10
1 Yuubɑn woodɑ yɑ ǹ gɑ̃ɑ gee ni nu wɑ̃ɑ tɛ̃n gɑri tubusie sɑ̃ɑ sɑ̃ɑ, yɑ sɑ̃ɑwɑ nin yɑɑyɑɑsu. Yen sɔ̃nɑ yɑ ǹ kpɛ̃ yu kɑ yɑ̃ku tee ni bɑ rɑ ko wɔ̃ɔ kɑ wɔ̃ɔ tɔmbu dɛɛrɑsiɑ mɑm mɑm be bɑ Gusunɔ susimɔ kɑ ni. 2 Tɔn be bɑ Gusunɔ sɑ̃ɑmɔ nge mɛn bweseru, bɑ̀ n dɑɑ dɛɛrɑ mɑm mɑm ben torɑnun di, ben gɔ̃ru gɑ ǹ koo rɑɑ mɑɑ bu tɑɑrɛ wɛ̃, yɑ̃kunu kun ko n dɑɑ mɑɑ wɑ̃ɑ. 3 Adɑmɑ yɑ̃ku ni, nu sɑ̃ɑwɑ ni nu koo tɔmbu ben torɑnu yɑɑyɑsiɑ wɔ̃ɔ kɑ wɔ̃ɔ. 4 Domi nɑɑ kinɛnu kɑ bonun yɛm mu ǹ kpɛ̃ mu torɑnu wunɑ.
5 Yen sɔ̃nɑ, sɑnɑm mɛ Kirisi u kĩ u nɑ hɑnduniɑ sɔɔ, u Gusunɔ sɔ̃ɔwɑ u nɛɛ,
<<A ǹ yɑ̃kuru kĩ ǹ kun mɛ kɛ̃ru.
Yen sɔ̃nɑ ɑ mɑn wɑsi kuɑ.
6 A ǹ nuku dobu mɔ yɑ̃ku dɔ̃ɔ mwɑɑrɑruginu ǹ kun mɛ
torɑrun yɑ̃kunun sɔ̃.
7 Mɑ nɑ nɛɛ, nɛ wee Gusunɔ,
nɑ sisi n kɑ wunɛn kĩru ko
nge mɛ bɑ nɛn gɑri yoruɑ woodɑn tireru sɔɔ.>>
8 Gbiikɑɑ u geruɑ u nɛɛ, <<A ǹ yɑ̃kuru kĩ ǹ kun mɛ kɛ̃ru, ǹ kun mɛ yɑ̃ku dɔ̃ɔ mwɑɑrɑrugiru, ǹ kun mɛ torɑrun yɑ̃kuru. A ǹ mɑɑ nuku dobu mɔ ni sɔɔ.>> Kɑ mɛ, bɑ ni mɔ̀ nge mɛ woodɑ yɑ yiire. 9 Yen biru u nɛɛ, <<Nɛ wee nɑ sisi n kɑ wunɛn kĩru ko.>> Nge mɛyɑ u kɑ sɑ̃ɑ gururu kpeerɑsiɑ mɑ u kpɑɑru kɔsire kuɑ. 10 Yesu Kirisi u Gusunɔn kĩi te kuɑ, yen sɔ̃nɑ sɑ dɛɛrɑ bɛsɛn torɑnun di kɑ ɑbɔ te u kuɑ kɑ win wɑsi nɔn teeru.
11 Tɔ̃ru bɑɑtere yɑ̃ku kowo bɑɑwure rɑ n yɔ̃wɑ u kɑ win sɔmburu ko. Yɑ̃ku tee niyɑ u rɑ n mɔ̀ bɑɑ mɛ nu ǹ kpɛ̃ nu torɑnu wunɑ. 12 Adɑmɑ yɑ̃ku teerɑ Kirisi u kuɑ torɑnun sɔ̃ te tɑ turɑ sere kɑ bɑɑdommɑɔ. Yen biru u dɑ u sinɑ Gusunɔn nɔm geuɔ, 13 u n kɑ mɑrɑ sere Gusunɔ u kɑ win yibɛrɛbɑ surɑ bu ko win nɑɑ sɔnditiru. 14 Domi kɑ ɑbɔ teerɑ u bu dɛɛrɑsiɑ mɑm mɑm sere kɑ bɑɑdommɑɔ be Gusunɔ u kuɑ wigibu.
15 Hunde Dɛɛro u mɑɑ sun ye sɔ̃ɔmɔ. Gbiikɑɑ u nɛɛ,
16 <<Yinni Gusunɔ u nɛɛ,
ɑrukɑwɑni kpɑɑ ye wee
ye kon kɑ bu bɔke ɑmɛn biru.
Kon nɛn woodɑ doke ben bwisikunu sɔɔ.
Kon ye yorusi ben gɔ̃rusɔ.>>
17 Mɑ u kpɑm nɛɛ, <<Nɑ ǹ mɑɑ ben torɑnu kɑ ben woodɑ sɑrɑbu yɑɑyɑmɔ.>> 18 Tɛ̃ bɑ̀ n goon torɑnu wunɑ, n ǹ mɑɑ tilɑsi bu yɑ̃kuru gɑru ko ten sɔ̃.
Su Gusunɔ susi
19 Yen sɔ̃nɑ nɛgibu sɑ toro sindu mɔ su kɑ du dii te tɑ dɛɛre gem gem sɔɔ Yesun yɛm sɑɑbu. 20 U sun swɑɑ kpɑɑ yɑbɑ ye yɑ wɑsi sɑɑ kɑrerun min di te tɑ sɑ̃ɑ win wɑsi. 21 Sɑ mɑɑ yɑ̃ku kowo tɔnwero mɔ wi bɑ swĩi Gusunɔn tɔmbun sɔ̃. 22 Ǹ n mɛn nɑ, i de su Gusunɔ susi kɑ murɑfiti sɑriru kɑ nɑɑnɛ doke bi bu toro sindu mɔ kɑ gɔ̃ru dɛɛrɔ ge gɑ ǹ tɑɑrɛ mɔ kɑ wɑsi yi bɑ dɛɛrɑsiɑ kɑ nim dɛɛrɑm. 23 Su de sɑ n yĩiyɔ bini nɛni dim dim bìn seedɑ sɑ dimɔ, domi Gusunɔ wi u nɔɔ mwɛɛru kuɑ u sɑ̃ɑ nɑɑnɛgii. 24 Su lɑɑkɑri kuɑnɑ kpɑ su dɑm kɛ̃ɛnɑ, sɑ n kɑ kĩru sɔ̃ɔsimɔ kpɑ sɑ n sɔm geenu mɔ̀. 25 Su ku mɛnnɔsu sinɑ nge mɛ n sɑ̃ɑ gɑbun dɔɔnɛ. Adɑmɑ su dɑm kɛ̃ɛnɑ n kere, yèn sɔ̃ i wɑɑmɔ mɑ Yinnin tɔ̃ru tɑ turuku koomɑ.
26 Domi sɑ̀ n yɛ̃ mɑ torɑrɑ sɑ kɑ mɔ̀ sɑnɑm mɛ sɑ gem giɑ kɔ, yɑ̃kuru gɑru mɑɑ sɑri te tɑ koo bɛsɛn torɑnu wunɑ. 27 N tiewɑ sɑ n siribu mɑrɑ kɑ dɔ̃ɔ boko wi u koo Gusunɔn yibɛrɛbɑ kɑm koosiɑ. 28 Bɑɑwure wi u Mɔwisin woodɑ sɑrɑ bɑ rɑ nùn gowɑ kɑ wɔnwɔndu sɑriru, tɔnu yiru ǹ kun mɛ itɑ bɑ̀ n seedɑ di mɑ u tɑɑrɛ mɔ. 29 Ǹ n mɛn nɑ, ɑmɔnɑ n ko n sɑ̃ɑ siribun sɑnɑm kɑ wi u Hunde duromgii wɔnwɑ mɑ u Gusunɔn Bii gɛmɑ mɑ u win yɛm kɑm mɛɛrɑ mɛ Gusunɔ u kɑ win nɔɔ mwɛɛrun gɑri sire mɑ u kɑ yɛ̃ro dɛɛrɑsiɑ. I n yɛ̃ mɑ yɛ̃ro win sɛɛyɑsiɑbu koo kpɛ̃ɑ. 30 Domi bɛsɛ sɑ yɛ̃ro yɛ̃ wi u geruɑ u nɛɛ, <<Nɛnɑ kon mɔru kɔsiɑ, nɛnɑ kon dibu kɔsiɑ.>> U mɑɑ kpɑm nɛɛ, <<Yinni Gusunɔ u koo win tɔmbu siriɑ.>> 31 Gɑri kɔ̃siyɑ Gusunɔ Yinni wɑso ù n tɔnu nɔmɑ doke.
32 I yɑɑyo nge mɛ i gɑsɔ kuɑ. Sɑnɑm mɛ i Gusunɔn yɑm bururɑm wɑ i kpɑ, i nɔni sɔ̃ɔrɑ gem gem ɑdɑmɑ i yɔ̃rɑ sim sim tɑɑ bi sɔɔ. 33 Gɑsɔ bɑ bɛɛ wɔmmɔ mɑ bɑ bɛɛ nɔni sɔ̃ɔmɔ bɑtumɑ sɔɔ, gɑsɔ mɑɑ i gɑbu dɑm kɛ̃mɔ be bɑ wɑhɑlɑ yen bweseru wɑɑmɔ. 34 Geemɑ, i kɑ pirisɔmbɑ nɔni swɑ̃ɑru bɔnu kuɑ. Ye bɑ mɑɑ bɛɛ bɛɛn dukiɑ wɔrɑri, i wurɑ kɑ nuku dobu, domi i yɛ̃ mɑ i dukiɑ mɔ ye yɑ bɛɛrɛ bo ye yɑ ko n wɑ̃ɑ kɑ bɑɑdommɑɔ. 35 Ǹ n mɛn nɑ, i ku wɔrugɔru kpɑnɑ, domi ten ɑre kpɑ̃. 36 Kɑ gem, i ǹ ko ko i kun tɛmɑnɛ i kɑ Gusunɔn kĩru ko kpɑ i wɑ i mwɑ yèn nɔɔ mwɛɛru u bɛɛ kuɑ. 37 Geemɑ, nge mɛ Gusunɔn gɑri gerumɔ,
<<N tiewɑ fiiko, kɛ̃ɛriki tɔnɑ.
Wi u koo nɑ u kɑ tunumɑ, u ǹ tɛɛmɔ.
38 Mɑ wi u sɑ̃ɑ gemgii nɛn nɔni sɔɔ,
u ko n wɑ̃ɑ nɑɑnɛ dokebun sɑɑbu.
Adɑmɑ ù n biru wurɑ,
nɛn gɔ̃ru gɑ ǹ mɑɑ kɑ nùn dorɑmɔ.>>
39 Sɑ ǹ wɑ̃ɑ be bɑ biru wurɔ bu kɑ kɑm kon wuurɔ, sɑ wɑ̃ɑwɑ be bɑ nɑɑnɛ doke bu kɑ ben hunden fɑɑbɑ wɑn wuurɔ.