11
Nɑɑnɛ dokebu
1 Wi u nɑɑnɛ doke u yɛ̃ kɑm kɑm mɑ ye u yĩiyɔ u koo ye wɑ. U mɑɑ yɛ̃ mɑ ye yɑ ǹ wɑɑrɔ kɑ nɔni yɑ wɑ̃ɑwɑ kɑ gem. 2 Nɑɑnɛ doke bin bweserɑ yeruku tɔmbɑ mɔ. Yen sɔ̃nɑ bɑ bu seedɑ geɑ diiyɑ.
3 Kɑ nɑɑnɛ dokebɑ sɑ tubɑ mɑ Gusunɔn gɑriyɑ hɑnduniɑ yɑ kɑ tɑkɑ koorɑ. Nge mɛyɑ bɑ ye sɑ wɑɑmɔ kuɑ ye sɑ kun wɑɑmɔn di.
4 Kɑ nɑɑnɛ dokebɑ Abɛli u Gusunɔ yɑ̃kuru kuɑ te tɑ Kɑɛnigiru bɛɛrɛ kere. Win nɑɑnɛ dokebun sɑɑbuwɑ bɑ nùn sokɑ gemgii domi Gusunɔn tii u win kɛ̃nu mwɑ. Kɑ nɑɑnɛ dokebɑ Abɛli u mɑɑ gɑri mɔ̀ kɑ tɛ̃ bɑɑ mɛ u gu.
5 Nɑɑnɛ dokebun sɔ̃nɑ bɑ Enɔku suɑ Gusunɔn mi u ǹ gu. Goo sɑri wi u mɑɑ kɑ nùn nɔni wɑɑre, domi Gusunɔ u nùn suɑ u kɑ dɑ win mi. Gusunɔn gɑri mɑɑ gerumɔ, bu sere nùn suɑ win kookoosu Gusunɔ wɛ̃re. 6 N deemɑ goo sɑri wìn kookoosu koo Gusunɔ wɛ̃re n kun kɑ nɑɑnɛ dokebu. Geemɑ, wi u Gusunɔ susimɔ u nɑɑnɛ sɑ̃ɑ mɑ Gusunɔ u wɑ̃ɑ mɑ u rɑ be bɑ nùn kɑsu durom kue.
7 Kɑ nɑɑnɛ dokebɑ Nɔwɛ u Gusunɔn gɑri swɑɑ dɑki sɑnɑm mɛ u nùn kirɔ kuɑ ye yɑ sisin sɔ̃ ye u ǹ ginɑ wɑ. U Gusunɔ nɑsiɑ u nùn mɛm nɔɔwɑ mɑ u goo nimkuu dɑ̃kɑ gè sɔɔ wi kɑ win yɛnugibu bɑ fɑɑbɑ wɑ. Nge mɛyɑ u hɑnduniɑgibu tɑɑrɛ wɛ̃ mɑ u gem wɑ Gusunɔn nɔni sɔɔ nɑɑnɛ dokebun sɑɑbu.
8 Kɑ nɑɑnɛ dokebɑ Aburɑhɑmu u Gusunɔn sokuru wurɑ mɑ u swɑɑ wɔri u dɔɔ tem gɑm giɑ mɛ Gusunɔ u koo nùn wɛ̃ nge tubi mɑ u dɔɔ mi u ǹ yɛ̃. 9 Kɑ nɑɑnɛ dokebɑ u sinɑ nge sɔɔ tem mɛ sɔɔ, mɛ Gusunɔ u nùn nɔɔ mwɛɛru kuɑ. U wɑ̃ɑ kuu bekuruginu sɔɔ wi kɑ Isɑki kɑ Yɑkɔbu. Ben tii, nɔɔ mwɛɛ tee terɑ Gusunɔ u mɑɑ bu kuɑ. 10 Domi Aburɑhɑmu u wuu bɔkɔ mɑrɑ ge gɑ kpɛɛkpɛɛku dɑmguu mɔ. Gusunɔwɑ u wuu gen kpunɑɑ kuɑ mɑ u gu bɑnɑ.
11 Nɑɑnɛ dokebun sɑɑbuwɑ Sɑɑrɑɑn tii mɑɑ dɑm wɑ u kɑ gurɑ suɑ bɑɑ mɛ u yen sɑɑ doonɑ. U yɛ̃ mɑ Gusunɔ wi u nɔɔ mwɛɛru kuɑ u sɑ̃ɑ nɑɑnɛgii. 12 Nge mɛyɑ, sɑɑ tɔn durɔ turon min di, wi u gɔɔ turɑ, tɔmbɑ mɑrurɑ bɑ dɑbiɑ nge wɔllun kperi kɑ nim wɔ̃kun yɑni sɛɛri yi goo kun kpɛ̃ u gɑri.
13 Nɑɑnɛ dokebu sɔɔrɑ tɔn be kpuro bɑ gu. Bɑ ǹ gɑ̃ɑ gee ni wɑ bɑ mwɛ nìn nɔɔ mwɛɛru Gusunɔ u kuɑ, ɑdɑmɑ bɑ nu wɑwɑ sɑrun di bɑ dɑm koosiɑ mɑ bɑ wurɑ mɑ bɑ sɑ̃ɑ sɔbu kɑ tem yɑrobu hɑnduniɑ sɔɔ. 14 Be bɑ gerumɔ mɛ, bɑ sɔ̃ɔsimɔ kpɑsɑsɑ mɑ bɑ tem kɑsu. 15 Tem mɛ bɑ derin bɛkɛ yɑ̀ n dɑɑ bu mɔ̀, bɑ koo rɑɑ ɑyeru wɑ bu kɑ gɔsirɑ mi. 16 Adɑmɑ tɛ̃ bɑ tem kɑsu mɛ mu burɑm bo, tem mɛyɑ tem wɔllugim. Yen sɔ̃nɑ sekurɑ kun Gusunɔ mɔ̀ bu kɑ nùn soku ben Yinni domi u bu wuu gɑgu sɔɔru kuɑ.
17 Nɑɑnɛ dokebun sɔ̃nɑ Aburɑhɑmu u kɑ Isɑki yɑ̃kuru kuɑ ye Gusunɔ u win lɑɑkɑri mɛɛrimɔ. Aburɑhɑmu wiyɑ Gusunɔ u nɔɔ mwɛɛru kuɑ. Kɑ mɛ, u sɔɔru kpɑ u kɑ win bii teereru yɑ̃kuru ko. 18 Gusunɔ u rɑɑ nùn sɔ̃ɔwɑ u nɛɛ, <<Isɑkin min diyɑ wunɛn bweserɑ koo yɑri.>> 19 U bwisikɑ mɑ Gusunɔ u dɑm mɔ u kɑ tɔnu seesiɑ gɔrin di mɑm, mɑ kɑ gem u Isɑki wɑ nge u wurɑmɑ gɔrin di.
20 Kɑ nɑɑnɛ dokebɑ, Isɑki u Yɑkɔbu kɑ Esɑu domɑru kuɑ, mɑ u bu sɔ̃ɔwɑ ye yɑ koo koorɑ.
21 Kɑ nɑɑnɛ dokebɑ Yɑkɔbu u Yosɛfun bibu domɑru kuɑ tiɑ tiɑ ye u gɔɔ turuku kuɑ, mɑ u dɛkɑ tɑ̃sɑ u kɑ Gusunɔ sɑ̃wɑ.
22 Ye Yosɛfu u gɔɔ turuku kuɑ, kɑ nɑɑnɛ dokebɑ u Isirelibɑ sɔ̃ɔwɑ mɑ sɑɑ yɑ sisi yè sɔɔ bɑ koo yɑri Egibitin di, mɑ u bu sɔ̃ɔwɑ nge mɛ bɑ koo win kukunu koosinɑ.
23 Sɑnɑm mɛ bɑ Mɔwisi mɑrɑ, kɑ nɑɑnɛ dokebɑ win mɔwɔbɑ nùn beruɑ suru itɑ, domi bɑ wɑ mɑ u sɑ̃ɑ bii durɔ burɔ, bɑ ǹ mɑɑ bɛrum kue bu kɑ sunɔn woodɑ sɑrɑ.
24 Kɑ nɑɑnɛ dokebɑ, ye Mɔwisi kpɛ̃ɑ u yinɑ bu nùn soku Egibitin sunɔn bii tɔn kurɔn bii. 25 U kĩɑ bu nùn nɔni sɔ̃ kɑ Gusunɔn tɔmbu sɑnnu kɑ sere ye u koo yɛ̃ɛri durum sɔɔ sɑɑ fiiko. 26 U bwisikɑ u wɑ n sɑnɔ bu nùn gɛm nge wi Gusunɔ u gɔsɑ n kere u Egibitin dukiɑ wɑ, domi siɑn ɑreyɑ u mɛɛrɑ.
27 Kɑ nɑɑnɛ dokebɑ Mɔwisi u yɑrɑ Egibitin di, u ǹ sunɔn mɔrun bɛrum kue. U yɔ̃rɑ dim dim nge wi u Gusunɔ wɑɑmɔ bɑɑ mɛ u ǹ wɑɑrɔ. 28 Kɑ nɑɑnɛ dokebɑ u kɑ Gɔɔ sɑrɑribun tɔ̃ɔ bɑkɑru toruɑ mɑ u derɑ bɑ yɛm yɛ̃kɑ dii kɔnnɔsɔ kpɑ wi u bii yerumɑbɑ goomɔ u ku Isirelibɑgibu bɑbɑ.
29 Kɑ nɑɑnɛ dokebɑ Isirelibɑ bɑ nim wɔ̃ku ge bɑ mɔ̀ Nɑɑ yɑri tɔburɑ nge tem dirɑ. Adɑmɑ sɑnɑm mɛ Egibitigibɑ kĩɑ bu ko nge mɛ, bɑ nim diirɑ.
30 Nɑɑnɛ dokebun sɔ̃nɑ Yerikon gbɑ̃rɑrɑ kɑ wɔrumɑ ye Isirelibɑ bɑ wuu ge sikerenɑ sɔ̃ɔ nɔɔbɑ yiru. 31 Nɑɑnɛ dokebun sɑɑbuwɑ Rɑhɑbu kurɔ tɑnɔ wi, u ǹ gu kɑ be bɑ ǹ Gusunɔ mɛm nɔɔwɛ sɑnnu yèn sɔ̃ u Isirelibɑn gɔrobu dɑm koosiɑ kɑ nuku tiɑ.
32 Mbɑ kon mɑɑ gere. Ayerɑ kun mɑn turi n kɑ Gedeonin gɑri gere kɑ Bɑrɑkigii, kɑ Sɑnsom kɑ Yɛfite kɑ Dɑfidi kɑ Sɑmuɛli kɑ sere Gusunɔn sɔmɔbu. 33 Nɑɑnɛ dokebun sɔ̃nɑ bɑ sinɑmbu tɑbu di, bɑ kuɑ ye yɑ wɑ̃, bɑ wɑ bɑ mwɑ ye Gusunɔ u bu nɔɔ mwɛɛru kuɑ. Bɑ gbee sinɑnsun nɔsu kɔruɑ, 34 bɑ dɔ̃ɔ boko go, bɑ tɑkobin gɔɔ kisirɑri. Bɑ ǹ dɑɑ dɑm mɔ ɑdɑmɑ bɑ kuɑ dɑmgibu. Bɑ bu nɑsiɑ tɑbu sɔɔ, bɑ tɔn tukobu tɑbu di. 35 Tɔn kurɔbu gɑbu bɑ ben tɔmbu wɑ bɑ wurɑmɑ gɔrin di.
Bɑ gɑbu tɔ̃yɑ kuɑ bɑ kɑ go. Bɑ yinɑ bu bu fɑɑbɑ ko bu kɑ wɑ bu se bu du wɑ̃ɑru sɔɔ te tɑ burɑm bo. 36 Bɑ mɑɑ kpɑm gɑbu yɑɑkoru kuɑ, bɑ bu sɛni so. Bɑ gɑbu bɔkuɑ kɑ yɔni bɑ doke pirisɔm sɔɔ. 37 Bɑ gɑbu kpenu kɑsukɑ bɑ go, bɑ gɑbu bɔtirɑ kpirinu yiru, bɑ gɑbu go kɑ tɑkobi. Bɑ yɑ̃ɑ gɔni kɑ boo gɔni deewɑ bɑ kɑ bɔsi. Bɑ sɑ̃ɑ sɑ̃ɑrobu, bɑ nɔni sɔ̃ɔrɑ, bɑ tɔ̃yɑ wɑ. 38 Ben gem sɔ̃, hɑnduniɑ kun weenɛ yɑ n sɑ̃ɑ ben wɑ̃ɑ yeru. Bɑ yɑɑyɑɑre kuɑ gbɑbunɔ kɑ guunu wɔllɔ kɑ kpee bɑɑbɑ sɔɔ kɑ wɔrusɔ.