3
Yesu u Mɔwisi bɛɛrɛ kere
1 Yen sɔ̃ nɛgibu, bɛɛ be Gusunɔ u sokɑ i kɑ ko wigibu, i de i n Yesu mɛɛrɑ wi Gusunɔ u gɔrimɑ u kɑ ko yɑ̃ku kowo tɔnwero wìn seedɑ sɑ dimɔ. 2 Wiyɑ u kɑ Gusunɔ turo yɔ̃rɑ wi u nùn gɔsɑ sɔmbu ten sɑɑbu nge mɛ Mɔwisi u kuɑ win sɔmburu sɔɔ Gusunɔn yɛnugibu kpuron suunu sɔɔ. 3 Wi u yɛnu kuɑ u bɛɛrɛ mɔ u kere yɛnu gen tii. Nge mɛyɑ Yesu u kɑ bɛɛrɛ bɑkɑ nɛ ye yɑ Mɔwisigiɑ kere. 4 Geemɑ, yɛnu bɑɑgere gɑ gen yɛ̃ro mɔ, ɑdɑmɑ Gusunɔwɑ u sɑ̃ɑ kpuron yɛ̃ro. 5 Mɔwisi u kuɑ sɔm kowo nɑɑnɛgii Gusunɔn yɛnugibu kpuron suunu sɔɔ u kɑ gɑrin seedɑ di yi Gusunɔ u koo rɑ gere. 6 Adɑmɑ Kirisi u sɑ̃ɑ Bii nɑɑnɛgii wi Gusunɔ u kuɑ win yɛnu yɛ̃ro. Bɛsɛrɑ sɑ sɑ̃ɑ win yɛnugibu sɑ̀ n yĩiyɔbu mɔ sere kɑ nɔrɔ kɑ toro sindu kɑ nɑɑnɛ.
Wɛ̃rɑ te Gusunɔ u wigibu
wɛ̃ɛmɔ
7 Yen sɔ̃nɑ nge mɛ Hunde Dɛɛro u geruɑ,
<<Ì n Gusunɔn nɔɔ nɔɔmɔ gisɔ,
8 i ku de bɛɛn gɔ̃rusu bɔbiɑ
nge mɛ bɛɛn bɑɑbɑbɑ bɑ kuɑ
dɔmɑ te bɑ Gusunɔ seesi
kɑ sɑnɑm mɛ bɑ win lɑɑkɑri mɛɛrɑ gbɑburu sɔɔ.
9 Miyɑ bɑ mɑn wɛ̃ɛrɑ kɑ lɑɑkɑri mɛɛribu.
Bɑ mɑɑ wɑ ye nɑ kuɑ sere wɔ̃ɔ weeru.
10 Yen sɔ̃nɑ nɑ kɑ tɔn be mɔru kuɑ.
Mɑ nɑ nɛɛ, bɑɑdommɑwɑ bɑ torɑmɔ ben bwisikunu sɔɔ.
Bɑ ǹ nɛn swɛɛ tubɑ.
11 Nɑ mɔru kuɑ mɑ nɑ bɔ̃ruɑ nɑ nɛɛ,
bɑ ǹ sisi bu kɑ mɑn wɛ̃rɑ mi nɑ wɛ̃re.>>
12 Yen sɔ̃ nɛgibu, i tii lɑɑkɑri koowo, i ku de bɛɛn goo u n gɔ̃ru kɔ̃su mɔ ge gɑ ǹ nɑɑnɛ doke, ge gɑ koo nùn biru wurɑsiɑ Gusunɔ, Yinni wɑson min di. 13 Adɑmɑ i n dɑm kɛ̃ɛnɑmɔ bɑɑdommɑ sɑɑ yè sɔɔ bɑ mɔ̀ gisɔ, kpɑ bɛɛn goo u ku de torɑru tu win nɔni wɔ̃ke tu win gɔ̃ru bɔbiɑsiɑ. 14 Geemɑ, sɑ kuɑ be bɑ gbinnɛ kɑ Kirisi sɑ̀ n toro sindu mɔ sere kɑ nɔrɔ te sɑ mɔ toren di.
15 Nge mɛ Gusunɔn gɑri gerumɔ,
<<Ì n Gusunɔn nɔɔ nɔɔmɔ gisɔ,
i ku de bɛɛn gɔ̃rusu bɔbiɑ
nge mɛ bɛɛn bɑɑbɑbɑ bɑ kuɑ
dɔmɑ te bɑ nùn seesi.>>
16 Berɑ̀ be bɑ Gusunɔn nɔɔ nuɑ mɑ bɑ nùn seesi. Beyɑ be Mɔwisi u kpɑrɑ kpuro sɑɑ Egibitin di. 17 Berɑ̀ Gusunɔ u kɑ mɔru mɔ̀ sere wɔ̃ɔ weeru. Beyɑ be bɑ torɑ mɑ bɑ gbisukɑ gbɑburu sɔɔ. 18 Sɑnɑm mɛ Gusunɔ u bɔ̃ruɑ u nɛɛ, <<bɑ ǹ sisi bu kɑ mɑn wɛ̃rɑ mi nɑ wɛ̃re,>> berɑ̀ u kɑ yɑ̃ mɑ n kun mɔ be bɑ ǹ nùn mɛm nɔɔwɛ. 19 Nge mɛyɑ sɑ wɑ mɑ bɑ ǹ kpĩɑ bɑ due wɛ̃rɑ yee te sɔɔ yèn sɔ̃ bɑ ǹ nɑɑnɛ doke.