13
Nge mɛ bɛsɛn kookoosu
koo kɑ Gusunɔ wɛ̃re
1 I n dɑ n bɛɛn nɑɑnɛ dokeosibu kĩ. 2 I yɑɑyo mɑ n weenɛ i sɔbu yɑɑrɛ ko, domi be bɑ kuɑ mɛ, ben gɑbɑ wɔllun gɔrɑdobɑ yɑɑrɛ kuɑ bɑ ǹ kɑ bɑɑru. 3 I pirisɔmbɑ yɑɑyo nge mɛ i ko ko ì n kɑ bu wɑ̃ɑ sɑnnu. I be bɑ nɔni sɔ̃ɔmɔ yɑɑyo domi bɛɛn tii, wɑsiyɑ i mɑɑ mɔ.
4 I de bɑɑwure u n durɔ kɑ kurɔn suɑnɑɑn bɛɛrɛ yɛ̃ kpɑ durɔ kɑ kurɔ sɔɔ torɑrɑ kun wɑ̃ɑ. Domi Gusunɔ u koo bu siri be bɑ kɔ̃ɔ mɛnnɑmɔ tɑntɑnɑru sɔɔ kɑ be bɑ sɑkɑrɑru mɔ̀.
5 I ku de gobin kĩru tɑ n bɛɛ nɛni. I de ye i mɔ yu kɑ bɛɛ nɛrenɑ domi Gusunɔ u nɛɛ, <<Nɑ ǹ nun derimɔ pɑi, mɛyɑ nɑ ǹ mɑɑ nun biru kisimɔ kɑ bɑɑdommɑɔ.>> 6 Yen sɔ̃nɑ sɑ ko kpĩ su tororu so su nɛɛ,
<<Yinni Gusunɔwɑ sɑ̃ɑ wi u koo mɑn somi.
Nɑ ǹ gɑ̃ɑnu gɑnun bɛrum mɔ.
Mbɑ tɔnu koo kpĩ u mɑn kuɑ.>>
7 I bɛɛn gɑsɔn swɑɑ gbiobu yɑɑyo be bɑ bɛɛ Gusunɔn gɑri nɔɔsiɑ. I bwisikuo nge mɛ bɑ ben wɑ̃ɑru diisinɑ mɑ bɑ gu, kpɑ i ben nɑɑnɛ dokebu sɑɑri. 8 Yesu Kirisi turo wiyɑ mi, gĩɑ kɑ gisɔ kɑ bɑɑdommɑɔ. 9 I ku de bu bɛɛ torɑsiɑ kɑ sɔ̃ɔsi tuku dɑbinu. Domi Gusunɔn duromɑ mu weenɛ mu n bɛɛn gɔ̃rusu tɑ̃sisiɑmɔ, n ǹ mɔ dĩɑnun sesenu. Be bɑ yɑbu ye kpuro swĩi bɑ ǹ yen ɑrufɑɑni gɑɑ wɑɑre.
10 Sɑ yɑ̃ku yeru mɔ tèn yɑ̃kunu Yuubɑn yɑ̃ku kowo be bɑ rɑ rɑɑ sɔmburu ko dii dɛɛrɑrɔ bɑ ǹ kpɛ̃ bu di. 11 Domi bɑ rɑ yɑɑ sɑbe nin gonu dɔ̃ɔ mɛniwɑ wuun biruɔ sɑnɑm mɛ yɑ̃ku kowo tɔnwero u kɑ nin yɛm duɑ dii te tɑ dɛɛre gem gem sɔɔ u kɑ mu Gusunɔ tusiɑ tɔmbun durum sɔ̃. 12 Yen sɔ̃nɑ Yesun tii mɑɑ nɔni sɔ̃ɔrɑ wuun biruɔ u kɑ wɑ u tɔmbu dɛɛrɑsiɑ kɑ win tii tiin yɛm. 13 Ǹ n mɛn nɑ, su dɑ win mi wuun biruɔ kpɑ bɑ n sun gɛmɑ nge wi. 14 Domi sɑ ǹ wuu gɑgu mɔ tem mɛ sɔɔ, ge gɑ ko n wɑ̃ɑ kɑ bɑɑdommɑɔ. Wuu ge gɑ wee geyɑ sɑ kɑsu. 15 Ǹ n mɛn nɑ, sɑ n Gusunɔ siɑrɑmɔ sɑɑ Yesun min di kpeetim sɑri nge yɑ̃ku kobu, yerɑ sɑ n dɑ win yĩsiru siɑre kɑ bɛsɛn nɔɔ. 16 I ku geɑn kobu duɑri, kpɑ i n sominɑmɔ kɑ ye i mɔ. Yɑ sɑ̃ɑwɑ nge yɑ̃ku ni nu rɑ Gusunɔ wɛ̃re.
17 I bɛɛn swɑɑ gbiobu mɛm nɔɔwɔ kpɑ i bu wiru kpĩiyɑ. Domi bɛɛn hunden gɑriyɑ bɑ rɑ n kɑ wɑsire yèn sɔ̃ Gusunɔ u koo bu yen gɑri bikiɑ. I de bu kpĩ bu wisi kɑ nuku dobu, n kun kɑ nuku sɑnkirɑnu. Bɑ̀ n wisɑ kɑ nuku sɑnkirɑnu, yɑ ǹ bɛɛ ɑrufɑɑni gɑɑ kuɑmmɛ.
18 I n dɑ sun kɑnɑru kue. Sɑ yɛ̃ kɑm kɑm mɑ bɛsɛn gɔ̃ru gɑ dɛɛre domi sɑ kĩwɑ sɑ n tii kpɑre dee dee gɑ̃ɑnu kpuro sɔɔ. 19 Ye nɑ bɛɛ bikiɑmɔ gem gem, yerɑ i kɑnɑru ko kpɑ Gusunɔ u de n wurɑmɑ bɛɛn mi fuuku.
Kɑnɑru
20 Gusunɔ wi u ɑlɑfiɑ wɛ̃ɛmɔ u bɛsɛn Yinni Yesu seeyɑ gɔrin di, mɑ Yesu wi, u kuɑ bɛsɛn yɑ̃ɑ kpɑro boko win yɛm sɔ̃ mɛ mu nɔɔ mwɛɛ te tɑ ku rɑ kpen gɑri sire. 21 Gusunɔ turo wi, u bɛɛ dɑm kɛ̃ i kɑ dɑɑ geɑ ko kpɑ i kɑ win kĩru ko, kpɑ u mɑɑ sɔmburu ko bɛɛ sɔɔ te tɑ koo nùn wɛ̃re sɑɑ Yesu Kirisin min di wi sɑ ko n bɛɛrɛ wɛ̃ɛmɔ sere kɑ bɑɑdommɑɔ. Ami.
Gɑrin wii goberu kɑ tɔbiribu
22 Nɛgibu, nɑ bɛɛ kɑnɑmɔ i de i dɑm kɛ̃ɛ gɑri yi swɑɑ dɑki kɑ tɛmɑnɑbu, domi ye nɑ bɛɛ yoruɑ tire teni sɔɔ yɑ ǹ dɛ̃u. 23 Nɑ kĩ i n yɛ̃ mɑ bɑ bɛsɛgii Timɔte kɑrɑ pirisɔm di. Ù n tunumɑ yellu, sɑ ko nɑ bɛɛn mi sɑnnu.
24 I bɛɛn swɑɑ gbiobu kpuro tɔbirio kɑ mɑɑ nɑɑnɛ dokeobu kpuro. Itɑlin nɑɑnɛ dokeobu bɑ mɑɑ bɛɛ tɔburɑ.
25 Gusunɔn durom mu n kɑ bɛɛ kpuro wɑ̃ɑ._