4
1 Gusunɔ u sun nɔɔ mwɛɛru kuɑ u nɛɛ, sɑ ko kpĩ su du mi sɑ ko wɛ̃rɑ kɑ wi sɑnnu. Ǹ n mɛn nɑ, su lɑɑkɑri ko, kpɑ bɛɛn goo u ku rɑɑ deemɛ u wɛ̃rɑ yee te biɑ. 2 Domi bɑ sun Lɑbɑɑri geɑ wɑɑsu kuɑ nge mɛ bɑ bu kuɑ be bɑ gɑsɔ wɑ̃ɑ gbɑburu sɔɔ. Bɑ gɑri yi nuɑ, ɑdɑmɑ yi ǹ bu ɑrufɑɑni gɑɑ kue domi sɑnɑm mɛ bɑ yi nuɑ, bɑ ǹ yi nɑɑnɛ doke. 3 Bɛsɛ be sɑ nɑɑnɛ doke, sɑ ko du wɛ̃rɑ yee te sɔɔ tèn sɔ̃ Gusunɔ u nɛɛ,
<<Nɑ mɔru kuɑ mɑ nɑ bɔ̃ruɑ nɑ nɛɛ, bɑ ǹ sisi bu kɑ
mɑn wɛ̃rɑ mi nɑ wɛ̃re.>>
U gɑri yi geruɑ bɑɑ mɛ win sɔmburɑ kpɑ sɑɑ mìn di u hɑnduniɑ tɑkɑ kuɑ. 4 Kɑ geemɑ, gɑm gum Gusunɔn gɑri sɔɔ bɑ sɔ̃ɔ nɔɔbɑ yirusen gɑri geruɑ bɑ nɛɛ, <<Gusunɔ u win sɔmburu kpuro deri u wɛ̃rɑ sɔ̃ɔ nɔɔbɑ yiruse.>> 5 Mɑ Gusunɔ u kpɑm gɑri tee yi geruɑ u nɛɛ, <<Bɑ ǹ sisi bu kɑ mɑn wɛ̃rɑ mi nɑ wɛ̃re.>> 6 Be bɑ gbiɑ bɑ Lɑbɑɑri geɑ ye nuɑ bɑ ǹ due wɛ̃rɑ yee te sɔɔ yèn sɔ̃ bɑ ǹ mɛm nuɑ. Ǹ n mɛn nɑ, ɑyerɑ wɑ̃ɑ ginɑ gɑbu bu kɑ du te sɔɔ. 7 Yen sɔ̃nɑ Gusunɔ u kpɑm tɔ̃ru yii te u sokɑ gisɔ. Wɔ̃ɔ dɑbinun biru u ten gɑri geruɑ sɑɑ Dɑfidin min di, nge mɛ sɑ wɑ kɔ. U nɛɛ,
<<Ì n Gusunɔn nɔɔ nɔɔmɔ gisɔ,
i ku de bɛɛn gɔ̃rusu bɔbiɑ.>>
8 Geemɑ, Yosue ù n dɑɑ tɔn be kpɑrɑ u kɑ duɑ wɛ̃rɑ yee te sɔɔ, Gusunɔ u ǹ dɑɑ mɑɑ tɔ̃ru gɑrun gɑri mɔ̀. 9 Ǹ n mɛn nɑ, wɛ̃rɑ te tɑ kɑ Gusunɔn sɔ̃ɔ nɔɔbɑ yirusegiru weenɛ, tɑ wɑ̃ɑ Gusunɔn tɔmbun sɔ̃. 10 Domi wi u duɑ Gusunɔn wɛ̃rɑ yerɔ u win sɔmburu deriwɑ nge mɛ Gusunɔ u wigiru deri. 11 Ǹ n mɛn nɑ, su hɑniɑ ko su kɑ du wɛ̃rɑ yee te sɔɔ, kpɑ goo u ku ko mɛm nɔɔ sɑrirugii nge tɔn be, kpɑ u kɑm ko.
12 Domi Gusunɔn gɑri yi wɑsi yi mɑɑ dɑm mɔ. Yi nɔɔ do n kere tɑkobi ye bɑ dɛ̃ɛrɑ biru kɑ wuswɑɑ. Yi dɑm mɔ yi kɑ tɔnun gɔ̃ru kɑ win hunde sɔku kɑ mɑɑ win gbinnu sere yu kpɛ̃ɛru girɑri. Yi tɔnun gɔ̃run kĩru kɑ gen bwisikunu sirimɔ. 13 Gɑ̃ɑnu sɑri ni nu Gusunɔ berue win tɑkɑ koorɑ sɔɔ. Kpuro yɑ wukiɑrewɑ yɑ yii win wuswɑɑɔ. Wiyɑ bɛsɛ kpuro sɑ ko mɑɑ bɛsɛn wɑ̃ɑru tusiɑ.
Yesu,
yɑ̃ku kowo tɔnwero boko
14 Kɑ geemɑ sɑ yɑ̃ku kowo tɔnwero boko mɔ wi u turɑ sere Gusunɔn mi, wiyɑ Yesu Gusunɔn Bii. Ǹ n mɛn nɑ, su yɔ̃rɑ dim dim bɛsɛn seedɑ ye sɑ di sɔɔ. 15 Domi sɑ yɑ̃ku kowo tɔnwero mɔ wi u koo kpĩ u kɑ sun duurɑ bɛsɛn dɑm sɑriru sɔɔ yèn sɔ̃ bɑ nùn kɔkurɑ gɑ̃ɑnu kpuro sɔɔ nge bɛsɛ, ɑdɑmɑ u ǹ durum koore. 16 Ǹ n mɛn nɑ, su Gusunɔ duromgiin sinɑ turɑru susi kɑ toro sindu kpɑ su kɑ wɔnwɔndu wɑ kɑ durom mɛ mu koo sun somi sɑɑ ye sɑ mɛn bukɑtɑ mɔ.