔ, kpɑ nɑɑ si su ǹ bwɑ̃ɑ do, su kɑ bɛkurɑ kpɑ su ku kɑ kirirɑ.
14 I hɑniɑ koowo i n kɑ nɔɔ tiɑ sɑ̃ɑ kɑ tɔmbu kpuro kpɑ i n wɑ̃ɑru dimɔ te tɑ dɛɛre, domi goo sɑri wi u koo Yinni wɑ, win wɑ̃ɑru tɑ̀ kun dɛɛre. 15 I n tii sɛ kpɑ bɛɛn goo u ku rɑɑ Gusunɔn durom biɑ. I n tii sɛ kpɑ mɔru ye i yi gɔ̃ruɔ yu ku rɑɑ se nge kpii pɔturɑ yu wɑhɑlɑ doke, kpɑ yen dɛ̃ɛ yi tɔn dɑbinu bɑbɑ. 16 I n tii sɛ kpɑ goo u ku kɑ goo kɔ̃ɔ mɛnnɑ tɑntɑnɑru sɔɔ, kpɑ goo u ku mɑɑ yinɑ u gɑ̃ɑ dɛɛrɑnu bɛɛrɛ wɛ̃, nge Esɑu wi u bii yerumɑrun tubi dɔrɑ dĩɑ gbɛ̃ɛ teerun sɔ̃. 17 Amɛn biru bɛɛn tii i yɛ̃ mɑ u kĩɑ win bɑɑbɑ u nùn domɑru kuɑ ɑdɑmɑ u nùn yinɑri domi u ǹ swɑɑ wɑ u kɑ kɔsi ye u kuɑ bɑɑ mɛ u kɑsu kɑ swĩi.
18 Bɛɛ, i ǹ susimɛ guurɔ te bɑ koo kpĩ bu bɑbɑ, nge mɛ Isirelibɑ bɑ guu te bɑ mɔ̀ Sinɑi susi. Guu te, tɑ dɔ̃ɔ boko mɔ, kɑ yɑm wɔ̃kuru kɑ yɑm tĩreru kɑ woo gunɑ, 19 kɑ kɔbɑn wurenu kɑ nɔɔgiru. Ye Isirelibɑ bɑ nɔɔgii te nuɑ bɑ suuru kɑnɑ nɔɔ ge, gu ku mɑɑ kɑ bu gɑri gɛɛ ko. 20 Domi bɑ ǹ yiire bin dɑm mɔ bi bu nɛɛ, <<Hunde koni bɑɑyere ye yɑ guu te bɑbɑ bɑɑ ǹ n gbeeku yɑɑn nɑ, bɑ koo ye kpenu kɑsukuwɑ bu go.>> 21 Ye bɑ wɑ mi, yɑ bɛrum mɔ sere Mɔwisi u geruɑ u nɛɛ, <<Bɛrum mɑn mɔ̀ sere nɑ diirumɔ.>>
22 Adɑmɑ bɛɛ, Siɔnin guurɑ i susi kɑ Gusunɔ Yinni wɑson wuu ge gɑ sɑ̃ɑ Yerusɑlɛmu wɔrukɑɑ, kɑ gen gɔrɑdo dɑbi dɑbiru te tɑ ǹ gɑrirɔ te tɑ mɛnnɛ kɑ nuku dobu. 23 Gusunɔwɑ i susi wi u sɑ̃ɑ tɔmbu kpuron siri kowo, kɑ win bii yerumɑbɑn mɛnnɔ bèn yĩsɑ yoruɑ wɔllɔ, kɑ mɑɑ tɔn geebun hundebɑ be Gusunɔ u dɛɛrɑsiɑ mɑm mɑm. 24 Yesuwɑ i susi wi u sɑ̃ɑ nɔɔ mwɛɛ kpɑɑ ten swɑɑ sɔmɔ, kɑ win yɛm mɛ mu yɛ̃kɑrɑ, mɛ mu gɑri mɔ̀ yi yi Abɛlin yɛmgii nɔɔbu dobu kere.
25 Ǹ n mɛn nɑ, i n tii sɛ kpɑ i ku yɛ̃ron nɔɔ yinɑ wi u kɑ bɛɛ gɑri mɔ̀. Be bɑ yinɑ bu win gɑri swɑɑ dɑki wi u bu kirɔ mɔ̀ hɑnduniɑ sɔɔ, bɑ ǹ sɛɛyɑsiɑbu kisirɑri. Kɑɑ sere gere bɛsɛ? Sɑ ǹ kisirɑmɔ sɑ̀ n nùn biru kisi wi u kɑ sun gɑri mɔ̀ wɔllun di. 26 Win nɔɔ gɑ tem yĩirɑ sɑnɑm mɛ, ɑdɑmɑ tɛ̃ u sun nɔɔ mwɛɛ teni kuɑ u nɛɛ, <<Kon kpɑm wure n tem yĩire nɔn teeru, ɑdɑmɑ n ǹ mɑɑ mɔ mɛ tɔnɑ, kɑ wɔllɑ.>> 27 Ye u nɛɛ, <<Kon kpɑm ko nɔn teeru,>> yɑ sɔ̃ɔsimɔ mɑ tɑkɑ koorɑ koo yĩirurɑ yu doonɑ kpɑ ye yɑ kun yĩirurɔ yɑ n kɑ wɑ̃ɑ.