TIRE TE
BA HEBERUBA KUA
1
Gusunɔ u gɑri geruɑ
win Biin min di
1 Gɑsɔ Gusunɔ u kɑ bɛsɛn sikɑdobɑ gɑri kuɑ nɔn dɑbinu kɑ swɑɑ dɑbinu sɑɑ win sɔmɔbun min di. 2 Adɑmɑ sɑnɑm dɑ̃ɑkim mɛni sɔɔ u kɑ sun gɑri kuɑ sɑɑ win Biin min di. Bii wiyɑ u hɑnduniɑ tɑkɑ kuɑ, Gusunɔ u mɑɑ nùn gɔsɑ u kɑ nùn gɑ̃ɑnu kpuro nɔmu bɛriɑ. 3 Win yiiko yɑ sɔ̃ɔsirɑmɔ win min di. Bii wi, u sɑ̃ɑ Gusunɔn tii tiin weenɑsii, u mɑɑ bɑɑyere kpuro nɛni kɑ win gɑri dɑmgii. Ye u tɔmbu sɑ̃rɑsiɑ ben torɑnun di u kpɑ, u dɑ u sinɑ wɔllɔ Gusunɔ dɑm kpurogiin nɔm geuɔ.
Gusunɔn Bii
u Gusunɔn gɔrɑdobɑ kere
4 Nge mɛ Gusunɔ u win Bii yĩsiru kɑ̃ te tɑ win gɔrɑdobɑginu kpɑ̃ɑru kere, nge mɛyɑ mɑɑ Bii win tii u Gusunɔn gɔrɑdobɑ kere. 5 Kɑ gem, Gusunɔ u ǹ win gɔrɑdobɑn goo sɔ̃ɔre u nɛɛ,
<<Wunɑ ɑ sɑ̃ɑ nɛn Bii.
Gisɔrɑ nɑ kuɑ wunɛn tundo.>>
N ǹ mɑɑ mɔ win gɔrɑdo goo u kɑ yɑ̃ ye u nɛɛ,
<<Kon ko win tundo,
u koo mɑɑ ko nɛn bii.>>
6 Adɑmɑ sɑɑ ye u win Bii yerumɑ gɔriɔ hɑnduniɑ sɔɔ u nɛɛ,
<<Gusunɔn gɔrɑdobɑ kpuro bu yiiro bu nùn sɑ̃.>>
7 Wee ye u geruɑ win gɔrɑdobɑn sɔ̃. U nɛɛ,
<<Gusunɔ u win gɔrɑdobɑ kuɑwɑ nge woo,
mɑ u win sɔm kowobu kuɑ nge dɔ̃ɔ yɑri.>>
8 Adɑmɑ win Biin sɔ̃nɑ u nɛɛ,
<<Gusunɔ, bɑ wunɛn bɑndu swĩi sere kɑ bɑɑdommɑɔ.
Gemɑ ɑ kɑ wunɛn bɑndu nɛni.
9 A geɑ kĩ mɑ ɑ kɔ̃sɑ tusɑ.
Yen sɔ̃nɑ Gusunɔ wi u sɑ̃ɑ wunɛn Yinni u nun gɔsɑ.
U mɑɑ nun nuku dobu wɛ̃
ye u kɑ nun ɑye bɛɛrɛgiru wɛ̃
te tɑ wunɛn kpɑɑsibuginu kpɑ̃ɑru kere.>>
10 U mɑɑ kpɑm nɛɛ,
<<Yinni, toren di wunɑ ɑ tem tɑkɑ kuɑ.
Wunɛn nɔmɑ ɑ mɑɑ kɑ wɔllu kuɑ.
11 Ye kpuro yɑ koo doonɑ ɑdɑmɑ wunɛ kɑɑ n wɑ̃ɑ.
Yɑ koo tɔkɔru ko nge yɑ̃nu.
12 Kɑɑ ye kure nge yɑberu.
Yɑ ko yɑ n mɑɑ kɔsimɔwɑ nge yɑ̃nu.
Adɑmɑ wunɛ, wunɑ mi, ɑ ǹ tɔkɔru mɔ̀.>>
13 Gusunɔ kun mɑɑ win gɔrɑdobɑn goo sɔ̃ɔre u nɛɛ,
<<A sinɔ nɛn nɔm geuɔ
sere n kɑ nun wunɛn yibɛrɛbɑ tɑɑreɑ.>>
14 Ǹ n mɛn nɑ, mbɑ wɔllun gɔrɑdobɑ bɑ sɑ̃ɑ. Bɑ sɑ̃ɑwɑ hundebɑ be bɑ Gusunɔ sɑ̃ɑmɔ. Berɑ u rɑ mɑɑ gɔri bu dɑ bu be bɑ koo fɑɑbɑ wɑ somi.