Heberu 2

Fɑɑbɑ ye, yɑ kpɑ̃ too

¹ Yen sɔ̃, n weenɛ su gɑri yi sɑ nuɑ nɛnɛ sim sim kpɑ su ku kɑ nim doonɑ. ² Gɑri yi wɔllun gɔrɑdo bɑ kɑ nɑ, yi yin dɑm sɔ̃ɔsi sere bɑɑwure wi u yi sɑrɑ ǹ kun mɛ wi u ǹ yi mɛm nɔɔwɛ, u sɛɛyɑsiɑbu wɑ bi u kɑ weenɛ. ³ Ǹ n mɛn nɑ, ɑmɔnɑ sɑ ko kɑ kpĩ su sɛɛyɑsiɑbu suuri, sɑ̀ n fɑɑbɑ bɑkɑ yen bweseru ɑtɑfiiru kuɑ. Yinnin tii u gbiɑ u fɑɑbɑ yen gɑri nɔɔsiɑ. Yen biru be bɑ yi nuɑ bɑ sun yi sɔ̃ɔwɑ bɑ sire mɑ gemɑ. ⁴ Sɑɑ ye sɔɔrɑ Gusunɔ u ben seedɑ dɑm sosi kɑ yĩrenu kɑ mɑɑmɑɑki kɑ sɔm dɑmgii bwese bwesekɑ. U mɑɑ kpɑm tɔmbu Hunde Dɛɛron kɛ̃nu bɔnu kuɑ nge mɛ u kĩ.

Wi u tɔmbu kpɑrɑmɔ

bu kɑ fɑɑbɑ wɑ

⁵ Geemɑ, n ǹ mɔ wɔllun gɔrɑdobɑrɑ Gusunɔ u hɑnduniɑ ye yɑ koo nɑn dɑm wɛ̃, yèn gɑri sɑ mɔ̀. ⁶ Adɑmɑ Gusunɔn gɑri sɔɔ, goo u geruɑ u nɛɛ,

<<Yinni Gusunɔ, mbɑ tɔnu sɑ̃ɑ ɑ n sere kɑ nùn yɑɑye.

Wɑrɑ rɑ n tɔnu ɑ n sere kɑ nùn nɔɔrimɔ.

⁷ A nùn kuɑ u wunɛn gɔrɑdobɑ kɔmiɛ fiiko.

Kɑ mɛ, ɑ nùn yiiko kɑ bɛɛrɛ wɛ̃ nge sunɔ.

⁸ A nùn kuɑ wirugii tɑkɑ koorɑ kpuron wɔllɔ.>>

Sɑnɑm mɛ Gusunɔ u tɔnu dɑm wɛ̃ gɑ̃ɑnu kpuron wɔllɔ, gɑ̃ɑnu sɑri ni u ǹ deri nu nùn wiru kpĩiyɑ. Adɑmɑ sɑ ǹ ginɑ wɑ mɑ gɑ̃ɑ ni kpuro nu nùn wiru kpĩiyɛ. ⁹ Kɑ mɛ sɑ Yesu wɑ. Sɑɑ fiiko sɔɔ bɑ nùn kuɑ wi u ǹ Gusunɔn gɔrɑdobɑ turɑ, kpɑ u kɑ gbi tɔmbu kpuron sɔ̃ Gusunɔn durom sɑɑbu. Tɛ̃, sɑ nùn wɑɑmɔ kɑ win yiiko kɑ bɛɛrɛ nge sunɔ, win gɔɔ wi u gun sɔ̃. ¹⁰ Kɑ gem, n weenɛ Gusunɔ wi u kpuro tɑkɑ kuɑ mɑ yɑ wɑ̃ɑ win sɔ̃, u Yesu ko tɔn giro nɔni swɑ̃ɑru sɔɔ, kpɑ u kɑ tɔn dɑbinu ko win bibu be bɑ koo win yiiko bɔnu ko. Domi Yesu wiyɑ u bu kpɑrɑmɔ bu kɑ fɑɑbɑ wɑ.

¹¹ Yesu wi u tɔmbu sɑ̃rɑsiɑmɔ ben torɑnun di, wi kɑ be bɑ sɑ̃re bɑ kuɑ tundo turon bibu. Yen sɔ̃nɑ sekurɑ kun nùn mɔ̀ u kɑ bu soku wigibu ¹² sɑnɑm mɛ u nɛɛ,

<<Yinni Gusunɔ, kon nɛgibu wunɛn gɑri sɔ̃.

Kon nun siɑrɑ kɑ womusu mi bɑ mɛnnɛ.>>

¹³ U mɑɑ kpɑm nɛɛ,

<<Kon nɛn nɑɑnɛ doke Gusunɔ sɔɔ.>>

Yen biru kpɑm u nɛɛ,

<<Nɛ wee kɑ bii be Gusunɔ u mɑn kɑ̃.>>

¹⁴ Nge mɛ bii be, bɑ wɑsi mɔ kɑ yɛm, Yesu win tii u kuɑ nge be. U kuɑ mɛ kpɑ u kɑ gbi. Win gɔɔ wi, u Yibirisi kpeerɑsiɑ ye yɑ rɑɑ gɔɔn dɑm nɛni. ¹⁵ Kpɑ u mɑɑ kɑ bu yɑkiɑ be bɑ sɑ̃ɑ nge yobu ben wɑ̃ɑru kpuro sɔɔ gɔɔn bɛrum sɔ̃. ¹⁶ Kɑ gem, n ǹ mɔ win gɔrɑdobɑrɑ u somiru nɑ, Aburɑhɑmun bibɑ u somiru nɑ. ¹⁷ Yen sɔ̃nɑ u ǹ koo ko u kun kɑ win wɔnɔbu weenɛ kpuro sɔɔ, kpɑ u kɑ ko ben yɑ̃ku kowo tɔnwero wi u wɔnwɔndu kɑ nɑɑnɛ mɔ Gusunɔn sɔmburu sɔɔ, kpɑ u kɑ tɔmbun torɑrun yɑ̃kuru ko. ¹⁸ Tɛ̃, u koo kpĩ u bu somi be bɑ wɑ̃ɑ kɔkiribu sɔɔ yèn sɔ̃ win tii u nɔni swɑ̃ɑru wɑ kɔkiribu sɔɔ.