5
1 Yɑ̃ku kowo tɔnwero bɑɑwure wi bɑ gɔsɑ tɔmbun suunu sɔɔn di, bɑ nùn yiiwɑ u kɑ Gusunɔ sɑ̃ ben sɔ̃. U rɑ Gusunɔ ben kɛ̃nu wɛ̃ kpɑ u yɑ̃kunu ko ben torɑnun sɔ̃. 2 U koo kpĩ u suuru ko kɑ yɛ̃ru sɑrirugibu kɑ be bɑ swɑɑ sɑre yèn sɔ̃ win tii u dɑm biɑre. 3 Yen sɔ̃nɑ mɑɑ, u ǹ koo ko u kun yɑ̃kunu kue win tiin torɑnun sɔ̃ nge mɛ u mɔ̀ tɔmbuginun sɔ̃. 4 Goo kun kpɛ̃ u tii yɑ̃ku kowo tɔnwerorun bɛɛrɛ wɛ̃. Gusunɔwɑ u rɑ tɔnu gɔsi u wɛ̃ nge mɛ u Aroni kuɑ.
5 Nge mɛyɑ Kirisi kun tii yɑ̃ku kowo tɔnwerorun yiiko wɛ̃. Gusunɔwɑ u nùn ye wɛ̃ wi u nɛɛ,
<<Wunɑ nɛn Bii.
Gisɔrɑ nɑ kuɑ wunɛn tundo.>>
6 Gɑm gum mɑɑ u kpɑm geruɑ u nɛɛ,
<<Wunɑ kɑɑ ko yɑ̃ku kowo kɑ bɑɑdommɑɔ
nge Mɛɛkisidɛki.>>
7 Yesun hɑnduniɑn wɑ̃ɑru sɔɔ u Gusunɔ kɑnɑ wi u koo kpĩ u nùn wɔrɑ gɔɔn nɔmɑn di. U mɑɑ nùn suuru kɑnɑ kɑ wuri bɛkɛ kɑ yĩresu. Mɑ Gusunɔ u nùn swɑɑ dɑki win wii kpĩibun sɔ̃. 8 Bɑɑ mɛ u sɑ̃ɑ Gusunɔn Bii, u mɛm nɔɔbu giɑ nɔni swɑ̃ɑ te u wɑn sɔ̃. 9 Ye u yibɑ u kpɑ, u kɑ fɑɑbɑ nɑ ye yɑ ku rɑ kpe, be kpuron sɔ̃ be bɑ nùn mɛm nɔɔwɑ. 10 Mɑ Gusunɔ u nùn kuɑ yɑ̃ku kowo tɔnwero nge Mɛɛkisidɛki.
Nɑɑnɛ doke deribun kirɔ
11 Gɑ̃ɑ dɑbinu wɑ̃ɑ ni sɑ ko kpĩ su gere gɑri yin sɔ̃, ɑdɑmɑ yɑ sɛ̃ n kɑ bɛɛ yi tubusiɑ domi i kuɑ be gɑri ku rɑ yeeri fuuku. 12 Sɑɑ yɑ turɑ i kɑ ko keu koosiobu. Kɑ mɛ, i ginɑ goon bukɑtɑ mɔ wi u koo bɛɛ Gusunɔn gɑrin torubu sɔ̃ɔsi. Bɛɛ be n weenɛ i n dĩɑ dɔki dimɔ, i kpɑm bɔm bukɑtɑ mɔ. 13 Wi u bɔm nɔrumɔ kpuro biiwɑ, u ǹ Gusunɔn gɑri geen dɔɔnɛ mɔ. 14 Adɑmɑ dĩɑ dɔki sɑ̃ɑwɑ guro gurobun dĩɑnu be bɑ geɑ kɑ kɔ̃sɑn wunɑnɑbu giɑ yèn sɔ̃ bɑ yen dɔɔnɛ mɔ.