3
Sɑnɑm dɑ̃ɑkim
1 A n yɛ̃ mɑ sɑnɑm dɑ̃ɑkim sɔɔ wɑ̃ɑrɑ koo sɛ̃siɑ. 2 Tɔmbu bɑ ko n ben tii tɔnɑn ɑrufɑɑni kɑsu, gobin kĩrɑ ko n bu nɛni, bɑ ko n sɑ̃ɑ woo kɑnɔbu kɑ tii suobu kpɑ bɑ n Gusunɔ gɑri kɑm gerusimɔ. Bibu bɑ ǹ koo ben mɔwɔbu mɛm nɔɔwɑ, tɔmbɑ ko n sɑ̃ɑ guturubɑ kɑ Gusunɔn bɛɛrɛ yɛ̃ru sɑrirugibu. 3 Bɑ ko n sɑ̃ɑ kĩru kɑ wɑnum sɑrirugibu. Bɑ koo tɔmbu mɛm mɑni kpɑ bɑ n sɑ̃ɑ mɔru kɑnkɑmgibu be bɑ nɔni tɑu. Bɑ ko bɑ n geɑn kowobu tusɑ. 4 Bɑ ko n sɑ̃ɑ kɔrumɔtɔnugibu kɑ lɑsɑbu sɑrirugibu kɑ be bɑ tii sue bɑ gɑ̃ɑmɔ. Bɑ ko n hɑnduniɑn dobun kĩru mɔ n kere Gusunɔn kĩru. 5 Bɑ ko n sɑ̃ɑ bèn Gusunɔ sɑ̃ɑrɑ sɑkuɑ, bɑ ǹ koo ten dɑm wurɑ. A tɔn ben bweseru suurio. 6 Ben gɑbɑ ko n yɛnusu duurimɔ kpɑ bu kɑ ben gɑri tɔn kurɔ dɑm sɑrirugibu kɑmiɑ, bèn durum yɑ derɑ bɑ kom yɑɑ bie mɑ bɑ kĩru bɑɑtere diiriɑmmɛ. 7 Bɑɑdommɑ kurɔ be, bɑ kɑsu bu gɑ̃ɑnu giɑ ɑdɑmɑ bɑ ǹ kpɛ̃ bu gem giɑ. 8 Nge mɛ Yɑnɛsi kɑ Yɑmbɛsi bɑ kɑ Mɔwisi kinɛnu kuɑ, nge mɛyɑ tɔn be, bɑ mɑɑ kɑ gem kinɛnu mɔ̀, bɑ ǹ mɑɑ biti mɔ kɔ̃sɑn bwisikunun sɔ̃. Bɑ ǹ gɑru koorɔ nɑɑnɛ dokebu sɔɔ. 9 Adɑmɑ ben hɑniɑ kun kɑ bu gɑm dɔɔ, domi bɑɑwure u koo ben wiirɑru wɑ nge mɛ n Yɑnɛsi kɑ Yɑmbɛsi deemɑ.
Yiire dɑ̃ɑkibu
10 Adɑmɑ wunɛ Timɔte, ɑ nɛn sɔ̃ɔsiru kɑ nɛn kookoosu wɑ, kɑ nɛn himbɑ hɑnduniɑn wɑ̃ɑru sɔɔ kɑ nɛn nɑɑnɛ dokebu kɑ nɛn suuru kɑ nɛn kĩru kɑ mɑɑ nɛn tɛmɑnɑbu, 11 kɑ bɔnɛ ye bɑ mɑn dɔre kɑ nɛn nɔni swɑ̃ɑ te tɑ mɑn deemɑ Antiɔsiɔ kɑ Ikonimuɔ kɑ Lisitiɔ. Bɔnɛ gɑɑ sɑri ye nɑ kun wɑ mi. Adɑmɑ Yinni u mɑn yɑkiɑ sɑɑ ye kpuron di. 12 Kɑ gem, bɑɑwure wi u kĩ u Gusunɔ bɛɛrɛ wɛ̃ wi kɑ Yesu Kirisin wɑ̃ɑsinɑɑ sɔɔ, u ǹ koo ko u kun nɔni swɑ̃ɑru wɑ. 13 Adɑmɑ tɔn kɔ̃sobu kɑ wee kowobu ben kɔ̃suru tɑ ko tɑ n sosimɔwɑ. Nge mɛ bɑ gɑbu nɔni wɔ̃kumɔ, mɛyɑ bɑ mɑɑ tii nɔni wɔ̃kumɔ. 14 Adɑmɑ wunɛ, ɑ n gɑ̃ɑ ni nɛni ni bɑ nun sɔ̃ɔsi ni ɑ nɑɑnɛ doke. A yɑɑyo tɔn bèn min di wunɛn yɛ̃ru tɑ wee. 15 Sɑɑ wunɛn birun diyɑ ɑ Gusunɔn gɑri yɛ̃ yi yi koo kpĩ yi nun bwisi kɛ̃ ɑ kɑ Yesu Kirisi nɑɑnɛ doke kpɑ ɑ fɑɑbɑ wɑ. 16 Gusunɔn gɑri kpuro yi weewɑ sɑɑ Gusunɔn min di. Yi mɑɑ ɑrufɑɑni mɔ yi kɑ gem sɔ̃ɔsi, kpɑ yi kɑ tɔnu win torɑnu sɔ̃ɔsi, kpɑ yi kɑ nùn sɛɛyɑsiɑ, kpɑ yi mɑɑ nùn sɔ̃ɔsi nge mɛ u ko n kɑ wɑ̃ɑ gem sɔɔ. 17 Kpɑ Gusunɔgii u kɑ ko tɔn giro wi u sɔɔru sɑ̃ɑ u kɑ sɔm geeru bɑɑtere ko.